CNG Rate : सर्वसामान्यांच्या खिशाला कात्री, सीएनजीचे दर 80 रुपयांवर

CNG Rate Hike : एकीकडे पेट्रोल-डिझेलच्या दरात सातत्याने वाढ होत असताना सीएनजीच्या दरातही वाढ झाली आहे. नाशिकमध्ये सीएनजीचे दर 80 रुपये प्रति किलो आहेत.

CNG Rate

Fuel Rate Hike : पेट्रोल-डिझेलच्या भावावरून एकीकडे राजकारण चांगलंच तापलेलं असतांनाच दुसरीकडे महाराष्ट्रातील अनेक शहरांमध्ये आता सीएनजीच्या दराने 80 च्या आकडा पार केला आहे. यामुळे सर्वसामान्य नागरिक मेटाकुटीला आले आहेत. उपमुख्यमंत्री अजित पवारांच्या घोषणेनंतर नाशिकमध्ये सीएनजीचे दर कमी होऊन 1 एप्रिलला 65.25 रुपयांवर आले होते, मात्र हा दिलासा फक्त पाच दिवसांसाठीच होता. त्यानंतर 6 एप्रिल पासून टप्प्याटप्प्याने सीएनजीचे दर वाढत गेले असून आज सीएनजीचे दर 80 रुपये किलोवर पोहोचला आहे. डीलर सीएनजीच्या भाववाढीमागील कारण सांगत नाहीत. तसेच MNGL कंपनीचे अधिकारी देखील दरवाढीवर बोलण्यास तयार नाहीत. तुम्ही पुण्यातील आमच्या मुख्य कार्यालयाशी संपर्क साधा असं ते उत्तर देतायत. 

मुंबईमध्ये सीएनजीचे दर 72 रुपये प्रति किलो आहेत. पुण्यात सीएनजीचा दर 73 रुपये किलो आहे. तर देशाची राजधानी दिल्लीमध्ये सीएनजी 71 रुपये प्रति किलोने मिळत आहे.

1 एप्रिल पासून सीएनजीचे नाशिकमधील वाढत गेलेले दर 

01 एप्रिल 2022 : 65.25 रुपये किलो
06 एप्रिल 2022 : 71.00 रुपये किलो
13 एप्रिल 2022 : 76.00 रुपये किलो
20 एप्रिल 2022 : 78.00 रुपये किलो
26 एप्रिल 2022 : 80.00 रुपये किलो

देशात पेट्रोल-डिझेलचे दर स्थिर

आज पेट्रोल-डिझेलच्या दरांमध्ये कोणताही बदल करण्यात आलेला नाही. देशातील सर्वच शहरांत आज पेट्रोल-डिझेलचे दर स्थिर आहेत. गेल्या अनेक दिवसांपासून देशात इंधनाचे दर स्थिर आहेत. राजधानी दिल्लीत एक लिटर पेट्रोलची किंमत (Petrol Price) 105.41 रुपये असून डिझेल (Diesel Price) 96.67 रुपये प्रति लिटरवर पोहोचलं आहे. तर देशाच्या आर्थिक राजधानीचं शहर असणाऱ्या मुंबईत एक लिटर पेट्रोलसाठी 120.51 रुपये, तर एक लिटर डिझेलसाठी 104.77 रुपये मोजावे लागत आहेत. 

गेल्या काही दिवसांपासून देशात पेट्रोल-डिझेलच्या दरवाढीला ब्रेक लागला आहे. पेट्रोल आणि डिझेल 10.20 रुपयांनी महाग झालं होतं. सध्या आंतरराष्ट्रीय बाजारात कच्च्या तेलाच्या किमतींमध्ये पुन्हा एकदा वाढ झाल्याचं पाहायला मिळत आहे. त्यामुळे देशात पुन्हा एकदा पेट्रोल-डिझेलच्या दरवाढीचं सत्र सुरु होण्याची शक्यता वर्तवण्यात येत आहे.  

पंतप्रधान मोदींकडून व्हॅट कमी करण्याच्या सूचना

मुख्यमंत्र्यांसोबतच्या बैठकीदरम्यान, पीएम मोदी म्हणाले होते की, पेट्रोल आणि डिझेलच्या वाढत्या किमतींचा भार कमी करण्यासाठी केंद्र सरकारनं गेल्या नोव्हेंबरमध्ये उत्पादन शुल्कात कपात केली होती. राज्यांनाही त्यांचे कर कमी करण्याचे आवाहन करण्यात आले. काही राज्यांनी येथे कर कमी केला आहे, परंतु काही राज्यांनी त्याचा लाभ नागरिकांना दिला नाही. यावेळी पीएम मोदींनी त्या राज्यांची नावंही सांगितली, ज्यांनी करात कपात केली नाही. ज्यामध्ये महाराष्ट्र, तेलंगणा, आंध्र प्रदेश, पश्चिम बंगाल, तामिळनाडू, झारखंड आणि केरळची नावं होती. पंतप्रधानांनी या राज्यांतील तेलाच्या किमतींचाही उल्लेख केला आणि आता ही राज्ये जनतेला दिलासा देण्याचे काम करू शकतात, असं सांगितलं होतं.

महत्त्वाच्या बातम्या :