गणेशोत्सवापूर्वी मुंबईच्या रस्त्यांवरील सगळे खड्डे बुजणार, मुख्यमंत्र्यांनी घेतली पालिका आयुक्तांची भेट
मुंबईतील रस्त्यांच्या खड्ड्याबाबत मुख्यमंत्री देवेंद्र फडणवीस (Devendra Fadnavis) यांनी महापालिका आयुक्तांसोबत चर्चा केली आहे.
Devendra Fadnavis : मुंबईतील (Mumbai) रस्त्यांच्या खड्ड्याबाबत मुख्यमंत्री देवेंद्र फडणवीस (Devendra Fadnavis) यांनी महापालिका आयुक्तांसोबत (Municipal Commissioner) चर्चा केली आहे. मुंबईत झालेल्या मुसळधार पावसानंतर मुंबईच्या रस्त्यावर खड्ड्यांचे साम्राज्य पाहायला मिळत आहे. एबीपी माझा ने आज याच मुंबईतील खड्ड्या संदर्भात रियालिटी चेक केली होती. मुंबईतील खड्डे बुजविण्याचे काम आता जलद गतीनं सुरु करण्यात आलं आहे.
गणेश चतुर्थीच्या आधी मुंबईचे सगळे खड्डे बुजवण्याचा पालिकेचा मानस
गणेश चतुर्थीच्या आधी मुंबईचे सगळे खड्डे बुजवण्याचा पालिकेचा मानस आहे. मुसळधार पावसामुळं इंदिरानगर येथून सुरु होणाऱ्या वाकोला ब्रिजवरही खड्डे निर्माण झाले आहेत. हा पूल एमएमआरडीएने बांधलेला आहे तरी देखील यावर अनेक खड्डे लोकांना त्रासदायक ठरत असल्याने खड्डे बुजवण्याबाबत मुख्यमंत्री देवेंद्र फडणवीस यांनी आदेश दिले आहेत.
कोणत्या भागात सर्वाधिक खड्डे
मुंबईच्या अंधेरी, भांडुप, कुर्ला, घाटकोपर, मुलुंड, वांद्रे बस स्थानक, परळ, दादर, घाटकोपर-मानखुर्द लिंक रोड, चारकोप, मालाड या भागात सर्वाधिक खड्डे आहेत. हे खड्डे बुजवण्यासाठी पालिका मास्टिक अस्फाल्टचा वापर करणार आहे. पावसाळ्यात मुंबईकरांचा प्रवास सुकर व्हावा, यासाठी मुंबई महापालिकेने रस्त्याच्या काँक्रीटीकरणाचा घाट घातला. परंतु केवळ 49.07 टक्के रस्ता काँक्रीटीकरणाचे काम पूर्ण झाले. तर उर्वरित कामे पावसाळ्यानंतर म्हणजेच ऑक्टोबर महिन्यापासून करण्यात येणार आहेत. दरम्यान, काँक्रीटीकरण केल्यानंतरही रस्त्यावरील खड्ड्यांची परिस्थिती ‘जैसे थे’चीच आहे. तर पालिकेने रस्ते दुरुस्तीसाठी ‘पॉटहोल क्विकफिक्स’ हे अॅप विकसित केले असून या अॅपवर नागरिकांच्या तक्रारीचा पाऊस पडत आहे.
मुंबईतील अनेक रस्त्यांवर खड्डे
मुंबईतील सगळे रस्ते गुळगुळीत करणार अशी घोषणा करण्यात आली होती. त्यासाठी मुंबईतील सगळ्या रस्त्यांचे कॉन्क्रीटीकरण करण्याचा निर्णय घेण्यात आला होता. मात्र सध्या मुंबईतील अनेक रस्ते धड अवस्थेत नसल्याचे चित्र पाहायला मिळत आहे. मुख्य रस्ता असो अथवा शहरातील अंतर्गत रस्ते मुंबईतील अनेक रस्त्यांवर खड्डे आहेत. पावसाची उघडीप मिळाल्याने खड्डे बुजवण्याचे काम सुरू करण्यात आले आहे. मुंबई महानगरपालिका ही देशातल्या सगळ्यात श्रीमंत महापालिकांपैकी एक आहे. खड्डे बुजवण्यासाठी रोडरोलर किंवा इतर यंत्रे वापरणे सहज शक्य असताना कामगारांना खड्ड्यांमध्ये डांबर टाकून ते हाताने ठोकून सपाट करण्याचे प्रयत्न सुरू आहेत.
महत्वाच्या बातम्या:
जे लोक खड्ड्यांवरून आंदोलन करतात त्यांच्याकडे कोणतही काम राहिलेलं नाही : मंगलप्रभात लोढा
महत्त्वाच्या बातम्या
