Breaking News LIVE : शरद पवार आणि संरक्षण मंत्री राजनाथ सिंह यांच्या भेटीत चीनच्या मुद्द्यावर महत्त्वपूर्ण चर्चा

Breaking News LIVE Updates, 16 July 2021: दिवसभरातील ताज्या घडामोडी, महत्त्वाचे अपडेट्स, देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर महत्वाचे अपडेट लाईव्ह ब्लॉगमध्ये...

Background

दहावीचा निकाल आज जाहीर होणार, दुपारी 1 वाजता पाहता येणार ऑनलाईन निकाल
दहावीचा निकाल ( SSC Result 2021) आज जाहीर होणार आहे. कोरोना व्हायरस आणि लॉकडाऊनमुळे दहावीचा निकाल यंदा जवळपास एक-दीड महिना उशीरा लागला आहे. उद्या दुपारी 1 वाजता बोर्डाच्या अधिकृत वेबसाईटवर विद्यार्थ्यांना निकाल ऑनलाईन पाहता येणार आहे. राज्यात कोरोनाचा प्रादुर्भाव पाहता यंदा राज्य मंडळाच्या दहावीच्या परीक्षा रद्द करून विद्यार्थ्यांना अंतर्गत मूल्यमापनाद्वारे गुण देण्याचा शासन निर्णय शिक्षण विभागाने घेतला. यासाठी अंतर्गत मूल्यमापनाचे निकष सुद्धा ठरवले होते. या मूल्यमापनाच्या आधारे उद्या दहावीचा निकाल दुपारी 1 वाजता बोर्डाच्या अधिकृत वेबसाईटवर जाहीर होणार आहे.  बोर्डाच्या  www.mahahsscboard.in  या अधिकृत संकेसस्थळावर हा निकाल विद्यार्थ्यांना पाहता येईल. शालेय शिक्षण मंत्री वर्षा गायकवाड यांनी निकालाबाबत माहिती दिली. यावर्षी पहिल्यांदाच दहावी बोर्ड परीक्षा कोरोनाच्या पार्श्वभूमीवर रद्द करण्याचा निर्णय राज्याच्या शिक्षण विभागाकडून घेण्यात आला होता. त्यामुळे हा निकाल पूर्णपणे अंतर्गत मूल्यपामनद्वारे तयार करण्यात आला आहे.

राज्यात गुरुवारी 8,010 नवीन कोरोनाबाधित रुग्णांची नोंद, तर 7,391 रुग्ण कोरोनामुक्त
राज्यात दैनंदिन कोरोना (Maharashtra corona cases) बाधित रुग्णांची संख्या काही दिवसांपासून दहा हजारांच्या आत येऊ  लागली आहे. आज 8,010  नवीन रुग्णांची नोंद करण्यात आली आहे. तर 7 हजार 391 रुग्ण कोरोनामुक्त झाले आहे. राज्यात आतापर्यंत 59 लाख 52 हजार 440 रुग्णांनी कोरोनावर मात केली आहे. त्यामुळे राज्यातील रुग्ण बरे होण्याचे प्रमाण 96.17 टक्के आहे. राज्यात आज 170 रुग्णांच्या मृत्यूची नोंद झाली आहे. त्यामुळे राज्याचा मृत्यूदर 2.04 टक्के झाला आहे. तब्बल 31 महापालिका क्षेत्र आणि जिल्ह्यांमध्ये आज एकही मृत्यूची नोंद झालेली नाही. राज्यात सध्या 1 लाख 7 हजार 205 रुग्णांवर उपचार सुरु आहेत. नंदुरबार (70), हिंगोली (71), यवतमाळ (23), गोंदिया (66), चंद्रपूर (22) या पाच जिल्ह्यात अॅक्टिव्ह रुग्णसंख्या 100 च्या खाली आहे. पुणे जिल्ह्यात सध्या सर्वात जास्त 17, 401 अॅक्टिव्ह रुग्ण आहेत. 

जेईई मेन्सच्या चौथ्या सेशनच्या परीक्षेच्या तारखा जाहीर
नॅशनल टेस्टिंग एजन्सीच्या वतीने घेण्यात येणाऱ्या जेईई मेन्सच्या चौथ्या सेशनसाठीच्या परीक्षेसाठीचे प्रवेशपत्रक जारी करण्यात आले आहेत. शिक्षणमंत्री धर्मेंद्र प्रधान यांनी ट्वीट करत ही माहिती दिली आहे.  तसेच चौथ्या सेशनच्या तारखांमध्ये थोडा बदल करण्यात आला असून त्या आता 26 , 27 , 31 ऑगस्ट, 1 सप्टेंबरआणि 2 सप्टेंबर या तारखांना परीक्षा होणार आहे. जेईई मेन्सच्या चौथ्या सेशनसाठीचे ऑनलाईन नोंदणी प्रक्रिया 20 जुलैपर्यंत सुरु आहे. इच्छुक विद्यार्थी jeemain.nta.nic.in. या संकेतस्थळावर अर्ज करु शकतात. 

कला दिग्दर्शक राजू सापते यांना आत्महत्येस प्रवृत्त करणारा मुख्य आरोपी गजाआड
कला दिग्दर्शक राजू सापते यांना आत्महत्येस प्रवृत्त करणारा मुख्य आरोपी राकेश मौर्य याला गजाआड करण्यात यश आलं आहे. पिंपरी चिंचवड पोलिसांनी कीज हॉटेलमधून मौर्यला अटक केली. राकेश मौर्य हा लेबर युनियनचा पदाधिकारी आहे. अटक पूर्व जामीन मिळवण्यासाठी तो वकिलांना भेटायला पिंपरीत आला होता. तेव्हा वाकड पोलिसांनी त्याला बेड्या ठोकल्याची माहिती मिळत आहे. कला दिग्दर्शक राजू सापते यांनी 2 जुलैच्या रात्री राहत्या घरी आत्महत्या केली होती. आत्महत्या करण्यापूर्वी एक व्हिडिओ करून त्यांनी हे टोकाचे पाऊल आपण का उचलत आहोत याचं कारण दिलं होतं. मनोरंजनसृष्टीत काम करणाऱ्या मजदूर युनियन्सचे पदाधिकारी राकेश मौर्य आपल्याला पैशावरून वारंवार धमकावत असल्याचं कारण देत आपल्या समोर आता काहीच पर्याय उरला नसल्याने आपण आत्महत्या करत असल्याचं त्यांनी सांगितलं आहे. या व्हिडिओमुळे मराठी मनोरंजनसृष्टीत खळबळ उडाली होती. त्यादिवसापासून राकेश मौर्य फरार होता. 

21:44 PM (IST)  •  16 Jul 2021

शरद पवार आणि संरक्षण मंत्री राजनाथ सिंह यांच्या भेटीत चीनच्या मुद्द्यावर महत्त्वपूर्ण चर्चा

शरद पवार आणि संरक्षण मंत्री राजनाथ सिंह यांच्या भेटीत चीनच्या मुद्द्यावर महत्त्वपूर्ण चर्चा. चीन सीमेच्या सद्यस्थितीबाबत सरकारने शरद पवार आणि ए के अँटोनी या दोन संरक्षण मंत्र्यांना विश्वासात घेऊन दिली माहिती. या बैठकीला देशाचे सीडीएस बिपीन रावत, लष्कर प्रमुख मनोज नरवणे हेदेखील उपस्थित होते. चीन वादाची इत्यंभूत माहिती प्रेझेन्टेशन द्वारे या दोन माजी संरक्षण मंत्र्यांना देण्यात आली. संसदेचे अधिवेशन सुरु होण्याआधी या मुद्द्यावर विरोधकांना शांत करण्याची सरकारची रणनीती.

21:24 PM (IST)  •  16 Jul 2021

आषाढीसाठी आलेल्या 1600 पोलीस कर्मचाऱ्यांची कोरोना चाचणीत केवळ चारजण पॉझिटिव्ह

आषाढीसाठी आलेल्या 1600 पोलीस कर्मचाऱ्यांची कोरोना चाचणीत केवळ चारजण पॉझिटिव्ह. त्याना तात्काळ विलगिकरण ठेवण्यात आले आहे. उद्या होणार 1200 पोलिसांची तपासणी.

21:14 PM (IST)  •  16 Jul 2021

कुख्यात गुंड गणेश रासकरची गोळी घालून हत्या, पूर्व वैमनस्यातून हत्या झाल्याचा पोलिसंचा संशय

कुख्यात गुंड गणेश रासकरची गोळी घालून हत्या करण्यात आली. पुरंदर तालुक्यातील नीरा गावात संध्याकाळी 7 च्या दरम्यान गोळी झाडून हत्या करण्यात आली होती. पूर्व वैमनस्यातून हत्या झाल्याचा पोलिसंचा संशय आहे. गणेश रासकरवर जुने 5 ते 6 गंभीर गुन्हे असल्याची पोलिसांनी माहिती दिली आहे. गणेश रासकरवर निरेतील एसटी स्टँडजवळ  2 गोळ्या झाडल्या आहेत. उपचारासाठी दवाखान्यात दाखल करण्याआधीच गणेश रासकरचा मृत्यू झाला.

20:04 PM (IST)  •  16 Jul 2021

पुणे जिल्ह्यातील पर्यटन स्थळांवर उद्यापासून जमावबंदी

पुणे जिल्ह्यातील पर्यटन स्थळांवर उद्यापासून जमावबंदी लागू केली जाणार आहे. पर्यटनबंदी असताना ही पर्यटक पर्यटनस्थळी मोठी गर्दी करता आहेत. म्हणून पुणे जिल्हाधिकाऱ्यांनी जमावबंदीचे आदेश दिलेत. मावळ, मुळशी, हवेली, आंबेगाव, जुन्नर, भोर आणि वेल्हा या तालुक्यासाठी हा आदेश लागू असेल.

19:02 PM (IST)  •  16 Jul 2021

मनसे सरचिटणीस आदित्य शिरोडकर यांचा शिवसेनेत प्रवेश, मुख्यमंत्री उद्धव ठाकरेंच्या उपस्थित केला पक्ष प्रवेश

मनसे विद्यार्थी सेनेचे अध्यक्ष व मनसे सरचिटणीस आदित्य शिरोडकर यांनी आज शिवसेना पक्षप्रमुख मुख्यमंत्री उद्धव  ठाकरे यांच्या हस्ते शिवबंधन बांधून शिवसेनेत जाहीर प्रवेश केला.