Breaking News LIVE : कोकण, मध्य महाराष्ट्र आणि मराठवाड्यात काही ठिकाणी पावसाची शक्यता

Breaking News LIVE Updates, 06 July 2021: दिवसभरातील ताज्या घडामोडी, महत्त्वाचे अपडेट्स, देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर महत्वाचे अपडेट लाईव्ह ब्लॉगमध्ये...

Background

भाजपचे निलंबित 12 आमदार राज्यपालांना भेटले, म्हणाले, महाविकास आघाडी सरकारनं लोकशाहीचा गळा घोटला!

मुंबई :  विधिमंडळाच्या दोन दिवसांच्या पावसाळी अधिवेशनाच्या (Maharashtra Assembly Session)पहिल्याच दिवशी सभागृहात जोरदार राडा पाहायला मिळाला. अधिवेशनात तालिका अध्यक्षांना धक्काबुक्की प्रकरणी भाजपच्या 12 आमदारांना (BJP MLA suspended) निलंबित करण्यात आलं आहे. गैरवर्तन करणाऱ्या आमदारांचं एक वर्षासाठी निलंबन करण्यात आलं आहे. अभिमन्यू पवार, आशिष शेलार, अतुल भातखळकर, जयकुमार रावल, राम सातपुते, गिरीश महाजन, संजय कुटे, नारायण कुचे, पराग आळवणी, हरिश पिंपळे, नारायण कुचे, कीर्तिकुमार भांगडिया यांचं निलंबन करण्यात आलं आहे. 

या निलंबित 12 आमदारांनी यानंतर राज्यपालांची भेट घेतली. त्यांनी यासंदर्भात राज्यपालांना एक निवेदनही दिलं आहे.  ठाकरे सरकारच्या या दडपशाही निर्णयाविरोधात दाद मागण्यासाठी  राज्यपाल भगतसिंह कोश्यारी यांची भेट घेतली असल्याचं आमदारांनी सांगितलं. आम्हाला बोलू द्या अशी मागणी केली असताना भाजप आमदारांवर शिविगाळ केल्याचा खोटा ठपका ठेवत निलंबित केलं असल्याचं निवेदनात म्हटलं आहे. भाजपच्या आमदारांनी अशा प्रकारची शिविगाळ केलेली नाही. तरीही लोकशाहीच्या प्रथा, परंपरा गुंडाळून लोकशाहीचा गळा घोटून महाविकास आघाडीकडून सभागृहाचे कामकाज चालवले जात आहे, असं निवेदनात म्हटलं आहे. आमच्यावर केलेले आरोप आम्हाला अमान्य असून उलट महाविकास आघाडीच्या सदस्यांनीच आमच्यावर हातापाई केली असल्याचंही यात म्हटलं आहे. 

राज्यात सोमवारी 13027 रुग्णांना डिस्चार्ज, 6740 रुग्णांची भर; पाच जिल्ह्यात रुग्णसंख्या शुन्यावर

मुंबई : कोरोनाच्या कालच्या आकडेवाडीमुळे काहीशी चिंता वाढली होती. कारण राज्यात काल 3378 रुग्ण बरे झाले होते, तर 9336 रुग्णांची भर पडली होती. मात्र आज राज्यातील कोरोनाची आकडेवारी काहीशी दिलासादायक आहे. आज राज्यात 6740 नव्या कोरोना बाधित रुग्णांची नोंद झाली आहे. तर 13 हजार 27 रुग्ण कोरोनामुक्त झाले आहे. राज्यात आतापर्यंत 58 लाख 61 हजार 720 रुग्णांनी कोरोनावर मात केली आहे. त्यामुळे राज्यातील रुग्ण बरे होण्याचे प्रमाण 96.02 टक्के आहे. 

राज्यात आज 51 रुग्णांच्या मृत्यूची नोंद झाली आहे. त्यामुळे राज्याचा मृत्यूदर 2.01 टक्के झाला आहे. तब्बल 48 महापालिक क्षेत्र आणि जिल्ह्यांमध्ये आज एकही मृत्यूची नोंद झालेली नाही. राज्यात सध्या 1 लाख 16 हजार 827 रुग्णांवर उपचार सुरु आहेत. यवतमाळ (57), हिंगोली (84), गोंदिया (88) या तीन जिल्ह्यात अॅक्टिव्ह रुग्णसंख्या 100 च्या खाली आहे. पुणे जिल्ह्यात सध्या सर्वात जास्त 16,960 अॅक्टिव्ह रुग्ण आहेत. 

दिल्लीला भूकंपाचे धक्के, 3.7 रिश्टर स्केलची तीव्रता

Earthquake in Delhi: दिल्ली-एनसीआरमध्ये भूकंपाचे सौम्य धक्के (Delhi NCR Earthquake Latest update) बसल्याचं नागरिकांनी सांगितलं आहे. 3.7 रिश्टर स्केलची तीव्रतेचे हे धक्के असल्याचं सांगण्यात आलं आहे. भूकंपाचं केंद्र  हरियाणा मधील झज्जर मध्ये असल्याचं सांगण्यात आलं आहे. रात्री 10:36 वाजताच्या सुमारास हे भूकंपाचे धक्के जाणवल्याचं काही नागरिकांनी सांगितलं. भूकंपाची खोली 5 किलोमीटरपर्यंत असल्याचं सांगण्यात येत आहे. 

दरम्यान दिल्लीत भूकंपाचे धक्के बसल्यानंतर सोशल मीडियावर लोकं एकमेकांना भूकंपाबद्दल विचारणा करु लागली होती. यात अनेकांनी भूकंपाचे धक्के जाणवल्याचं सांगितलं.  

23:35 PM (IST)  •  06 Jul 2021

कोकण, मध्य महाराष्ट्र आणि मराठवाड्यात काही ठिकाणी पावसाची शक्यता

कोकण, मध्य महाराष्ट्र आणि मराठवाड्यात काही ठिकाणी पावसाची शक्यता हवामान विभागाकडून वर्तवण्यात आली आहे.  सिंधुदुर्ग, रत्नागिरीत पुढील तीन तासात काही ठिकाणी मध्यम ते मुसळधार पावसाचा अंदाज. तर मध्य महाराष्ट्रातील नाशिक, कोल्हापूर, सातारा आणि सांगलीत विजांच्या कडकटाडासह काही ठिकाणी मध्यम ते मुसळधार पावसाची शक्यता वर्तवण्यात आली आहे. मराठवाड्यातील औरंगाबाद आणि नांदेडमध्ये देखील वादळी वाऱ्यांसह पावसाचा अंदाज, विजांच्या गडगडाटासह काही ठिकाणी हलका ते मध्यम स्वरुपाच्या पावसाची शक्यता आहे. 

19:32 PM (IST)  •  06 Jul 2021

लसींचा साठा प्राप्त न झाल्याने कल्याण-डोंबिवलीमधील लसीकरण उद्या बंद राहणार

कल्याण : कल्याण-डोंबिवलीमधील लसीकरण उद्या बंद राहणार, लसींचा साठा प्राप्त न झाल्याने महापालिकेची 25 लसीकरण केंद्र बंद राहणार, गेल्या 10 दिवसात अवघ्या 3 दिवस लसीकरण सुरू होतं, उद्या पुन्हा लसीकरण बंद राहणार

17:14 PM (IST)  •  06 Jul 2021

आषाढी यात्रा कालावधीतील संचारबंदी ही 19 ते 21 जुलै करण्याची लेखी मागणी

आषाढी यात्रा कालावधीतील संचारबंदी ही 19 ते 21 जुलै करण्याची लेखी मागणी आमदार प्रशांत परिचारक आणि आमदार समाधान अवताडे यांनी उपमख्यमंत्री अजित पवार यांचेकडे केली. शासनाने 17 ते 24 जुलै पर्यंत जाहीर झालेली संचारबंदी व्यापारी आणि नागरिकाना त्रासदायक आणि अन्यायकारक असल्याने केली मागणी.

16:06 PM (IST)  •  06 Jul 2021

माजी मंत्री काँग्रेसचे कृपाशंकर सिंह यांचा उद्या भाजप प्रवेश

माजी मंत्री, काँग्रेसचे कृपाशंकर सिंह यांचा उद्या भाजप प्रवेश. मुंबईत उद्या सकाळी चंद्रकांत पाटील यांच्या उपस्थितीत अधिकृत प्रवेश होणार आहे. उद्या दुपारी 12 वा. मुंबई प्रदेश कार्यालयात प्रवेशाचा कार्यक्रम. कृपाशंकर सिंग माजी काँग्रेस नेते आणि मंत्री आहे. बेहिशेबी मालमत्ता प्रकरणात कृपाशंकर एसीबीच्या रडारवर होते. उत्तर भारतीयांमध्ये कृपाशंकर यांचं मोठं प्रस्थ होते. मुंबई पालिकेच्या तोंडावर कृपाशंकर यांच्या प्रवेशामुळे भाजपला फायदा झाला आहे, 

14:07 PM (IST)  •  06 Jul 2021

शिवसेना आमदार प्रताप सरनाईक आणि कुटुंबियांना उच्च न्यायालयाचा दिलासा, 28 जुलैपर्यंत कोणतीही कारवाई न करण्याचे ईडीला आदेश

मुंबई : शिवसेना आमदार प्रताप सरनाईक आणि कुटुंबियांना उच्च न्यायालयानं दिलासा दिला आहे. 28 जुलैपर्यंत कोणतीही कारवाई न करण्याचे आदेश ईडीला उच्च न्यायालयानं दिले आहेत.