Breaking News LIVE | हिंगणघाटच्या निवासी शाळेतील 75 विद्यार्थी कोरोनाबाधित

Breaking News LIVE Updates, 11 February 2021: दिवसभरातील ताज्या घडामोडी, महत्त्वाचे अपडेट्स या लाईव्ह ब्लॉगमध्ये आपल्याला मिळतील. देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर महत्वाचे अपडेट लाईव्ह ब्लॉगमध्ये...

Background

18 फेब्रुवारी रोजी देशभरात रेलरोको
तीन नव्या कृषी कायद्यांविरोधात आंदोलन करणाऱ्या शेतकरी संघटनांनी आंदोलन आणखी तीव्र करण्याची घोषणा केली आहे. दिल्लीच्या सीमांवर जवळपास 80 दिवसांपासून शेतकरी आंदोलनाचं नेतृत्त्व करणाऱ्या संयुक्त किसान मोर्चाने (एसकेएम) 18 फेब्रुवारी रोजी देशभरात रेलरोको अभियान राबवण्याची घोषणा केली. संयुक्त किसान मोर्चाने म्हटलं की, ''18 फेब्रुवारी रोजी दुपारी 12 वाजल्यापासून चार वाजेपर्यंत संपूर्ण देशभरात रेलरोको अभियान राबवलं जाईल. तसंच 12 फेब्रुवारीपासून राजस्थानचे सर्व टोलनाके मोफत करणार असल्याचंही संयुक्त किसान मोर्चाने म्हटलं.

 

आठ महिन्याच्या मुलीची विक्री करणाऱ्या टोळीचा भांडाफोड
विरार पोलिसांनी एका 8 महिन्याच्या मुलीला 2 लाखांत विकण्यासाठी आलेल्या चार आरोपींना अटक करून मुलीची सुखरूप सुटका केली आहे. यात दोन महिला आणि दोन पुरुष आहेत. यातील एक इसम हा डॉक्टर असल्याची माहिती पोलिसांनी दिलीच आहे. या चौघांवर पोलिसांनी गुन्हा दाखल केला आहे. त्या चौघांना 16 फेब्रुवारी पर्यंत यांना पोलीस कोठडी सुनावण्यात आली आहे

 

समुद्रात आलेल्या शक्तिशाली भूकंपानं हादरलं न्यूझीलंड
गेल्या काही दिवसांपासून भारतामध्ये सातत्यानं भूकंपाचे हादरे जाणवले. आता न्यूझीलंडसमवेत तीन राष्ट्रांमध्ये समुद्रात आलेल्या भूकंपामुळं भीतीचं वातावरण निर्माण झालं आहे. पॅसिफिक महासागराच्या दक्षिण भागात बुधवारी भूकंपाचे जबर धक्के जाणवले. न्यूझीलंडसह वानुअतू, न्यू कॅलेडोनिया या भागांनाही भूकंपानं हादरा दिला. बुधवारी सायंकाळच्या सुमारास न्यूझीलंडच्या उत्तर भागात भूकंपाचे जबर हाजरे जाणवले. येथील बहुतांश भागांमध्ये त्सुनामीचा इशाराही देण्यात आला आहे. अमेरिकेच्या भूगर्भशास्त्र संस्थेच्या माहितीनुसार लॉयल्टी आयलंडपासून दक्षिण पूर्वेकडे 10 किलोमीटर अंतरावर या भूकंपाचा केंद्रबिंदू होता. या भूकंपाची तीव्रता 7.7 रिक्टर स्केल इतकी होती.

23:32 PM (IST)  •  11 Feb 2021

वर्धा : हिंगणघाटच्या निवासी शाळेतील 75 विद्यार्थी कोरोनाबाधित झाले आहेत. काल 30 आणि आज 45 विद्यार्थ्यांची अँटिजेन चाचणी पॉझिटिव्ह आली आहे. एकूण 247 विद्यार्थ्यांची चाचणी करण्यात आली असून त्यातील 75 विद्यार्थी पॉझिटिव्ह आले आहेत. 1 विद्यार्थी आणि 9 कर्मचाऱ्यांच्या आरटीपीसीआर टेस्टचा अहवाल अद्याप प्रतिक्षेत आहे. तर 30 कर्मचाऱ्यांची टेस्ट निगेटिव्ह आलेत. विद्यार्थ्यांना याच शाळेच्या वसतिगृहात विलगीकरणात ठेवण्यात आले असून त्यांच्यावर उपचार सुरु आहे. यातील काहींना सौम्य लक्षण होती तर काहींना लक्षणदेखील नव्हती.

22:16 PM (IST)  •  11 Feb 2021

इयत्ता दहावी बोर्डाच्या परीक्षा देणाऱ्या विद्यार्थ्यांना शास्त्रीय कला , चित्रकला व लोककला प्रस्ताव सादर करण्याबबत बोर्डाने मुदत वाढ दिली आहे. दरवर्षीप्रमाणे या वर्षीसुद्धा कलांमध्ये विशेष प्राविण्य मिळवण्याऱ्या व लोककला प्रकारात सहभागी होणाऱ्या विद्यार्थ्यांना सवलतीचे अतिरिक्त गुण देण्यात येणार आहे.

20:07 PM (IST)  •  11 Feb 2021

गडचिरोली : 2 जहाल नक्षलवाद्यांना अटक करण्यात गडचिरोली पोलिसांना यश मिळालं आहे. मंगलू कुडीयामी आणि मदनय्या तलांडी अशी त्यांची नावे आहेत. दोघेही छत्तीसगड राज्यातील सेंड्रा दलमचे सक्रिय नक्षली आहेत. गडचिरोली जिल्ह्यातील दामरंचा पो. स्टे. हद्दीत कुर्ताघाट येथे झालेल्या चकमकीत दोघांचा होता सक्रिय सहभाग होता. यातील मंगलू 2018 पासून तर मदनय्या 2005 पासून नक्षली कारवाईंमध्ये सक्रिय आहेत.

20:43 PM (IST)  •  11 Feb 2021

नांदेड शहरातील मालेगाव रोडवरील सरपंचनगर इथे पती-पत्नीच्या नात्याला काळिमा फासणारी घटना वर्षभरापूर्वी घडली होती. या घटनेत मयत शरद कुऱ्हाडेचा मृतदेह त्याच्या घरात आढळला होता. त्यावेळी मयताच्या नातेवाईकांच्या जबाबावरुन आकस्मिक मृत्यूची नोंद करण्यात आली होती. त्यानंतर वैद्यकीय अहवाल आणि पोलीस तपासाअंती हा मृत्यू आकस्मिक नसून त्याचा खून झाल्याचं एका वर्षानंतर निष्पन्न झालं आहे. या घटनेत मयत शरद कुऱ्हाडेला त्याची पत्नी अश्विनी कुऱ्हाडे आणि तिच्या मुलाने इतर सहा साथीदारांच्या मदतीने एक लाख रुपयांची सुपारी देऊन जीवे मारल्याचे कळतं. त्यानुसार भाग्यनगर पोलिसात भादंवी 302 नुसार आठ जणांवर खुनाचा गुन्हा दाखल करण्यात आला आहे.

22:09 PM (IST)  •  11 Feb 2021

शेतीचा वाद जर विकोपाला गेला तर अनर्थ अटळ असतो. लातूर जिल्ह्यातील हेर येथेही अशीच घटना घडली आहे. शेतीच्या वादातून भावाने भावाचा खून केला आहे. उपचारासाठी सासऱ्याला नेणाऱ्या जावायासही जबर मारहाण करण्यात आली. यात जावयाचेही प्राण गेले आहे.