पाकिस्तानमधील युवकावर नागपुरात गुन्हा दाखल; कारण...

तो म्हणाला, 'आप मुझे बहोत अच्छी लगी, मै आपसे बहुत कुछ बात करना चाहता हू, इसमे हम दोनो का फायदा है. आप हमे सपोर्ट करोगे क्या?' यावर महिलेने स्पष्ट नकार दिल्यावरही तो तिला त्रास देत होता.

file photo

Nagpur News : सोशल मीडियावर आपल्या पोस्ट, रील्सचे रिच, युट्यूब चॅनलचे फॉलोअर्स वाढवण्यासाठी तरुणांकडून आपल्या मित्रांचा व्हॉट्सअॅप ग्रुप तयार करण्यात येतो. मात्र त्यात ते एकमेकांना ओळखतात की नाही किंवा त्यांना ग्रुपमध्ये अॅड व्हायचे आहे की नाही याची परवानगी न घेता त्यांना अॅड करतात. मात्र अशाच एका युट्यूबरच्या (Youtuber) ग्रुपमध्ये जोडलं गेल्याचा मनस्ताप एका महिलेला सहन करावा लागला. तिला सोशल मीडियावर (Social Media) त्रास देणाऱ्या पाकिस्तानच्या कराची येथील युवकावर नागपुरात गुन्हा नोंदवण्यात आला आहे.

नागपुरातील स्थानिक युट्यूब चॅनेल चालवणाऱ्या मोहम्मद शाहिद नावाच्या व्यक्तीने व्हॉट्सअॅप  ग्रुप तयार केला. यात 234 जण अॅड केलं. यात कामठी येथील महिलेचा समावेश होता. त्या ग्रुपवर एका अनोळखी व्यक्तीने ग्रुपवरील महिलेशी फ्रेण्डशीप करण्याचा प्रयत्न केला. परंतु, महिलेकडून नकार देण्यात आला. अनोळखी व्यक्तीने व्हॉट्सअॅप कॉल केला आणि महिलेला लाजिरवाणे आणि लज्जास्पद वाटेल अशा शब्दांत बोलला. यानंतर महिलेने आपली तक्रार जुने पोलीस ठाण्यात 21 नोव्हेंबर रोजी दाखल केली. परंतु पोलिसांनी अधिक चौकशी न केल्याने फिर्यादी महिलेने 23 नोव्हेंबरला पोलीस आयुक्तांशी भेटून सायबर पोलिसांत तक्रार केली. अश्लील भाषेत मोबाईलवर बोलणारा युवक पाकिस्तानातील कराची येथील असून त्याचं नाव इमरान असल्याचे एफआयआरमध्ये नमूद आहे. आता या अज्ञात व्यक्तीला कसे शोधून काढतील, याची प्रतीक्षा आहे. सायबर पोलिसांनी गुन्हा दाखल केला असून पुढील तपास सुरु आहे.

पीडित फिर्यादीने बातमीदारांशी बोलताना सांगितले की महिलेच्या परिचितांमध्ये त्या युट्यूब प्रतिनिधीशिवाय दुसरं कुणीही ओळखीचं नव्हतं. तसेच परवानगी न घेता ग्रुपमध्ये अॅड करण्यात आलं असल्याचा आरोप या महिलेने केला आहे.

असे आहे प्रकरण...

पाकिस्तानमधील कराची (Karachi, Pakistan) येथील रहिवासी इमरान नावाच्या युवकाने आपल्या मोबाईल (92-3093049221) वरुन या महिलेच्या व्हॉट्सअॅपवर 21 नोव्हेंबरला दुपारी एकच्या सुमारास मेसेज पाठवला. यावर महिलेने कुठलेही प्रत्युत्तर न दिल्याने त्याने सव्वा पाच वाजता दोन वेळा व्हॉट्सअॅप कॉल केला. परंतु, कुठलेही प्रत्युत्तर न दिल्याने सायंकाळी साडेसात दरम्यान नमूद अनोळखी मोबाईलधारकास महिलेने विचारपूस केली असता त्याने माझे नाव इमरान असून मी पाकिस्तान कराचीचा रहिवासी आहे, असे सांगून त्या व्हॉट्सअप ग्रुपचा स्क्रीनशॉट पाठवला. तसेच त्या महिलेच्या व्हॉट्सअॅप डीपीची फोटो कॉपी करुन 'आप मुझे बहोत अच्छी लगी, मैं आपसे बहुत कुछ बात करना चाहता हूं, इसमे हम दोनों का फायदा है. आप हमें सपोर्ट करोगे क्या?' असे व्हॉट्सअॅप संभाषण झाल्यानंतर महिलेने स्पष्ट नकार देत यासंदर्भात त्वरित जुनी कामठी पोलीस ठाण्याचे वरिष्ठ पोलीस निरीक्षक राहुल शिरे यांना माहिती दिली. पोलीस निरीक्षक राहुल शिरे यांनी पाकिस्तानचा युवक असूनही माझ्याबाबत घडलेले प्रकरण गांभीर्याने घेतले नसल्याने मला पोलीस आयुक्तांकडे तक्रार करावी लागली असल्याचे महिलेने सांगितले.

सायबर पोलिसांकडून तक्रार घेण्यास टाळाटाळ

नागपुरातील सायबर पोलीस ठाण्यात (Cyber Police Station) दररोज मोठ्या संख्येत नागरिक सायबर फसवणुकीच्या तक्रारी, सोशल मीडिया प्रोफाईल हॅक झाले, कोणी तरी बनावट प्रोफाईल तयार केल्याचा अनेक तक्रारी घेऊन येतात. मात्र याठिकाणी पोलिसांकडून विविध कारणे देत तक्रार नोंदवून घेण्यास टाळाटाळ करण्यात येते. याशिवाय आर्थिक फसवणुकीसारख्या गंभीर प्रकरणातही आता लोकांचे लाखो रुपये गेले आहे तेही परत मिळाले नाहीच. तुमचे तर एवढेच आहे सांगून तक्रारदाराला आल्यापावली परत पाठवण्याच्या अनेक तक्रारी नागरिक दररोज करत असतात.

ही बातमी देखील वाचा