Kolhapur News : लेकाने गळ्याला गळफास लावताच वडिलांचा सुद्धा अवघ्या काही तासांमध्ये मानसिक धक्क्याने मृत्यू
कोल्हापूर जिल्ह्यात धक्कादायक आत्महत्यांच्या घटनांची मालिका सुरुच आहे. हातकणंगले तालुक्यातील पट्टणकोडोलीमध्ये तरुणाने आत्महत्या केल्यानंतर वडिलांचा सुद्धा अवघ्या काही तासांमध्ये मृत्यू झाला.
Kolhapur News : कोल्हापूर जिल्ह्यात धक्कादायक आत्महत्यांच्या घटनांची मालिका सुरुच आहे. जिल्ह्यातील हातकणंगले तालुक्यातील पट्टणकोडोलीमध्ये तरुणाने आत्महत्या केल्यानंतर वडिलांचा सुद्धा अवघ्या काही तासांमध्ये मृत्यू झाला. विजय आनंदा परीट या 32 वर्षीय युवकाने सोमवारी संध्याकाळी राहत्या घरामध्ये गळफास घेत आत्महत्या केली. त्याच्या मागे पत्नी, चार वर्षांची मुलगी, वडील, भाऊ, भावजई असा परिवार आहे.
वयाची पस्तिशी सुद्धा पार न केलेल्या मुलाने घेतलेल्या टोकाच्या निर्णयाने वडिल आनंदा परीट यांना प्रचंड मानसिक धक्का बसला. मुलाने केलेल्या आत्महत्येनंतर घरात सन्नाटा पसरला असतानाच मंगळवारी दुपारी वडिल आनंदा खंडू परीट (वय 62) यांचे प्रचंड मानसिक धक्का बसल्याने हृदयविकाराच्या झटक्याने निधन झाले. यामुळे लेकाची राख थंड होण्यापूर्वीच वडिलांवरही अंत्यसंस्कार करण्याची वेळ कुटुंबीयांवर आली. मुलाच्या आत्महत्येपाठोपाठ वडीलांचा मृत्यू झाल्याने परिसरात हळहळ व्यक्त होत आहे. विजयच्या कपडे इस्त्रीच्या व्यवसायात वडील आनंदा परीट हे त्याला मदत करीत होते.
विजयने राहत्या घरात नायलॉनच्या दोरीने गळफास घेऊन आत्महत्या केली. पट्टणकोडोलीमद्ये नवीन बसस्थानक परिसरात त्याच्या घराचे बांधकाम सुरु आहे. त्यामुळे काही महिन्यांपासून घरचे सर्वजण इंगळी रोडवर भाड्याच्या घरात रहायला गेले होते. बांधकामाच्या ठिकाणी कोणी नसल्याचे पाहून तेथीलच जुन्या खोलीत त्याने आत्महत्या केली.
पत्नीच्या आकस्मिक मृत्यूनंतर पतीने तीनच महिन्यात गळफास घेत जीवनयात्रा संपवली
दरम्यान, अवघ्या तीन महिन्यांपूर्वी पत्नीचा हृदयविकाराच्या झटक्याने आकस्मिक मृत्यू झाल्यानंतर नैराश्यात असलेल्या पतीने गळफास घेत जीवनयात्रा संपवल्याची धक्कादायक घटना कागल तालुक्यता घडली होती. संदीप भगवान बेलवळे (वय 39, रा. बेलवळे खूर्द, सध्या रा. मोहिते मळा, देवकर पाणंद, कोल्हापूर) असे त्यांचे नाव आहे. आईच्या आकस्मिक मृत्यूने आणि वडिलांनी घेतलेल्या टोकाच्या निर्णयाने त्यांचा एकुलता एक मुलगा पोरका झाला आहे. पत्नीच्या निधनानंतर निराशेच्या गर्तेत गेलेल्या संदीप यांना मानसिक आधार देण्यासाठी त्यांच्या मातोश्री त्यांच्यासोबत कोल्हापूर शहरात राहत होत्या. त्या सातत्याने समजून सांगण्याचा प्रयत्न करत होत्या. मात्र, तरीही त्यांनी टोकाचा निर्णय घेतला.
17 वर्षांच्या संसाराचा धक्कादायक शेवट
संदीप आणि त्यांची पत्नी अनुराधा यांचा 2006 मध्ये विवाह झाला होता. शेती तसेच व्यवसाय त्यांचे कुटुंब स्थिरस्थावर झाले होते. त्यांना एकुलता एक 14 वर्षांचा मुलगा आहे. सर्व काही आनंदात सुरु असतानाच एप्रिल 2023 मध्ये संदीप यांच्या पत्नी अनुराधा यांचा हृदयविकाराच्या झटक्याने मृत्यू झाला. त्यानंतर संदीप यांनी पत्नीच्या विरहाने नैराश्याने ग्रासले होते.
इतर महत्वाच्या बातम्या
महत्त्वाच्या बातम्या
