Home Loan : आरबीआयच्या पतधोरणविषयक समितीची लवकरच बैठक, रेपो रेट कमी करण्याची शक्यता, गृहकर्जाचा हप्ता कमी होणार?
Home Loan: रिझर्व्ह बँक ऑफ इंडियाच्या पतधोरण विषयक समितीची बैठक 3 डिसेंबरपासून सुरु होणार आहे. या बैठकीनंतर 5 डिसेंबरला रेपो रेट जाहीर केला जाईल.
नवी दिल्ली : रिझर्व्ह बँक ऑफ इंडियाच्या पतधोरण विषयक समितीची बैठक 3 डिसेंबर ते 5 डिसेंबर या दरम्यान पार पडणार आहे. महागाईचा दबाव कमी असल्यानं आरबीआयकडून 5 डिसेंबरला रेपो रेटमध्ये 25 बेसिस पॉईंट कपात करण्याची शक्यता आहे. रेपो रेटमध्ये कपात केल्यास गृह कर्ज आणि वाहन कर्जाचे व्याज दर कमी होतील. यामुळं गृहकर्ज आणि वाहन कर्ज असलेल्यांचा ईएमआय कमी होईल.
RBI MPC Meeting : आरबीआयची पतधोरण विषयक समिती
आरबीआयच्या पतधोरण विषयक समितीची बैठक 3 डिसेंबरपासून सुरु होईल. या बैठकीत रेपो रेट आणि इतर गोष्टींवर चर्चा करुन निर्णय घेतले जातील. रेपो रेट संदर्भातील निर्णय 5 डिसेंबरला जाहीर केले जातील. रिझर्व्ह बँक ऑफ इंडियाचे गव्हर्नर संजय म्हलोत्रा सकाळी 10 वाजता रेपो रेट जाहीर करतील.
रिझर्व्ह बँक ऑफ इंडियानं फेब्रुवारी महिन्यात रेपो रेटमध्ये कपात केली होती. त्यानंतर पुन्हा रेपो रेट कमी करण्यात आला. 2025 मध्ये रेपो रेट 6.5 टक्क्यांवरुन 5.5 टक्क्यांवर आणला आहे. आरबीआय डिसेंबरच्या पतधोरण विषयक समितीच्या बैठकीनंतर 25 बेसिस पॉईंटची कपात करु शकते. त्यामुळं रेपो रेट 5.25 टक्क्यांवर येऊ शकतो.
सीपीआय वर आधारित किरकोळ महागाई गेल्या दोन महिन्यांपासून सरकारनं निश्चित केलेल्या मर्यादेपेक्षा 2 टक्के खाली आहे. महागाईचा दबाव कमी झाल्यानं रेपो रेटमध्ये कपात आरबीआयकडून जाहीर केली जाऊ शकते. दुसऱ्या तिमाहीतील जीडीपीचा विकास दर 8.2 टक्के आहे. त्यामुळं आरबीआयकडून रेपो रेटमध्ये कपात केली जाण्याची शक्यता आहे.
आरबीआयनं रेपो रेटमध्ये कपात केल्यास गृहकर्ज आणि वाहन कर्जाचा व्याज दर देखील कमी होऊ शकतो. आरबीआयकडून बँकांना ज्या व्याज दरानं कर्ज दिलं जातं त्याला रेपो रेट म्हणतात. आरबीआयनं रेपो रेट कमी केल्यानंतर बँका व्याज दरात कपात करतात. त्यामुळं गृह कर्ज आणि वाहन कर्ज स्वस्त होऊ शकतं.
क्रिसिलचे मुख्य अर्थशास्त्रज्ञ धर्मकीर्ति जोशी यांनी महागाई कमी असणं, जीएसटी स्लॅबच्या दरातील कपात आणि इतर गोष्टींमुळं रेपो रेटमध्ये कपात होऊ शकते असा अंदाज वर्तवला आहे. एचडीएफसी बँकेच्या रिपोर्टनुसार देखील रेपो रेटमध्ये 25 बेसिस पॉईंटची कपात केली जाण्याचा अंदाज वर्तवण्यात आला आहे.
रिझर्व्ह बँक ऑफ इंडियाचं गव्हर्नर पद संजय म्हलोत्रा यांनी स्वीकारल्यानंतर पहिल्यांदा फेब्रुवारी 2025 मध्ये रेपो रेट 25 बेसिस पॉईंटनं कमी करुन 6.25 टक्क्यांवर आणला होता. त्यानंतर एप्रिलमध्ये रेपो रेटमध्ये 25 बेसिस पॉईंटची कपात करत तो 6.00 टक्क्यांवर आणला. यानंतर पुन्हा एकदा जून 2025 मध्ये रेपो रेटमध्ये 50 बेसिस पॉईंटची कपात करण्यात आली आणि रेपो रेट 5.50 टक्क्यांवर आणला. ऑगस्टपासून रेपो रेटमध्ये बदल करण्यात आलेले नाहीत.
महत्त्वाच्या बातम्या
