एक्स्प्लोर

Kolhapur Loksabha : कोल्हापूर लोकसभेला काँग्रेसने 25 वर्षांनी झेंडा फडकवला, पण हक्काच्या दोन विधानसभा मतदारसंघात मताधिक्य घटले!

कोल्हापूर लोकसभेला काँग्रेसची ताकद जास्त असल्याने जागा सतेज पाटील यांनी आपल्याकडे खेचली होती. आता विजयही खेचून आणल्याने त्यांच्या इलेक्शन मॅनेजमेंटवर पुन्हा एकदा शिक्कामोर्तब झालं आहे.

By : परशराम पाटील, एबीपी माझा, कोल्हापूर | Updated at : 05 Jun 2024 05:02 PM (IST)

Kolhapur Loksabha

कोल्हापूर : फक्त करवीरनगरीच नव्हे, तर अवघ्या देशाचं लक्ष लागून राहिलेल्या कोल्हापूर लोकसभा मतदारसंघात काँग्रेस उमेदवार आणि करवीर संस्थानचे श्रीमंत छत्रपती शाहू महाराज यांनी 1 लाख 54 हजार 964 मतांनी विजय मिळवला. शाहू महाराज यांच्या विजयाने कोल्हापूरचा शाहू-फुले-आंबेडकर पुरोगामी चळवळीचा बुलंद आवाज दिल्लीमध्ये आणखी बुलंद होणार आहे. विरोधी संजय मंडलिक यांना 5 लाख 99 हजार 558 इतके मताधिक्य मिळाले. पोस्टल मतदानापसून ते शेवटच्या फेरीपर्यंत शाहू महाराज यांनी घेतलेली आघाडी कायम राहिली. प्रचारातील एकसंधपणाही काँग्रेससाठी निर्णायक ठरला.

कोल्हापूर लोकसभेला काँग्रेस खासदार निवडून आल्याने काँग्रेसचा 25 वर्षांपासूनचा दुष्काळ संपला आहे. 1998 नंतर प्रथमच काँग्रेसचा खासदार विजय मिळवला आहे. कोल्हापूर लोकसभेला काँग्रेसची ताकद जास्त असल्याने जागा सतेज पाटील यांनी आपल्याकडे खेचली होती. आता विजयही खेचून आणल्याने त्यांच्या इलेक्शन मॅनेजमेंटवर पुन्हा एकदा शिक्कामोर्तब झालं आहे. मात्र, कोल्हापूर दक्षिण आणि उत्तर या दोन मतदारसंघात घटलेलं मताधिक्य तसेच कागलमध्ये मुश्रीफ सोबत असूनही मंडलिकांना न मिळालेल्या मताधिक्याने विधानसभेला अनेकांची काळजी वाढली आहे.

सहापैकी पाच विधानसभा मतदारसंघात काँग्रेसला मताधिक्य

कोल्हापूर लोकसभेत कोल्हापूर दक्षिण, कोल्हापूर उत्तर, करवीर, राधानगरी-भुदरगड, कागल आणि चंदगड असे सहा विधानसभा मतदारसंघ येतात. महायुती असल्याने कागलमध्ये संजय मंडलिक, पालकमंत्री हसन मुश्रीफ आणि भाजप नेते समरजितसिंह घाटगे एकत्र होते. मात्र, तिन्ही नेते एकत्र असूनही संजय मंडलिक यांना अपेक्षित मताधिक्य न मिळाल्याने निवडणुकीत निर्माण झालेला भ्रमाचा भोपळा फुटला गेला आहे. 2019 मध्ये विधानसभा निवडणुकीत 1 लाख 17 हजारांवर मते मुश्रीफ यांना मिळाली होती. समरजित घाटगेंना 88 हजारांवर मते मिळाली होती. मात्र, कागलमधील मंडलिकांना मिळालेले मताधिक्य पाहता त्यांची मते गेली कोणीकडे असा प्रश्न उपस्थित होतो. संजय मंडलिकांना कागलमध्ये अवघ्या 13 हजार 858 मतांची आघाडी मिळाली आहे. अन्य पाच मतदारसंघात महाराज आघाडीवर आहेत.

कागलमध्ये विधानसभेची रंगत वाढली

कागलमध्ये अपेक्षित मताधिक्य न मिळाल्याने संजय मंडलिकांच्या दाव्यातील हवा निघाली आहे. मात्र, अपेक्षित मताधिक्य न मिळाल्याने मंत्री हसन मुश्रीफ आणि घाटगे यांचंही टेन्शन वाढलं आहे. संजयबाबा घाटगे यांनी महाराजांना साथ दिली होती. त्यामुळे कागलमधील त्यांनी त्यांची जबाबदारी पार पाडल्याचे महाराजांना मिळालेल्या मताधिक्यातून दिसून येते. विधानसभेला दोन घाटगे आणि मुश्रीफच असतील, अशी चिन्हे आहेत. त्यामुळे मुश्रीफ आणि घाटगेंना निश्चितच सोपा पेपर नाही.

कोल्हापूर दक्षिण आणि उत्तरमध्ये काठावर मताधिक्य

कोल्हापूर लोकसभेला आजघडीला कोल्हापूर दक्षिण, कोल्हापूर उत्तर, करवीर आणि विधानपरिषदेतील दोन आमदार असे पाच आमदार आहेत. स्वर्गीय आमदार पी. एन. पाटील यांनी करवीरमध्ये दिलेल्या मताधिक्याने महाराजांना विजय निश्चित झाल्याचे दिसून येते. मात्र, कोल्हापूर दक्षिण आणि उत्तरमध्ये शाहू महाराजांना अपेक्षित मताधिक्य मिळालेलं नाही. कोल्हापूर दक्षिणमधून अवघ्या 6 हजार 702 मतांची आघाडी शाहू महाराजांना मिळाली. कोल्हापूर उत्तरमध्ये 14 हजार 528 मतांची आघाडी मिळाली आहे. विशेष म्हणजे या दोन्ही मतदारसंघात विद्यमान काँग्रेस आमदार आहेत. दक्षिणमध्ये ऋतुराज पाटील, तर उत्तरमध्ये जयश्री जाधव आमदार आहेत. शिंदे गटाचे प्रतिनिधित्व करणाऱ्या राजेश क्षीरसागर यांनाही हा धोक्याचा इशारा आहे.

राधानगरीमध्येही महाराजांना लीड

राधानगरी आणि करवीमध्ये मिळालेल्या मताधिक्याने शिंदे गटाच्या आजी माजी आमदारांनाही संदेश दिला गेला आहे. प्रकाश आबिटकर शिंदे गटाचे विद्यमान आमदार आहेत. मात्र, राधानगरीतून 65 हजारांवर लीड मिळाले आहे. आबिटकर यांनी केलेली बंडखोरीचा अजूनही शिवसैनिकांमध्ये राग आहे. करवीरमध्ये मिळालेल्या मताधिक्याने चंद्रदीप नरके यांनाही उचित संदेश विधानसभेसाठी गेला आहे. त्यामुळे विधानसभेला तयारी करताना शिंदे गटाच्या आजी माजी आमदारांना मोठं आव्हान असणार आहे.
कोल्हापूर लोकसभा मतदार संघ