Jalna Rain Update : जालना जिल्ह्याला आज 'यलो अलर्ट'; विजेच्या कडकडाटासह मुसळधार पावसाची शक्यता

Jalna Rain Update: नैसर्गिक आपत्ती संदर्भात सर्व संबंधीत यंत्रणा आणि जनतेने खबरदारी घ्यावी, असे आव्हान प्रशासनाकडून करण्यात आले आहे.

Jalna Rain Update

Jalna Rain Update: मराठवाड्यासह (Marathwad) राज्यात पावसाचे (Rain) वातावरण तयार झाले असून, अनेक ठिकाणी मुसळधार पाऊस (Heavy Rain) कोसळतोय. दरम्यान जालना जिल्ह्यात देखील आज जोरदार पाऊस होण्याची शक्यता आहे. मुंबईच्या कुलाबा येथील प्रादेशिक हवामानशास्त्र केंद्राने दिलेल्या सूचनेनुसार जालना जिल्ह्यात आज (22 जुलै) रोजी यलो अलर्ट जारी केला आहे.  त्यामुळे या कालावधीमध्ये तुरळक ठिकाणी विजेच्या कडकडाटासह मुसळधार पावसाची शक्यता वर्तवली आहे. तसेच 23 ते 25 जुलै या कालावधीत हलका ते मध्यम स्वरुपाच्या पावसाची शक्यता वर्तवली आहे. त्यामुळे या नैसर्गिक आपत्ती संदर्भात सर्व संबंधित यंत्रणा आणि जनतेने खबरदारी घ्यावी, असे आव्हान प्रशासनाकडून करण्यात आले आहे.

जून महिना कोरडा गेल्यानंतर अखेर जुलै महिन्याच्या दुसऱ्या आठवड्यात पावसाला सुरुवात झाली. त्यातही जालना जिल्ह्यात अजूनही अपेक्षित असा दमदार पाऊस झालेला नाही. मागील आठवड्यात झालेल्या रिमझिम पावसामुळे पिकांना जीवनदान मिळाला आहे. पण अनेक प्रकल्पांनी तळ गाठले आहे. त्यामुळे जालना जिल्ह्यात जोरदार पावसाची अपेक्षा कायम आहे. अशातच हवामान विभागाने आज जालना जिल्ह्याला येलो अलर्ट जारी केला आहे. त्यामुळे जिल्ह्यातील काही भागात जोरदार पावसाची शक्यता आहे.

अशी घ्या काळजी...

• विजेच्या गडगडाटासह पावसाची पूर्वकल्पना असल्यास बाहेर जाणे टाळा.
• जर मोकळ्या जागेत असाल आणि जवळपास कुठल्याही सुरक्षित इमारतीचा आसरा नसेल तर सखल जागेत जाऊन गुडघ्यात डोके घालून बसा.
• आकाशात विजा चमकत असल्यास घरात किंवा सुरक्षित इमारतीत आश्रय घ्या.
• घराच्या बाल्कनी, छत अथवा घराबाहेरील ओट्यावर थांबू नका.
• आपण घरात असाल आणि घरातील विद्युत उपकरणे चालू असतील तर त्या वस्तू त्वरित बंद करा.
• तारांचे कुंपण, विजेचे खांब व इतर लोखंडी वस्तूंपासून दूर रहा.पाण्यात उभे असाल तर तात्काळ पाण्यातून बाहेर पडा.

 हे करु नका :

• आकाशात विजा चमकत असल्यास घरातील लँडलाईन फोनचा वापर करु नका.
• शॉवरखाली आंघोळ करु नका. घरातील बेसिनचे नळ, पाण्याची पाईपलाईन यांना स्पर्श करु नका तसेच कुठल्याही विद्युत उपकरणांचा वापर करु नका.
• विजेच्या गडगडाटासह वादळी वारे चालू असताना लोखंडी धातूच्या सहाय्याने उभारलेल्या तंबूमध्ये किंवा शेडमध्ये आसरा घेऊ नका. उंच झाडाच्या खाली आसरा घेऊ नका. धातूंच्या उंच मनो-याजवळ उभे राहू नका.
• जर आपण घरात असाल तर उघड्या दारातून अथवा खिडकीतून वीज पडताना पाहू नका. हे बाहेर थांबण्याइतकेच धोकादायक आहे. असे आवाहन निवासी उपजिल्हाधिकारी तथा मुख्य कार्यकारी अधिकारी (जिल्हा आपत्ती व्यवस्थापन प्राधिकरण) केशव नेटके यांनी केले आहे.

इतर महत्वाच्या बातम्या: