Jammu & Kashmir : कलम 370 वरुन जम्मू आणि काश्मीर विधानसभेत राडा सुरुच; आमदारांची एकमेकांना धक्काबुक्की, काॅलर पकडून तुंबळ हाणामारी
Jammu & Kashmir : सत्ताधारी आणि विरोधी भाजपच्या आमदारांनी एकमेकांची कॉलर पकडून एकमेकांना धक्काबुक्की केली. सभागृहात गदारोळ झाल्यानंतर सभापतींनी विधानसभेचे कामकाज 20 मिनिटांसाठी तहकूब केले.
Jammu & Kashmir : जम्मू-काश्मीर विधानसभेच्या अधिवेशनादरम्यान आज (7 नोव्हेंबर) आमदारांमध्ये जोरदार हाणामारी झाली. सत्ताधारी आणि विरोधी भाजपच्या आमदारांनी एकमेकांची कॉलर पकडून एकमेकांना धक्काबुक्की केली. सभागृहात गदारोळ झाल्यानंतर सभापतींनी विधानसभेचे कामकाज 20 मिनिटांसाठी तहकूब केले. लंगेटचे आमदार खुर्शीद अहमद शेख यांनी कलम 370 मागे घेण्याचा बॅनर सभागृहात फडकावला. बॅनरवर लिहिले होते, 'आम्हाला कलम 370 आणि 35A पुनर्स्थापित करायचे आहे आणि सर्व राजकीय कैद्यांची सुटका हवी आहे. याला भाजप आमदार आणि विरोधी पक्षनेते सुनील शर्मा यांनी विरोध केला. आणि विरोधात घोषणाबाजी सुरू केली.
सत्ताधारी पक्षाचे आमदार आणि विरोधकांमध्ये जोरदार बाचाबाची
भाजप आमदारांच्या निषेधाची मालिका इथेच थांबली नाही. त्यांनी हाऊसमधील वेलमध्ये खुर्शीद अहमद शेख यांच्याकडे पोहोचून त्यांच्या हातातील बॅनर हिसकावून घेतला. यावेळी शेख यांच्या समर्थनार्थ सज्जाद लोन आणि वाहिद पारा आणि नॅशनल कॉन्फरन्सचे काही आमदार भाजप आमदारांशी भिडले. यावेळी बॅनर फाडण्यावरून सत्ताधारी पक्षाचे आमदार आणि विरोधकांमध्ये जोरदार बाचाबाची झाली. दोन्ही बाजूंनी एकमेकांची कॉलर पकडून बॅनर हिसकावून घेण्यास सुरुवात केली. गोंधळ वाढत असल्याचे पाहून मध्यस्थी करणाऱ्या मार्शलनी भाजप आमदारांना सभागृहाबाहेर काढले.
शेखच्या भावावर दहशतवादी फंडिंगचा आरोप
बॅनर फडकावणारे आमदार खुर्शीद अहमद शेख हे बारामुल्लाचे लोकसभा खासदार इंजिनिअर रशीद यांचे भाऊ आहेत. रशीद यांना 2016 मध्ये UAPA अंतर्गत जम्मू-काश्मीरमध्ये दहशतवादी फंडिंग केल्याच्या आरोपावरून अटक करण्यात आली होती. ते 2019 पासून तिहार तुरुंगात बंद आहेत.
कलम 370 पुनर्स्थापित करण्याचा प्रस्ताव मंजूर
जम्मू-काश्मीर विधानसभेने बुधवारी राज्याचा विशेष दर्जा (कलम 370) बहाल करण्याचा प्रस्ताव मंजूर केला. नॅशनल कॉन्फरन्स जम्मू-काश्मीरमधील लोकांची दिशाभूल करत असल्याचा आरोप भाजपने केला असून कोणतीही विधानसभा कलम 370 आणि 35A परत आणू शकत नाही.
सरकारने जम्मू-काश्मीरच्या विशेष दर्जाबाबत बोलावे
सभागृहाचे कामकाज सुरू होताच, जम्मू आणि काश्मीरचे उपमुख्यमंत्री सुरिंदर चौधरी यांनी विशेष दर्जा बहाल करण्याचा प्रस्ताव मांडला, जो केंद्राने 5 ऑगस्ट 2019 रोजी रद्द केला होता. त्यात म्हटले आहे की, 'राज्याचा विशेष दर्जा आणि घटनात्मक हमी महत्त्वाच्या आहेत. हे जम्मू आणि काश्मीरमधील लोकांच्या अस्मिता, संस्कृती आणि हक्कांचे रक्षण करते. विधानसभा एकतर्फी काढून टाकल्याबद्दल चिंता व्यक्त करते. राज्याच्या विशेष दर्जाबाबत भारत सरकारने येथील प्रतिनिधींशी चर्चा करावी. त्याच्या घटनात्मक पैलंवूर काम केले पाहिजे. हे पैलू राष्ट्रीय एकात्मता आणि जम्मू-काश्मीरच्या लोकांच्या इच्छा या दोन्ही गोष्टी लक्षात घेऊन व्हायला हवे यावर विधानसभा भर देते. अपक्ष आमदार शेख खुर्शीद आणि शब्बीर कुल्ले, पीसी प्रमुख सज्जाद लोन आणि पीडीपी आमदारांनी पाठिंबा दिला.
भाजपचा आरोप, सभापतींनीच मसुदा तयार केला
जम्मू विधानसभेतील विरोधी पक्षनेते सुनील शर्मा यांच्यासह भाजपच्या सर्व आमदारांनी या प्रस्तावाला विरोध केला. मंगळवारी सभापतींनी मंत्र्यांची बैठक बोलावून स्वत: प्रस्ताव तयार केल्याची माहिती आपल्याकडे असल्याचे शर्मा यांनी सांगितले. यावेळी ते स्पीकर हाय-हाय, पाकिस्तानी अजेंडा चालणार नाही अशा घोषणा देत राहिले. राज्यपालांच्या अभिभाषणावर चर्चा करायची असताना हा प्रस्ताव कसा आणला, असा सवालही शर्मा यांनी केला. हा प्रस्ताव आपल्याला मान्य नसल्याचे त्यांनी सांगितले. त्यानंतर त्याची प्रत फाडून वेलमध्ये फेकली. या गदारोळात विधानसभेचे अध्यक्ष अब्दुर रहीम राथेर यांनी या प्रस्तावावर मतदान केले, त्यानंतर हा प्रस्ताव बहुमताने मंजूर करण्यात आला. भाजप आमदारांच्या आरोपांबाबत अध्यक्ष अब्दुल रहीम राथेर म्हणाले, माझ्यावर विश्वास नसेल तर अविश्वास ठराव आणा.
इतर महत्वाच्या बातम्या
महत्त्वाच्या बातम्या
