एक्स्प्लोर

पुण्याच्या पोलीस दाम्पत्याकडून एव्हरेस्ट सर

By : मंदार गोंजारी, एबीपी माझा, पुणे | Updated at : 07 Jun 2016 12:14 PM (IST)

पुणे : पुण्यातील एका पोलिस दाम्पत्याने महाराष्ट्राची मान अभिमानाने उंचावली आहे. तारकेश्वरी आणि दिनेश राठोड हे माऊण्ट एव्हरेस्ट एकत्र पादाक्रांत करणारं पहिलं भारतीय जोडपं ठरलं आहे. महाराष्ट्र पोलिसात असलेल्या तारकेश्वरी भालेराव राठोड आणि दिनेश राठोड यांनी सर्वोच्च शिखर माऊण्ट एव्हरेस्ट सर केलं. पुण्यातील हे दाम्पत्य महाराष्ट्रच नव्हे, तर देशभरातून माऊण्ट एव्हरेस्ट एकत्र सरणारं एकमेव जोडपं ठरलं आहे. 30 वर्षीय तारकेश्वरी आणि दिनेश हे दोघंही 2006 मध्ये पोलिस सेवेत रुजू झाले. दोघंही पुण्याच्या शिवाजीनगर पोलिस मुख्यालयात कार्यरत आहेत. दोघं 2008 मध्ये विवाहबंधनात अडकले. लग्न झाल्यापासूनच एव्हरेस्ट शिखर सर करण्याचं स्वप्न उराशी बाळगल्याचं ते सांगतात. इतकंच काय, एव्हरेस्टवर पाऊल ठेवेपर्यंत अपत्यसुख अनुभवायचं नाही, अशी खूणगाठही त्यांनी मनाशी बांधली होती. त्यामुळे हा अभिमानाचा क्षण अनुभवल्यानंतर बाळाची चाहूल घेण्यासही ते उत्सुक आहेत. राठोड दाम्पत्याला साहसी खेळांची आवड आहे. ऑस्ट्रेलियातील सर्वोच्च शिखरावरही त्यांनी यशस्वीपणे पाऊल ठेवलं असून स्काय डायव्हिंग सारख्या काही खेळातही ते सहभागी झाले आहेत.

एव्हरेस्ट सर करणारे महाराष्ट्राचे पहिले आयपीएस सुहेल शर्मा

काहीच दिवसांपूर्वी मेहकरचे उपविभागीय पोलीस अधिकारी सुहेल शर्मा यांनी एव्हरेस्ट शिखर सर केलं होतं. एव्हरेस्टला गवसणी घालणारे ते महाराष्ट्रातील पहिले आयपीएस अधिकारी ठरले होते. औरंगाबादचे पोलीस हवालदार रफिक शेख यांनीही नुकताच एव्हरेस्ट पादाक्रांत केला होता.