Exam Reforms Task Force : पेपरफुटी रोखण्यासाठी आता 'आधार' कार्डचे जनक मैदानात, पंतप्रधान मोदींची मोठी घोषणा, हाय-पावर टास्क फोर्सची स्थापना

Nandan Nilekani Exam Reforms Panel : NEET पेपरफुटी प्रकरणानंतर पंतप्रधान नरेंद्र मोदी यांनी इन्फोसिसचे सह-संस्थापक नंदन नीलेकणी यांच्या नेतृत्वाखाली विशेष टास्क फोर्स स्थापन करण्याची घोषणा केली आहे.

Nandan Nilekani Exam Reforms Panel

Source : abp majha

नवी दिल्ली : नीट (NEET) पेपरफुटी प्रकरणानंतर आणि केंद्रीय शिक्षणमंत्र्यांच्या राजीनाम्यानंतर पंतप्रधान नरेंद्र मोदी यांनी विद्यार्थ्यांच्या भविष्यासाठी आणि परीक्षा व्यवस्थेतील सुधारणांसाठी एक अत्यंत महत्त्वपूर्ण पाऊल उचलले आहे. इन्फोसिसचे सह-संस्थापक आणि नामांकित तंत्रज्ञान तज्ज्ञ नंदन नीलेकणी (Nandan Nilekani) यांच्या अध्यक्षतेखाली एक उच्चस्तरीय 'हाय-पावर टास्क फोर्स' (High Powered Task Force) स्थापन करण्यात येत असल्याची मोठी घोषणा पंतप्रधान मोदी यांनी केली आहे. परीक्षा पद्धत अधिक पारदर्शक, सुरक्षित आणि विश्वासार्ह बनवणे हा या टास्क फोर्सचा मुख्य उद्देश असेल.

PM Modi Message To Students : विद्यार्थ्यांच्या भविष्याशी खेळणाऱ्यांची जागा तुरुंगात

पंतप्रधान नरेंद्र मोदी यांनी इन्स्टाग्राम आणि इतर सोशल मीडियावर व्हिडीओ संदेश शेअर करत देशातील तरुणांना आणि पालकांना आश्वस्त केले. ते म्हणाले, "भारत सरकार विद्यार्थ्यांच्या उज्ज्वल भविष्यासाठी सातत्याने ठोस निर्णय घेत आहे. ज्या लोकांनी विद्यार्थ्यांच्या भविष्याशी खेळ केला आहे, ते आज तुरुंगात सडत आहेत. अशा प्रकरणांच्या जलद सुनावणीसाठी आपण आधीच फास्ट ट्रॅक कोर्ट स्थापन केले आहेत. याशिवाय संसदेत कडक कायदेशीर तरतुदींसह नवीन कायदा बनवण्याच्या दिशेनेही वेगाने काम सुरू आहे."

HIGH POWERED TASK FORCE on examination reforms under the leadership of Shri Nandan Nilekani constituted.@NandanNilekani pic.twitter.com/mMpmPdIEL5

— Narendra Modi (@narendramodi) July 26, 2026

NEET Paper Leak Case : परीक्षा व्यवस्थेत तंत्रज्ञानाचा वापर

भविष्यातील परीक्षा प्रणालीबद्दल बोलताना पंतप्रधान म्हणाले की, आता आपल्याला केवळ कारवाईवर न थांबता भविष्याचा विचार करावा लागेल. आपली परीक्षा पद्धत पूर्णपणे पारदर्शक आणि तंत्रज्ञानावर आधारित असणे अत्यंत गरजेचे आहे. याच पार्श्वभूमीवर नंदन नीलेकणी यांच्या नेतृत्वाखालील ही टास्क फोर्स संपूर्ण परीक्षा यंत्रणेचा अभ्यास करेल आणि त्यात आवश्यक सुधारणा सुचवेल. या टास्क फोर्सच्या अहवालाच्या आधारे आगामी सर्व परीक्षा पूर्णपणे पारदर्शक आणि लीक-प्रूफ (Leak proof) पद्धतीने घेतल्या जातील.

Nandan Nilekani Role : कोण आहेत नंदन नीलेकणी?

नंदन नीलेकणी हे देशातील अग्रगण्य तंत्रज्ञान कंपनी 'इन्फोसिस'चे सह-संस्थापक आहेत आणि त्यांनी 'आधार' (Aadhaar) या भारतातील सर्वात मोठ्या डिजिटल ओळख प्रकल्पाचे यशस्वी नेतृत्व केले आहे. सार्वजनिक परीक्षांमध्ये अत्याधुनिक तंत्रज्ञानाचा वापर करून पेपरफुटीच्या घटना कायमच्या रोखण्यासाठी आणि परीक्षा प्रक्रिया डिजिटल आणि पारदर्शक बनवण्यासाठी त्यांच्या नेतृत्वाखालील ही टास्क फोर्स महत्त्वाची भूमिका बजावणार आहे.

ही बातमी वाचा: