Petrol-Diesel Price : सलग दुसऱ्या दिवशी डिझेलच्या दरांत घट; आजचे दर काय?

Petrol-Diesel Price Today : पेट्रोल -डिझेलच्या वाढणाऱ्या किमतींमध्ये सलग दुसऱ्या दिवशी दिलासा. डिझेलच्या दरांत घट करण्यात आली असून पेट्रोलचे दर मात्र सलग 33 व्या दिवशीही स्थिर आहेत.

पेट्रोल-डिझेलचे दर (File Photo)

Petrol Price Today, Diesel Rate Latest Updates 19th August, 2021 : तेलं कंपन्यांनी आज म्हणजेच, गुरुवारसाठी पेट्रोल-डिझेलचे दर जारी केले आहेत. आज सलग 33व्या दिवशी पेट्रोलच्या किमतींमध्ये कोणताही बदल करण्यात आलेला नाही. मात्र डिझेलच्या किमतीत सलग दुसऱ्या दिवशी घट करण्यात आली आहे. तेल कंपन्यांनी आज डिझेलच्या किंमतीत 20 पैशांची घट केली आहे. म्हणजेच, आज सलग दुसऱ्या दिवशी डिझेल 20 पैशांनी स्वस्त करण्यात आलं आहे. यापूर्वी बुधवारी, म्हणजेच काल डिझेलच्या किमतींमध्ये 20 पैशांची घट करण्यात आली होती. दरम्यान, गेल्या 33 दिवसांपासून पेट्रोलच्या किमतीत कोणताच बदल करण्यात आलेला नाही. मुंबईमध्ये आज पेट्रोलची किंमत 107.83 रुपये प्रति लिटर, तर डिझेलची किंमत 97.04 रुपये प्रति लिटर इतकी आहे. 

चेन्नई, पंजाबसह देशातील अधिक भागांत पेट्रोलनं शंभरी ओलांडली असून अनेक शहरांत पेट्रोलचे दर शंभरीपार पोहोचले आहेत. अनेक शहरांत डिझेलनंही शंभरी गाठली आहे. दिल्ली, मुंबई, कोलकाता आणि चेन्नईमध्ये यापूर्वीच पेट्रोलनं शंभरी ओलांडली आहे. दिल्लीत आज पेट्रोलची किंमत 101.84 रुपये प्रति लिटर, तर डिझेलची किंमत 89.47 रुपये प्रति लिटर इतकी आहे. तर चेन्नईत आज पेट्रोलची किंमत 101.49 रुपये प्रति लिटर, तर डिझेलची किंमत 94.20 रुपये प्रति लिटर इतकी आहे.

बंगळुरु, हैदराबाद आणि पुणे यांसारख्या महानगरांमध्ये पेट्रोल 100 रुपये प्रति लिटरहून अधिक किमतीला विकलं जात आहे. दरम्यान, मालवाहतूक शुल्क आणि मूल्यवर्धित कर (व्हॅट) सारख्या स्थानिक करांच्या वेगवेगळ्या दरांमुळे इंधनाचे दर राज्यानुसार वेगवेगळे असतात.

पेट्रोल आणि डिझेलच्या किमतींनी देशात सध्या ऐतिहासिक उंची गाठली आहे. अशातच आंतरराष्ट्रीय बाजारात कच्च्या तेलाच्या किमतींमध्ये वाढ होत असल्याचं पाहायला मिळत आहे. असं असलं तरी, भारतीय तेल कंपन्यांनी गेल्या 31 दिवसांपासून पेट्रोल किमतींमध्ये कोणतीही वाढ केलेली नाही. 

जुलै महिन्यात आतापर्यंत पेट्रोलच्या किमती 9 वेळा आणि डिझेलच्या किमतींमध्ये 5 वेळा वाढ झाली आहे. तसेच जुलै महिन्यात एका दिवशी डिझेलच्या किमतीत काही प्रमाणात घट झाल्याचं पाहायला मिळालं होतं. यापूर्वी मे आणि जून महिन्यात इंधनाच्या किमतींमध्ये 16-16 वेळा वाढ झाली होती. 4 मेनंतर आतापर्यंत राजधानी दिल्लीमध्ये पेट्रोलचे दर 11.44 रुपये प्रति लिटर आणि डिझेलचे दर 09.14 रुपये प्रति लिटर महाग झालं आहे.

देशातील प्रमुख शहरांतील पेट्रोल-डिझेलचे दर :

शहरं	पेट्रोलची किंमत	डिझेलची किंमत
दिल्ली	101.84	89.47
मुंबई	107.83	97.04
चेन्नई	102.49	94.02
कोलकाता	102.08	92.57
बंगळुरु	105.25	94.86
भोपाळ	110.20	98.26
चंदीगड	97.93	89.12
रांची	96.68	94.41
लखनौ	104.25	89.81

लवकरच पेट्रोल-डिझेलच्या किमती कमी होणार? 

देशात इंधनदरवाढीच्या सत्राला ब्रेक लागून पेट्रोल-डिझेलच्या किमती कमी होण्याची शक्यता आहे. कारण तेल कंपन्यांनी जागतिक स्तरांवर तेलाच्या किमती कमी करण्यास सुरुवात केली आहे. बेंचमार्क ब्रेंट क्रूड ज्यामध्ये काही दिवसांपूर्वी वाढ 77 डॉलर प्रति बॅरल झालं होतं, या किमती मागच्या पंधरवड्यात 10 टक्क्यांहून कमी होत 68.85 डॉलर प्रति बॅरलवर पोहोचल्या आहेत. जर या किमती आणखी काही दिवसांसाठी 70 डॉलर प्रति बॅरलहून कमी राहिल्या, तर येणाऱ्या दिवसांत पेट्रोल आणि डिझेलच्या किमतींमध्ये घट होऊ शकते. 

पेट्रोलच्या दरांमध्ये मे महिन्यापासून 41 वेळा वाढ झाली 

पेट्रोलच्या दरांत चार मेनंतर 41 वेळा वाढ झाली. तर डिझेलच्या दरांमध्ये 37 वेळा वाढ झाली, तर दोनदा दरांमध्ये घट करण्यात आली. सलग तेलांच्या किमतींमध्ये होणाऱ्या वाढीमुळे मध्यप्रदेश, राजस्थान, महाराष्ट्र, आंध्रप्रदेश, तेलंगाणा, कर्नाटक, ओदिशा, तामिळनाडू, केरळ, बिहार आणि पंजाब यांच्यासह 15 राज्यांमध्ये पेट्रोलच्या किमती शंभरी पार पोहोचल्या आहेत. उत्तर प्रदेश आणि हरियाणातील काही जिल्ह्यांमध्ये पेट्रोल 100 रुपये प्रति लिटरनं महाग झालं आहे. डिझेल राजस्थान, ओदिशा आणि मध्यप्रदेशातील काही शहरांमध्ये 100 रुपये प्रति लिटरवर पोहोचलं आहे. 

देशात 15 जून 2017 पासून इंधनाचे दर रोज बदलण्यास सुरुवात झाली. पेट्रोल आणि डिझेलच्या किंमती आता भारतातील तेल कंपन्या ठरवतात. आंतरराष्ट्रीय स्तरावर प्रत्येक क्षणाला तेलाच्या किंमती बदलत असतात. त्यामुळे देशात पेट्रोल आणि डिझेलच्या किंमती दर दिवशी सकाळी सहा वाजता बदलतात.

पेट्रोल आणि डिझेलचे दर कुठे आणि कसे पाहाल?

इंडियन ऑईलचं IndianOil ONE Mobile App तुमच्या मोबाईलवर डाऊनलोड करुन तुम्ही तुमच्या जवळच्या इंडियन ऑईल पेट्रोल पंपावरील इंधनाचे दर जाणून घेऊ शकता.

इंडियन ऑईलच्या वेबसाईटवर https://iocl.com/Products/PetrolDieselPrices.aspx पेट्रोल डिझेलचे दर सोप्या पद्धतीने पाहता येतील.

पेट्रोल आणि डिझेलच्या किंमती एसएमएसद्वारे देखील कळू शकतात. इंडियन ऑईलच्या वेबसाईटने दिलेल्या माहितीनुसार, RSP आणि स्पेस देऊन आपल्या शहराचा कोड टाकून 92249992249 या क्रमांकावर एसएमएस करायचा आहे. हा कोड इंडियन ऑईलच्या वेबसाईटवर मिळेल. (शहरांचे कोड इंडियन ऑईलच्या वेबसाईटवर देण्यात आले आहेत).