लवकरच आणखी ट्रेन सुरु करणार आणि तिकीट काऊंटरवरही बुकिंग सुरु होणार : पियुष गोयल

सध्या ऑनलाईन तिकीट बुकिंग सुरु असली तरी पुढील 2 ते 3 दिवसात रेल्वे स्थानकावरही तिकीट बुकिंग सुरु होणार असल्याची माहिती रेल्वेमंत्री पियूष गोयल यांनी दिली आहे.

नवी दिल्ली : येत्या 1 जूनपासून 200 ट्रेन सुरु केल्या जाणार आहेत. या ट्रेन्सची ऑनलाईन तिकीट बुकिंग आज सकाळी 10 वाजेपासून आयआरसीटीसीच्या वेबसाईटवर सुरु झाली आहे. पहिल्या दोन तासात 1 लाख 49 हजार प्रवाशांनी तिकीट बुक केले. या तिकीटावर 2 लाखांहून अधिक प्रवासी प्रवास करणार आहेत. सध्या ऑनलाईन तिकीट बुकिंग सुरु असली तरी पुढील 2 ते 3 दिवसात रेल्वे स्थानकावरही तिकीट बुकिंग सुरु होणार असल्याची माहिती रेल्वेमंत्री पियूष गोयल यांनी दिली आहे. देशभरात 1.7 लाख केंद्रांवर तिकीट बुकिंग सुरु केलं जाणार आहे. गेल्या अनेक दिवसांपासून ट्रेन सुरु होण्याची वाट प्रवासी पाहत होते. येत्या काळात आणखी ट्रेन्स सुरु केल्या जातील, अशी माहितीही पियुष गोयल यांनी दिली.

 आणखी ट्रेन सुरु करण्याची घोषणा लवकरच केली जाणार आहे. भारताचं जनजीवन पुन्हा ट्रॅकवर आणण्याची वेळ आली आहे, असं पियुष गोयल यांनी म्हटलं. ट्रेन सुरु झाल्याने लवकरत तिकीट काऊंटरही सुरु केले जाणार आहेत. आता ज्या ट्रेन सुरु आहेत, त्याची तिकीट बुकिंग ऑनलाईनच सुरु आहे. तिकीत काऊंटर सुरु झाल्यानंतर यासाठी काही प्रोटोकॉल विकसित करण्यावर आम्ही अभ्यास करत आहोत, असं पियुष गोयल यांनी म्हटलं.

कोरोना व्हायरसच्या पार्श्वभूमीवर देशभरात 25 मार्चपासून लॉकडाऊनची घोषणा करण्यात आली होती. तेव्हापासून देशभरातील रेल्वे सेवा बंद करण्यात आली होती. याशिवाय हवाई वाहतूक आणि मेट्रो सेवाही बंद करण्यात आली होती. या दरम्यान देशभरातील विविध भागात अडकलेल्या मजुरांना त्यांच्या राज्यात पोहोचवण्यासाठी विशेष श्रमिक रेल्वे सुरु करण्यात आल्या होत्या. त्यानंतर कालच रेल्वेमंत्री पियुष गोयल यांनी येत्या 1 जूनपासून आणखी 200 ट्रेन सुरु करण्याची घोषणा केली.

Railway Booking | रेल्वे स्थानकावर 2 ते 3 दिवसांत तिकीटविक्री सुरु करण्याचे रेल्वे मंत्र्यांचे संकेत