Gujarat : 'आत्महत्या करावीशी वाटतेय हो..' गुजरातमध्ये हेल्पलाईनवर अचानक कॉल्स का वाढले? काय कारण आहे?

Gujarat : गुजरातच्या सुरतमध्ये 65 कारागिरांनी आत्महत्या केल्या आहेत, खास कारागिरांसाठी सुरू केलेल्या हेल्पलाइन नंबरवर 1600 कॉल्स आल्याने सध्या प्रशासनाची चिंता वाढलीय, काय कारण आहे?

Gujarat surat india marathi news Sudden increase diamond workers in calls to suicide helpline

Source : Google

Gujarat : गुजरात राज्यात कामगारांच्या वाढत्या आत्महत्येच्या प्रमाणामुळे इथल्या प्रशासनाची चिंता वाढली आहे. गेल्या इथे व्यवसाय मंदावल्याने कारागिरांना नोकऱ्या गमवाव्या लागल्या होत्या, तर आता बड्या कंपन्या बरखास्त झाल्यामुळे ही परिस्थिती आणखी वाढली आहे. आत्महत्येचे पाऊल उचलू नये यासाठी स्थापन करण्यात आलेल्या हेल्पलाइनवर मोठ्या प्रमाणात कॉल आले आहेत. या हेल्पलाइनवर आतापर्यंत 1600 हून अधिक कॉल्स आले आहेत. नेमकं काय कारण आहे? जाणून घेऊया..

 

'हेल्पलाइन नंबर' वर आतापर्यंत 1600 हून अधिक कॉल्स

सध्याची स्थिती पाहता गुजरात राज्यातील सुरतमध्ये हिऱ्यांचा व्यवसाय मंदावल्याने आणि मोठ्या कंपन्यांच्या लांबलेल्या सुट्ट्यांमुळे धक्कादायक परिस्थिती समोर आली आहे. डायमंड वर्कर्स युनियन गुजरात (DWUG) ने 15 जुलै रोजी 'हेल्पलाइन नंबर' सुरू केला होता. या हेल्पलाइनवर आतापर्यंत 1600 हून अधिक कॉल्स आले आहेत. ज्यामध्ये कारागिरांनी त्यांच्या समस्या मांडल्या आहेत. युनियनने शेअर केलेल्या आकडेवारीत ही बाब समोर आली आहे. 'किरण जेम्स' या सुरतमधील हिरे बाजारातील सर्वात मोठ्या फर्मने श्रावण महिन्यात 10 दिवसांची सुट्टी जाहीर केली आहे. तर जागतिक स्तरावर हिऱ्यांची मागणी कमी असल्याने हा निर्णय घ्यावा लागल्याचे फर्मचे म्हणणे आहे.

 

हिरे उद्योगातील कामगारांच्या आत्महत्या वाढल्या 

DWUG चे उपाध्यक्ष भावेश टंक म्हणाले की, सुरतमध्ये गेल्या 16 महिन्यांत 65 हिरे कामगारांनी आत्महत्या केल्या आहेत, त्यापैकी बहुतेकांनी पगार कपात आणि नोकरी गमावल्यामुळे, त्यातच मंदीचा परिणाम म्हणून हे टोकाचे पाऊल उचलले आहे. ते म्हणाले की, आम्ही 15 जुलै रोजी हा हेल्पलाइन क्रमांक सुरू केला होता. आम्हाला आतापर्यंत 1,600 हून अधिक कॉल आले आहेत, त्यापैकी अनेकांनी आर्थिक तणावामुळे आत्महत्या करण्याच्या मार्गावर असल्याचे सांगितले आहे. गेल्या काही महिन्यांत बहुतेक कामगार बेरोजगार झाले आहेत. त्यांनाही रोजगार न मिळण्याची चिंता आहे.

 

जागतिक तणावाचा हिरे व्यवसायावर वाईट परिणाम 

जागतिक तणावाचा गुजरातमधील सुरतमधील हिरे व्यवसायावर वाईट परिणाम होत आहे. गेल्या काही दिवसांत व्यवसाय मंदावल्याने कारागिरांना नोकऱ्या गमवाव्या लागल्या होत्या, त्यातच आता बड्या कंपन्या बरखास्त झाल्यामुळे ही परिस्थिती आणखी वाढली आहे. कारागिरांनी आत्महत्येचे पाऊल उचलू नये यासाठी स्थापन करण्यात आलेल्या हेल्पलाइनवर मोठ्या प्रमाणात कॉल आले आहेत.

 

पगारकपात, नोकरीवरून काढल्याने जगण्याचा प्रश्न

टंक म्हणाले की, ज्या लोकांच्या पगारात 30 टक्क्यांपर्यंत कपात झाली आहे, मुलांच्या शाळेची फी, घरभाडे, घर आणि वाहन कर्जाचे मासिक हप्ते इत्यादी गोष्टी या पगारातून पुरवल्या जातात. युक्रेन-रशिया आणि इस्रायल-गाझा संघर्ष, तसेच प्रमुख बाजारपेठेतील चीनमधील कमकुवत मागणीमुळे जास्त पुरवठा झाला आहे, ज्यामुळे यावर्षी 50,000 कामगारांना त्यांच्या नोकऱ्या गमवाव्या लागल्या आहेत. रविवारी एका कार्यक्रमात, धर्मनंदन डायमंड्सचे अध्यक्ष लालजी पटेल यांनी, प्रत्येक विद्यार्थ्याला 15,000 रुपयांची आर्थिक मदत जाहीर केली, तसेच गरजू कुटुंबांना धनादेश वितरित केले.

लहान युनिट्स बंद, नोकऱ्या गेल्या

धर्मानंदन डायमंड्सने एका निवेदनात म्हटले आहे की, लहान डायमंड युनिट्स बंद झाल्यामुळे, काही ज्वेलर्सना त्यांच्या नोकऱ्या गमवाव्या लागल्या आहेत, त्यामुळे कामगार त्यांच्या मुलांची शाळा आणि महाविद्यालयाची फी भरू शकत नाहीत. हिरे कामगारांच्या आत्महत्येच्या वाढत्या घटनांमुळे, सूरत डायमंड वर्कर्स युनियनने अलीकडेच एक हेल्पलाइन नंबर सुरू केला आहे, ज्यामध्ये अनेक कामगारांनी त्यांच्या मुलांची शाळा आणि महाविद्यालयाची फी भरण्यासाठी मदतीची विनंती केली आहे. निवेदनात म्हटले आहे की, आर्थिक मदत मागणाऱ्या कुटुंबांच्या आर्थिक स्थितीचे सर्वेक्षण करून त्यांना शाळेच्या शुल्काचे धनादेश देण्यात आले. रविवारी धनादेश वाटप कार्यक्रमाचे आयोजन करण्यात आले होते, त्यामध्ये शाळा आणि महाविद्यालयात शिकणाऱ्या 40 विद्यार्थ्यांना शाळेच्या शुल्कापोटी 15 हजार रुपयांचे धनादेश देण्यात आले. पटेल म्हणाले की त्यांची फर्म हे पाऊल उचलत आहे कारण हिरे उद्योगात मंदी आहे आणि मुलांच्या शिक्षणावर परिणाम होणार नाही याची काळजी घ्यायची आहे.

शेअर बाजारानंतर मागणी कमी झाली

सुरत हे या प्रदेशातील प्रमुख केंद्रांपैकी एक आहे, जिथे जगातील सुमारे 90 टक्के हिऱ्यांना आकार आणि पॉलिश केले जातात. हे काम 2,500 पेक्षा जास्त युनिट्समध्ये सुमारे 10 लाख कामगार करतात. गुजरात काँग्रेसचे प्रमुख शक्ती सिंह गोहिल यांनी राज्यसभेत सूरत डायमंड मार्केटची स्थिती उपस्थित केली होती. सुरतच्या हिरे उद्योगाला अधिक उंचीवर नेण्यासाठी सुरत डायमंड बोर्सची निर्मिती करण्यात आली आहे, परंतु मागणीअभावी हिरे व्यापाऱ्यांसमोर नवीन समस्या निर्माण झाल्या आहेत.

 

 

हेही वाचा>>>

 

 

(टीप : वरील सर्व गोष्टी माहिती म्हणून वाचकांपर्यंत पोहोचवत आहोत. एबीपी माझा यातून कोणताही दावा करत नाही. )