नवीन वर्षात सोनं खरेदीदारांना मिळणार दिलासा, जागतिक सुवर्ण परिषदेनं दिली महत्वाची माहिती
2024 हे वर्ष सोन्यात गुंतवणूक (Gold Investment) करणाऱ्या गुंतवणूकदारांसाठी चांगले ठरले आहे. मात्र, पुढील नवीन वर्षात सोन्याच्या किंमती कमी होणार की वाढणार याबाबतची माहिती वर्ल्ड गोल्ड कौन्सिलने दिलीय.
Gold Prices In 2025 : 2024 हे वर्ष सोन्यात गुंतवणूक (Gold Investment) करणाऱ्या गुंतवणूकदारांसाठी चांगले वर्ष ठरले आहे. चालू वर्षात सोन्याच्या किमतीत 30 टक्क्यांहून अधिक वाढ झाली असून सोन्याच्या किमतींनी आतापर्यंतचा उच्चांक गाठला आहे. गेल्या 10 वर्षांच्या ट्रॅक रेकॉर्डवर नजर टाकली तर सोन्याने यावर्षी सर्वोत्तम कामगिरी केली आहे. पण 2025 साली सोन्याचे दर कसे असणार? असा प्रश्न सर्वांच्याच मानत असेल. वर्ल्ड गोल्ड कौन्सिलने याबाबतचा अहवाल प्रसिद्ध केला आहे.
जागतिक सुवर्ण परिषदेच्या अहवालानुसार, आर्थिक आणि भू-राजकीय संकटामुळे सोन्याच्या किमतीतील वाढ 2024 सारखी राहणार नाही. अहवालानुसार, 2025 मध्ये सोन्याच्या किमतीची हालचाल अमेरिकेत घडणाऱ्या घटनांवर अवलंबून असेल. विशेषत: 20 जानेवारी 2025 रोजी दुसऱ्यांदा अमेरिकेच्या अध्यक्षपदाची शपथ घेणारे डोनाल्ड ट्रम्प यांच्यावर बाजाराची नजर असणार आहे. ट्रम्प यांच्या दुसऱ्या कार्यकाळात स्थानिक अर्थव्यवस्थेला बूस्टर डोस मिळेल. त्यामुशं काही प्रमाणात सोन्याच्या दरात घसरण होण्याची शक्यता आहे.
अहवालानुसार, 2025 मध्ये, महागाई उद्दिष्टापेक्षा जास्त असूनही, फेडरल रिझर्व्ह, अमेरिकेची मध्यवर्ती बँक, वर्षाच्या अखेरीस 100 आधार अंकांनी व्याजदरात कपात करू शकते यावर एकमत आहे. युरोपियन सेंट्रल बँक देखील त्याच रकमेने व्याजदर कमी करू शकते. यूएस डॉलर फ्लॅट राहू शकतो किंवा थोडा कमजोर होऊ शकतो. जागतिक वाढ सकारात्मक राहण्याची अपेक्षा आहे. फेडरल रिझर्व्हच्या कृती आणि अमेरिकन डॉलरची हालचाल सोन्याच्या किमतीची दिशा ठरवेल. पण हे दोन घटक केवळ सोन्याच्या किमती ठरवत नाहीत, असे गेल्या काही वर्षांत दिसून आले आहे. सोन्याची मागणी आणि पुरवठाही यावर निर्णय घेतील.
भारतात सोन्याच्या मागणीत वाढ होणार
अहवालानुसार भारत आणि चीन ही सोन्याची सर्वात मोठी बाजारपेठ आहे. सोन्याच्या एकूण मागणीपैकी 60 टक्के मागणी आशिया खंडातून येते. यामध्ये मध्यवर्ती बँकांद्वारे केलेल्या खरेदीचा समावेश नाही. चीनच्या अर्थव्यवस्थेच्या कामगिरीवर तेथील सोन्याची मागणी अवलंबून असेल. मात्र, भारतात परिस्थिती खूपच चांगली आहे. आर्थिक विकास दर 6.5 टक्क्यांच्या वर कायम आहे. भारतात सोन्याची ग्राहकांची मागणी मजबूत राहील.
मध्यवर्ती बँका आणि गुंतवणूकदारांच्या गुंतवणुकीमुळे वाढ
वर्ल्ड गोल्ड कौन्सिलच्या मते, 2024 मध्ये सेंट्रल बँकेने केलेली खरेदी आणि गुंतवणूकदारांनी केलेली गुंतवणूक वाढल्यामुळे सोन्याच्या किमतीत वाढ झाली. ग्राहकांच्या मागणीत घट होऊनही सोन्याच्या दरात वाढ दिसून आली आहे. 2024 च्या तिसऱ्या तिमाहीपर्यंत केंद्रीय बँकांकडून 694 टन सोने खरेदी करण्यात आले आहे. RBI ने ऑक्टोबरमध्ये 27 टन सोन्याची खरेदी केली आहे आणि 2024 मध्ये त्याची एकूण खरेदी 77 टन झाली आहे, जी गेल्या वर्षीच्या तुलनेत 5 पट जास्त आहे.
महत्त्वाच्या बातम्या
