Farmer Protest Update : सिंघू, टिकरी आणि गाझीपूर सीमेवर पोलिसांची तटबंदी, आंदोलनस्थळी जाणारे सर्व रस्ते बंद

पोलिसांनी आंदोलनाच्या ठिकाणी वीज, पाणी, शौचालये हटवली असल्याचा शेतकऱ्यांचा आरोप आहे. त्याचबरोबर आंदोलनस्थळी इंटरनेट सुविधाही बंद केली आहे.

Farmer Protest : दिल्लीच्या विविध सीमांवर पोलिसांनी शेतकऱ्यांना रोखण्यासाठी युद्धपातळीवर तयारी केली आहे. दिल्लीच्या सिंघू, टिकरी आणि गाझीपूर सीमेवर काटेरी तार, बॅरिकेड्स आणि बोल्डर्स लावून पोलिसांनी तटबंदी केली आहे. एवढेच नाही तर पोलिसांनी शेतकऱ्यांच्या आंदोलनस्थळी जाणारे सर्व रस्ते देखील बंद केले आहेत.

गाझीपूर सीमेच्या उड्डाणपुलाच्या वरील आणि खाली असलेल्या दोन्ही मार्गाचे किल्ल्यात रूपांतर झाले आहे. दिल्लीच्या सीमेवर देशाच्या सीमेसारखी तयारी पाहून प्रश्न पडतो की दिल्ली पोलिस एवढी मोठी तयारी का करत आहेत? याला कुणाला उत्तर नाही. ही प्रशासनाची भीती असल्याचे शेतकरी नेते सांगत आहेत.

शेतकऱ्यांचे प्रशासनावर गंभीर आरोप

26 जानेवारीतील हिंसाचार आणि 29 जानेवारी रोजी शेतकऱ्यांवरील हल्ल्यानंतर दिल्ली पोलिसांनी आंदोलनाच्या ठिकाणाहून दिल्लीकडे जाण्याचे सर्व मार्ग थांबवण्यास पूर्ण तयारी केली आहे. पोलिसांनी आंदोलनाच्या ठिकाणी वीज, पाणी, शौचालये हटवली असल्याचा शेतकऱ्यांचा आरोप आहे. त्याचबरोबर आंदोलनस्थळी इंटरनेट सुविधाही बंद केली आहे.

संयुक्त किसान मोर्चा संघटनेकडून 6 फेब्रुवारीला 'चक्का जाम' करण्याची घोषणा केली आहे. 'भारतीय किसान युनियन' या शेतकरी संघटनेचे नेते बलबीर सिंह यांनी पत्रकार परिषदेत याबाबतची घोषणा केली. 6 फेब्रुवारीला दुपारी 12 ते 3 या वेळेत हे देशव्यापी आंदोलन करणार असल्याचा इशारा त्यांनी दिला. या आंदोलनाअंतर्गत रस्ते अडवण्याचा इशारा त्यांनी दिला.

संयुक्त शेतकरी मोर्चाच्याच नेतृत्त्वात मागील दोन महिन्यांहूनही अधिक काळापासून दिल्लीतील सीमांवर शेतकऱ्याचं आंदोलन सुरु आहे. तीन कृषी कायदे रद्द करण्याच्या मागणीसाठी हे आंदोलन करण्यात येत आहे. दरम्यान, या तिन्ही कायद्यांच्या बाबतीत चर्चा करण्याची तयारी दाखवली असली तरीही सरकारनं हे कायदे रद्द करण्याला स्पष्ट नकार दिला आहे. आतापर्यंत 11 बैठकांची सत्र होऊनही या प्रश्नांवर तोडगा निघालेला नाही.