बाबा राम रहीमचा फैसला आज, रोहतक तुरुंगात शिक्षेची सुनावणी

कोर्टानं शिक्षा सुनावल्यानंतर कायदा आणि सुव्यवस्था राखण्याचं आव्हान पंजाब, हरियाणा आणि दिल्ली सरकार समोर आहे.

हरियाणा : बलात्काराच्या आरोपात दोषी ठरलेल्या बाबा राम रहीमला आज शिक्षा सुनावली जाणार आहे. सुरक्षेच्या कारणास्तव न्यायाधीश शिक्षा सुनावण्यासाठी स्वतः रोहतक कारागृहात जाणार आहेत. राम रहीमला कोणती शिक्षा मिळते याकडे सर्वांचं लक्ष लागलं आहे. बाबा राम रहीमला 2002 च्या साध्वी बलात्कार प्रकरणी दोषी ठरवण्यात आलं आहे. कोर्टानं शिक्षा सुनावल्यानंतर कायदा आणि सुव्यवस्था राखण्याचं आव्हान पंजाब, हरियाणा आणि दिल्ली सरकारसमोर आहे. बाबा राम रहीमला दोषी ठरवल्यानंतर सिरसा, पंचकुला या शहरांसह हरियाणा, पंजाबमध्ये मोठा धुडगूस घालण्यात आला होता. यामध्ये 38 जणांचा मृत्यू झाला तर लाखोंच्या संपत्तीचं नुकसान झालं. ज्या जमावानं हरियाणा आणि पंजाबमध्ये मोठा हिंसाचार घडवला, तो खरोखर बाबा राम रहीमचा भक्तगण होता का, असा प्रश्न उपस्थित होत आहे. प्राथमिक अंदाजानुसार भाडोत्री गुंडांनी अनेक ठिकाणी तोडफोड केल्याचा दावा करण्यात येत आहे. प्रत्येकाला हजार रुपये देऊन तोडफोड करण्यास सांगितल्याचा आरोप आहे. त्याचप्रमाणे त्यांच्या खाण्या-पिण्याची संपूर्ण व्यवस्था करण्यात आल्याचंही म्हटलं जातं. काय आहे संपूर्ण प्रकरण? एप्रिल 2002 : 2002 मध्ये साध्वींचं लैंगिक शोषण केल्याचा आरोप बाबा गुरमीत राम रहीमवर आहेत. साध्वीने एप्रिल 2002 मध्ये तत्कालिन मीडिया, पंजाब-हरियाणा हायकोर्टाचे सरन्यायाधीश, पंतप्रधान अटल बिहारी वाजपेयी यांना पत्र लिहून राम रहीमवर लैंगिक शोषणाचा आरोप केला होता. यानंतर हायकोर्टाने 24 सप्टेंबर 2002 रोजी प्रकरणाचा तपास सीबीआयकडे सोपवला होता. मे 2002 : तक्रारीच्या पत्राची पडताळणी केल्यानंतर तपासाची जबाबदारी सिरसा सत्र न्यायालयाच्या न्यायाधीशांवर सोपवली होती. डिसेंबर 2002 : तक्रार योग्य असल्याचं सिद्ध झाल्यानंतर राम रहीमविरोधात कलम 376, 506 आणि 509 अंतर्गत गुन्हा दाखल करण्यात आला होता. डिसेंबर 2003 : ह्या प्रकरणाचा तपास सीबीआयकडे सोपवण्यात आला. तपास अधिकारी सतीश डागर यांनी चौकशी सुरु केली आणि 2005-2006 मध्ये लैंगिक शोषण झालेल्या साध्वीला शोधून काढलं. जुलै 2007 : सीबीआयने प्रकरणाचा पूर्ण तपास करुन अंबाला सीबीआय कोर्टात आरोपपत्र दाखल केलं. अंबालावरुन हे प्रकरण पंचकुला सीबीआय कोर्टात ट्रान्सफर केलं. आरोपपत्रानुसार डेरामध्ये 1999 आणि 2001 मध्ये आणखी काही साध्वींचंही लैंगिक शोषण झालं होतं. पण त्यांचा पत्ता लागला नाही. ऑगस्ट 2008 : प्रकरणाचा खटला सुरु झाला आणि डेरा प्रमुख राम रहीमविरोधात आरोप निश्चित करण्यात आले. 2011 ते 2016 : प्रकरणाचा खटला चालला. डेरा प्रमुख राम रहीमकडून वकील सातत्याने बाजू लढवत राहिले. जुलै 2016 :  खटल्याच्या सुनावणीदरम्यान 52 साक्षीदारांचा जबाब नोंदवला. यामध्ये 15 सरकारकडून आणि 37 बचाव पक्षाचे होते. जून 2017 : कोर्टाने डेरा प्रमुख बाबा राम रहीमच्या परदेश प्रवासावर बंदी घातली. 25 जुलै 2017 :  सीबीआय कोर्टाने या प्रकरणात दररोज सुनावणी करण्याचे निर्देश दिले, जेणेकरुन लवकरच निकाल लावता येईल. 17 ऑगस्ट 2017 : दोन्ही बाजूंचा युक्तीवाद संपला आणि निकालासाठी 25 ऑगस्टची तारीख निश्चित करण्यात आली. 25 ऑगस्ट 2017 : बाबा राम रहीमला बलात्कार प्रकरणी दोषी ठरवण्यात आलं.

संबंधित बातम्या

हजार रुपयाच्या मोबदल्यात हरियाणात भाडोत्री गुंडांकडून हिंसा?

न्यायाधीश तुरुंगात जाऊन राम रहीमला शिक्षा सुनावणार!

राम रहीमच्या डेरावर कारवाई, मुख्यालयात सैन्य घुसलं

गुरमीत राम रहीमनंतर ‘ही’ महिला डेरा सच्चा सौदाची प्रमुख?

व्हिडिओ : पंचकुलामध्ये राम रहीमच्या गुंडांचा जिल्हाधिकाऱ्यांवरच हल्ला

बाबा राम रहीमला व्हीआयपी ट्रीटमेंट, एसी खोलीत रात्र घालवली

बाबा राम रहीम समर्थकांचा पंजाब-हरियाणात धुडगूस, 30 जणांचा मृत्यू

भाजप खासदार साक्षी महाराजांकडून राम रहीमचं समर्थन

अमित शाह आणि मोदींची बैठक, मनोहरलाल खट्टर यांची खुर्ची धोक्यात?

कोर्टातून हेलिकॉप्टरने थेट तुरुंगात, राम रहीम कडेकोट सुरक्षा बंदोबस्तात

राम रहीमची संपत्ती विकून लोकांना नुकसान भरपाई द्या : हायकोर्ट

बलात्कार प्रकरणात बाबा गुरमीत राम रहीम दोषी