Gondia News: शाळेचे 20 वर्षांपूर्वीचे गहाळ रेकॉर्ड आढळले भंगारात, गोंदियातील धामणगाव येथील प्रकार

 शाळेचे दस्तावेज, विद्यार्थ्यांचे टीसी, मार्कलिस्टसह दाखल्यांच्या नोंदी असलेला रेकार्ड चक्क भंगार विक्रेत्याच्या दुकानात सापडल्याची घटना गोंदियाच्या आमगाव तालुक्यातील धामणगाव येथे उघडकीस आली.

Feature Photo

गोंदिया:  एकीकडे आरक्षणाचा तिढा सोडवण्यासाठी निजामशाहीत नोंद केलेले दाखले शोधून काढले जात आहेत. तर दुसरीकडे 60 वर्ष जुने माजी विद्यार्थ्यांचे दाखले भंगारात विकल्याचं समोर आले आहे.  शाळेचे दस्तावेज, विद्यार्थ्यांचे टीसी, मार्कलिस्टसह दाखल्यांच्या नोंदी असलेला रेकार्ड चक्क भंगार विक्रेत्याच्या दुकानात सापडल्याची घटना गोंदियाच्या (Gondia News) आमगाव तालुक्यातील धामणगाव येथे उघडकीस आली. दरम्यान या प्रकारामुळे शाळा व्यवस्थापन समितीचा गलथान कारभार पुढे आला असून गावकऱ्यांनी या प्रकाराला घेवून संताप व्यक्त केला आहे. 

आमगाव पंचायत समिती अंतर्गत धामणगाव जिल्हा परिषद प्राथमिक शाळा आहे. या शाळेचा रेकार्ड मागील 20 वर्षांपासून गहाळ झाले होते. त्यामुळे विद्यार्थी व त्यांच्या पालकांना पाल्यांचे दाखले व शैक्षणिक कागदपत्रे मिळविण्यासाठी बरीच कसरत करावी लागत होती. यात 1960 पासूनच्या शैक्षणिक रेकार्डचा समावेश होता. मंगळवारी धामणगाव येथील भंगार विक्रेत्याकडे पाच पोत्यांमध्ये खरेदी केलेली रद्दी पडली होती. दरम्यान या विक्रेत्याच्या दुकानात गावातील एक तरुण बसला होता. त्याने पोत्यातील रद्दी पाहिली असता त्यात शाळेचे दाखल खारीज रजिस्टर व इतर दस्तावेज आढळले. त्याने अजून काही कागदपत्रे पाहिली असता त्याच्या कुटुंबातील एका व्यक्तीचे दाखल खारीज प्रमाणपत्र आढळले. 

शालेय व्यवस्थापन समितीच्या अध्यक्षांनी पंचनामा करुन कागदपत्रे ताब्यात घेतली

दरम्यान हे पाहून त्याला देखील धक्का बसला. त्यांने याची माहिती गावचे सरपंच व शाळा व्यवस्थापन समितीच्या पदाधिकारी व सदस्यांना दिली. त्यांनी भंगार विक्रेत्याच्या दुकानात पोहचत पाचही  पोत्यातील साहित्य तपासले. त्यात धामणगाव शाळेचा 20 वर्षांपूर्वी गहाळ झालेले शैक्षणिक रेकार्ड सापडले. सरपंच आणि शालेय व्यवस्थापन समितीच्या अध्यक्षांनी पंचनामा करुन ही कागदपत्रे ताब्यात घेतली. तसेच या रेकार्डची विक्री भंगार विक्रेत्याला कोणी केली याचा शोध घेतला जात आहे. तर याप्रकरणात शाळेचे मुख्याध्यापक यांनी फक्त एक रजिस्टर महत्वाचा होता व बाकी सर्व कामाचे नाहीत असे सांगितले आहे. तर शाळा व्यवस्थापन समितीचे अध्यक्ष यांनी कुठलाही ठराव रद्दी विकल्याचा आपल्याकडे आला नसल्याचे सांगितले आहे. एकीकडे महाराष्ट्रात मराठा आरक्षणाचा मुद्दा सुरू असतांना त्यांना 1967 पूर्वीचा नोंद असल्याचा पुरावा मागण्यात येत आहे. तर गोंदीयात चक्क शाळेतील 1960 पासूनचे नोंदीचे रेकॉर्ड रद्दीच्या दुकानात आढळले आहेत. 

हे ही वाचा :