Gadchiroli : गडचिरोलीत बिबट्यापासून बचावासाठी व्हिडीओ दाखवत असतानाच बिबट्याचा हल्ला, तर अहिल्यानगरमध्ये बैलगाडी भरून पत्रं

Gadchiroli Leopard Attack : एकीकडे गडचिरोलीमध्ये बिबट्याने तरुणावर हल्ला केला असताना दुसरीकडे अहिल्यानगरमध्ये 20 हजार शेतकऱ्यांनी पंतप्रधान मोदींना पत्र लिहिलं आहे. 

Leopard Attack Maharashtra

Source : abp majha

Gadchiroli Leopard Attack : गडचिरोली जिल्ह्यातील कुरखेडा तालुक्यात धक्कादायक घटना घडली आहे. बिबट्यापासून बचावासाठी वनविभागाकडून जनजागृतीपर चित्रफीत दाखवली जात असतानाच गावात दबा धरून बसलेल्या बिबट्याने एका 32 वर्षीय युवकावर हल्ला केला. ही घटना धमदीटोला येथे मंगळवारी रात्री 8 वाजताच्या सुमारास घडली. जखमी युवकाचे नाव सदानंद उईके असून त्याच्यावर उपचार सुरू आहेत.

जनजागृतीदरम्यानच हल्ला (Leopard Attack During Awareness Program)

मागील आठवडाभरापासून गडचिरोली जिल्ह्यातील धमदीटोला या गावात बिबट्याचा धुमाकूळ सुरू आहे. त्यामुळे गावकऱ्यांमध्ये भीतीचे वातावरण निर्माण झाल्याचं चित्र आहे. ही परिस्थिती लक्षात घेता वनविभागाचे पथक फिरते चित्रपटगृह घेऊन गावात दाखल झाले होते. बिबट्यापासून स्वतःचा बचाव कसा करावा याचे मार्गदर्शन सुरू असतानाच सदानंद उईके हा युवक लघुशंकेसाठी घराच्या मागील बाजूस गेला.

मात्र तिथे दबा धरून बसलेल्या बिबट्याने अचानक त्याच्यावर झडप घेतली. सदानंदने आरडाओरड केल्यानंतर चित्रफीत पाहणारे नागरिक आणि वनकर्मचारी घटनास्थळी धावले. लोकांची चाहूल लागताच बिबट्याने जंगलाच्या दिशेने पळ काढला. त्यामुळे मोठा अनर्थ टळला.

अहिल्यानगरमध्ये बिबट्यांचा वाढता वावर (Rising Leopard Movement in Ahilyanagar)

दरम्यान, अहिल्यानगर जिल्ह्यातही बिबट्यांच्या वाढत्या वावरामुळे भीतीचे वातावरण आहे. राहुरी तालुक्यातील शेतकऱ्यांनी थेट पंतप्रधान नरेंद्र मोदी यांना पत्रे पाठवून हस्तक्षेपाची मागणी केली आहे. सुमारे 20 हजार शेतकऱ्यांनी पंतप्रधानांना पत्र लिहित वन्यजीव संरक्षण कायद्यात बदल करून बिबट्यांची संख्या नियंत्रित करण्याची मागणी केली आहे.

बैलगाडीतून मोर्चा, पोस्ट कार्यालयात पत्रे जमा (Farmers Protest with Bullock Cart)

माजी मंत्री प्राजक्त तनपुरे यांच्या नेतृत्वाखाली राहुरी नगरपरिषद येथून बैलगाडीत शेतकऱ्यांची पत्रे आणि प्रतिकात्मक पिंजरा घेऊन मोर्चा काढण्यात आला. ही सर्व पत्रे राहुरी पोस्ट कार्यालयात जमा करण्यात आली.

ऊस शेतीमुळे वाढते हल्ले (Sugarcane Fields and Leopard Attacks)

अहिल्यानगर जिल्ह्यात उसाचे मोठे क्षेत्र असल्याने बिबट्यांना लपण्यासाठी अनुकूल जागा मिळते. ऊस तोडणी सुरू झाल्यानंतर त्यांचा वावर मानवी वस्तीत वाढतो. परिणामी मानवावर हल्ल्यांच्या घटना वाढत असल्याचे स्थानिकांचे म्हणणे आहे. वनविभागाकडून जनजागृती केली जात असली तरी प्रत्यक्ष कारवाई आणि ठोस उपाययोजनांची मागणी आता अधिक तीव्र होत आहे.

ही बातमी वाचा: