मका पिकाला लागलेली आग विझवताना मोठी दुर्घटना, भंडाऱ्यात शेतकऱ्याचा होरपळून मृत्यू

कापणी योग्य मका पिकाला लागलेली आग विझवताना एका शेतकऱ्याचा होरपळून दुर्दैवी मृत्यू झाला आहे. ही घटना भंडाऱ्याच्या साकोली इथं घडली आहे.

Bhandara Fire News

Source : Getty Images

Bhandara Fire News : कापणी योग्य मका पिकाला लागलेली आग विझवताना एका शेतकऱ्याचा होरपळून दुर्दैवी मृत्यू झाला आहे. ही घटना भंडाऱ्याच्या साकोली इथं घडली आहे. रामदास निंबेकर (65) असं मृत शेतकऱ्याचं नावं आहे. या घटनेमुळं परिसरात हळहळ व्यक्त केली जात आहे. 

साकोली येथील तलाव वॉर्ड परिसरातील निंबेकर यांच्या शेतात कापणी योग्य मका पीक असून त्याला अचानक आग लागली. याची माहिती मिळाल्यावर ते आग विझवण्याकरिता शेतात गेले. मात्र, आगीच्या ज्वाळा त्यांच्या कपड्याला लागली आणि त्यातच ते होरपळले. वेळेत कुठलीही मदत न मिळू शकल्यानं त्यांचा त्यात दुर्दैवी मृत्यू झाला. घटनेची माहिती मिळताच साकोली पोलीस आणि नगरपालिका प्रशासनाच्या अग्निशमन पथकानं घटनास्थळी जात आग आटोक्यात आणली. मात्र, यात रामदास निंबेकर यांचा होरपळून मृत्यू झाल्यानं मृतदेह हाती लागला. याप्रकरणी अधिक तपास साकोली पोलीस करीत आहे.

परभणी जिल्ह्यातील  पाथरी-माजलगाव महामार्गावर भीषण अपघात, दोन सख्ख्या भावांचा जागीच मृत्यू

परभणी जिल्ह्यातील  पाथरी-माजलगाव महामार्गावर भीषण अपघात झाल्याची घटना घडली आहे. अज्ञात वाहनाच्या धडकेत दोन सख्ख्या भावांचा जागीच मृत्यू झाल्याची दुर्दैवी घटना घडली आहे. पाथरी-माजलगाव राष्ट्रीय महामार्गावर ढालेगावजवळील रामपुरी खुर्द शिवारात ही घटना घडली. या घटनेमुळं परिसरात हळहळ व्यक्त होत आहे. या प्रकरणी पाथरी पोलीस ठाण्यात अज्ञात वाहनधारकाविरोधात गुन्हा दाखल करण्यात आला आहे. 

अज्ञात वाहनधारकाविरोधात गुन्हा दाखल 

अज्ञात वाहनाने दुचाकीला दिलेल्या जोरदार धडकेत दोन सख्ख्या भावांचा दुर्दैवी मृत्यू झाल्याची हृदयद्रावक घटना घडली आहे. या घटनेमुळे परिसरात हळहळ व्यक्त होत असून पाथरी पोलीस ठाण्यात अज्ञात वाहनधारकाविरोधात गुन्हा दाखल करण्यात आला आहे. माजलगाव तालुक्यातील रेनापुरी येथील 28 वर्षीय रवींद्र शिवाजी घडशिंगे व 22 वर्षीय विशाल शिवाजी घडशिंगे हे दोघे सख्खे भाऊ मानवत येथे नातलगांना भेटण्यासाठी गेले होते. नातलगांची भेट घेऊन ते आपल्या मोटारसायकलवरून (एमएच 44 एबी 2625) पाथरी मार्गे रेनापुरीकडे परतत होते. दरम्यान, ढालेगाव-पाथरी दरम्यान रामपुरी खुर्द शिवारात त्यांच्या दुचाकीला भरधाव अज्ञात वाहनाने जोराची धडक दिली. हा अपघात इतका भीषण होता की दोघांचाही जागीच मृत्यू झाला. घटनेची माहिती मिळताच परिसरातील नागरिकांनी घटनास्थळी धाव घेत मदतकार्य सुरू केले. मात्र, दोघांचाही मृत्यू झाल्याचे स्पष्ट झाले. याप्रकरणी मयतांचे वडील शिवाजी मळीबा घडशिंगे यांच्या फिर्यादीवरून पाथरी पोलीस ठाण्यात अज्ञात वाहनधारकाविरोधात गुन्हा दाखल करण्यात आला असून पोलिसांनी फरार वाहनाचा शोध सुरू केला आहे.