Bhandara Ordance Factory Blast : भंडारा ऑर्डनन्स फॅक्टरी स्फोटाच्या चौकशीसाठी SIT स्थापन; 9 सदस्यीय समिती करणार दुर्घटनेची चौकशी
Bhandara : भंडाऱ्याच्या जवाहरनगर येथील आयुध निर्माण कंपनीत काल (24 जानेवारीला) भीषण स्फोट झालला या प्रकरणी आता भंडारा जिल्हा पोलीस अधीक्षक नुरुल हसन यांनी 9 सदस्यीय एक एसआयटी गठीत केली आहे.
Bhandara News : भंडाऱ्याच्या जवाहरनगर येथील आयुध निर्माण कंपनीत काल(24 जानेवारीला) भीषण स्फोट (Bhandara Factory Explosion) झाला. या दुर्घटनेत आतापर्यंत 8 कामगारांना आपला जीव गमवावा लागला तर, 5 कामगार हे मृत्यूशी झुंज देत असल्याची माहिती पुढे आली आहे. या घटनेची संपूर्ण चौकशी व्हावी, यासाठी भंडारा जिल्हा पोलीस अधीक्षक नुरुल हसन यांनी 9 सदस्यीय एक एसआयटी गठीत केली आहे. या एसआयटीत आयुध निर्माणी कंपनीतील कुणाचाही समावेश नसल्यानं ही चौकशी समिती निष्पक्षपणे चौकशी करेल, असा विश्वास निरुल हसन यांनी व्यक्त केला आहे.
संतप्त ग्रामस्थांचा ऑर्डनन्स फॅक्टरीच्या प्रवेशद्वारावर आंदोलन
दरम्यान, ऑर्डनन्स फॅक्टरीमध्ये झालेल्या स्फोटात 20 वर्षीय अप्रेंटिस धारक अंकित बारई हिचा मृत्यू झाला होता. त्यानंतर अंकित बारईचे कुटुंबिय आक्रमक झाले आहेत. आर्थिक मदतीसह कुटुंबातील एका सदस्याला शासकीय नोकरीत समावेश करण्याची मागणी त्यांच्या कुटुंबियांनी केली आहे. शिवाय मागण्या पूर्ण झाल्याशिवाय मृतदेह घरी नेणार नाही, असा आक्रमक पवित्रा बारई यांच्या कुटुंबियांनी घेतलाय. तर आज पुन्हा संतप्त ग्रामस्थांनी आयुध निर्माण फॅक्टरीच्या प्रवेश द्वारावर आंदोलन सुरू केलं आहे. साहुली गावातील २० वर्षीय अंकित बाराई या अप्रेंटीस करणाऱ्या तरुणाचा मृत्यू झाला. त्यामुळे ऑर्डनन्स फॅक्टरीतील जबाबदार अधिकारी आणि कर्मचाऱ्यांना अटक झाली पाहिजे, अशा घोषणा देत गावाचं पुनर्वसन झालं पाहिजे, अशी मागणी या ग्रामस्थाकडून केली जात आहे.
मृतक कामगारांचे आज होणार शवविच्छेदन; मात्र कुटुंबियांचा आक्रमक पवित्रा
ऑर्डनन्स फॅक्टरीतील भीषण स्फोटमध्ये 8 कामगारांचा मृत्यू झाला होता. त्या 8 कामगारांचे मृतदेह रात्री उशिरापर्यंत भंडारा येथील जिल्हा सामान्य रुग्णालयात आणण्यात आले असून आज (25 जानेवारी) त्यांचे शवविच्छेदन होणार आहे. एक मृतदेह कुटुंबीयांना सुपूर्द करण्यात आला असून उर्वरित 7 मृतदेह हे जिल्हा रुग्णालयात आहेत. मात्र मृतक कामगारांच्या कुटुंबियांनी आर्थिक मदतीची मागणी, तसेच कुटुंबातील एका सदस्याला शासकीय नोकरी देण्यात यावी, अशी मागणी लावून धरली आहे. जोपर्यंत मागण्या पूर्ण होणार नाही तोपर्यंत मृतदेह उचलणार नाही, असी आक्रमक भूमिका घेतल्याने आज प्रशासनाकडून त्यांची मनधरणी करण्याचा प्रयत्न होणार आहे.
आयुध निर्माणी कंपनीतील भीषण स्फोटाच्या घटनेनंतर घटनास्थळावर एनडीआरएफ आणि एसडीआरएफचे पथक पोहोचलं होतं. या पथकाला बचाव कार्य करून तेरा जणांना मालब्याखालून बाहेर काढलं होतं. त्यातील आठ जणांचा मृत्यू, तर पाच जण गंभीर जखमी आहेत. घटनास्थळावर बचाव पथक कार्य करतानाचे महत्त्वाचे व्हिडिओ आणि फोटोज एबीपी माझाच्या हाती लागले आहेत.
इतर महत्वाच्या बातम्या
महत्त्वाच्या बातम्या
