Beed Morcha: 400 अंमलदार, 4 डीवायएसपी तैनात, वाहतुकीत बदल; बीडच्या मोर्चासाठी पोलीस प्रशासनाची फिल्डिंग
Santosh Deshmukh Murder case: संतोष देशमुख हत्याप्रकरणात वाल्मिक कराड आणि धनंजय देशमुख यांच्यावर गंभीर आरोप. बीडमधील मोर्चाकडे सर्वांचे लक्ष
बीड: मस्साजोग गावचे सरपंच संतोष देशमुख यांच्या मारेकऱ्यांना तातडीने अटक करण्याच्या मागणीसाठी शनिवारी बीडमध्ये सर्वपक्षीय मोर्चा काढण्यात येणार आहे. या मोर्चात जिल्ह्यातील प्रमुख राजकीय नेते आणि मराठा आंदोलक मनोज जरांगे हे सहभागी होणार आहेत. या मोर्चात आजुबाजूच्या तब्बल 50 गावांमधील नागरिक सहभागी होणार आहेत. या पार्श्वभूमीवर कोणताही अनुचित प्रकार किंवा घटना टाळण्यासाठी बीडमध्ये पोलीस प्रशासनाकडून चोख तयारी करण्यात आली आहे.
बीडमधील सर्वपक्षीय मोर्चासाठी संपूर्ण शहरात कडेकोट पोलीस बंदोबस्त असेल. त्यासाठी शहरात 400 अंमलदार, वाहतुकीचे 70 अंमलदार, वरिष्ठ अधिकारी 4 पोलीस उपाधीक्षक, इन्चार्ज ऑफिसर, एक अतिरिक्त पोलीस अधीक्षक तैनात असतील. या सर्व अधिकाऱ्यांच्या नेतृत्त्वाखाली याव्यतिरिक्त दंगल नियंत्रण पथक अर्थात आरसीपीची 6 पथके, राज्या राखीव पोलीस दलाच्या 2 एसआरपीएफ कंपनी आणि अधिक अतिरिक्त बंदोबस्त असणार आहे. या मोर्चामुळे बीड शहरातील वाहतुकीतही बदल करण्यात आला आहे. ज्या मार्गावरुन मोर्चा जाणार आहे, तिथे विशेष खबरदारी बाळगण्यात येणार आहे. मोर्चा ज्या भागातून जाईल तेथील इमारतींवर नजर ठेवली जाणार आहे. या मोर्चात वाहनांना प्रवेश देऊ नये, पोलिसांना सहकार्य करावे, असे आवाहन पोलीस दलाकडून मोर्चेकऱ्यांना करण्यात आल्याची माहिती अप्पर पोलीस अधीक्षक सचिन पांडकर यांनी दिली. दरम्यान सरपंच संतोष देशमुख यांच्या हत्याप्रकरणाचा तपास सीआयडी कडे वर्ग करण्यात आल्याने याबाबतची अधिक माहिती सीआयडीच्या माध्यमातून दिली जाईल असे अप्पर पोलीस अधीक्षक सचिन पांडकर यांनी सांगितले आहे.
संतोष देशमुख हत्याप्रकरणाच्या तपासाला वेग
संतोष देशमुख हत्याप्रकरणातील मारेकऱ्यांना पकडण्यासाठीचा सरकारवरील दबाव वाढला आहे. त्यामुळे बीडमध्ये पोलीस प्रशासनाच्या हालचालींना वेग आला आहे. सीआयडीचे महासंचालक प्रशांत बोरुडे यांच्याकडून हत्याप्रकरणातील आरोपी विष्णू चाटे याची चौकशी केली जात आहे. सलग दुसऱ्या दिवशी सीआयडीचे अप्पर पोलीस महासंचालक बीडमध्ये तळ ठोकून आहेत. कालच प्रशांत बोरुडे यांनी बीडमधील पोलीस अधिकाऱ्यांकडून याप्रकरणाची माहिती घेतली होती. यानंतर आज दुसऱ्या दिवशीही सीआयडीचे अप्पर पोलीस महासंचालक प्रशांत बोरुडे बीड शहर पोलीस स्टेशनमधून तपासाची सूत्रे हाताळत आहेत.
संतोष देशमुखांच्या मुलीचं भावनिक आवाहन
संतोष देशमुख यांना न्याय मिळावा या मागणीसाठी शुक्रवारी लातूर जिल्ह्यातील रेणापूर येथे आक्रोश मोर्चा काढण्यात आला होता. संतोष देशमुख यांची कन्या आणि मुलगा या मोर्च्यात हजर होते. यावेळी वैभवी संतोष देशमुख हिने एक छोटेखानी भाषण केले. आमच्या परिवाराच्या मागे आपण उभे राहा, या प्रकरणातील दोषी लोकांना तात्काळ जेरबंद करून कडक कारवाई करावी, अशी मागणी संतोष देशमुख यांच्या मुलीने केली. तसेच सरकारने ठोस पाऊल नाही उचलले तर एक जानेवारीला रेणापूर येथे चक्काजाम आंदोलन करण्यात येणार आहे.
आणखी वाचा
महत्त्वाच्या बातम्या
