शिर्डी विमानतळाला जंगम मालमत्ता जप्तीचं वॉरंट, थकबाकी वसुलीसाठी काकडी ग्रामपंचायतीकडून कारवाई
Shirdi Airport : शिर्डी आंतरराष्ट्रीय विमानतळाकडे असलेली थकीत कराची बाकी रक्कम न भरल्याने जंगम मालमत्ता जप्तीचे वॉरंट काकडी ग्रामपंचायतीने विमानतळ प्रशासनास दिले आहे.
शिर्डी : येथील आंतरराष्ट्रीय विमानतळाकडे (Shirdi Airport) असलेली थकीत कराची बाकी रक्कम न भरल्याने जंगम मालमत्ता जप्तीचे वॉरंट काकडी ग्रामपंचायतीने विमानतळ प्रशासनास दिले आहे. कोपरगाव (Kopargaon) तालुक्यातील काकडी येथे असलेल्या शिर्डी विमानतळाकडे काकडी ग्रामपंचायतीची (kakadi Grampanchayat) कराची रक्कम सातत्याने पाठपुरावा करुनही मिळत नसल्याने महाराष्ट्र ग्रामपंचायत अधिनियम 1958 कलम 129 अन्वये ही कारवाई करण्यात आली आहे.
ग्रामपंचायतीने महाराष्ट्र विमान विकास प्राधिकरण कंपनी, मुंबई यांना पाठविलेल्या पत्रात म्हटले आहे की, करबाकी भरण्याबाबत सातत्याने दिलेली पत्रे, फेब्रुवारी 2023 मध्ये दिलेले अंतिम स्मरणपत्र, 24 मार्च 2024 रोजी हुकूम नोटीस, 129 प्रमाणे दिलेली करवसुली नोटीस, राष्ट्रीय लोकअदालत नोटीस, ग्रामपंचायतीचा मासिक सभा ठराव देऊनही कर भरणा केलेला नाही.
अनेकदा बजावली नोटीस
त्यामुळे आपल्या शिर्डी आंतरराष्ट्रीय विमानतळाकडे असलेली थकीत कराची वसुली करण्यासाठी महाराष्ट्र ग्रामपंचायत अधिनियम 1958 कलम 124 व कलम 129 अन्वये मिळकतीप्रमाणे मागणी बिले, नोटीस, रिट हुकूम, लोकअदालत नोटीस बजावलेल्या आहेत. थकबाकी वसुली करण्याच्या अनुषंगाने महाराष्ट्र ग्रामपंचायत अधिनियम 1958 कलम 129 नुसार खालीलप्रमाणे जंगम मालमत्ता असून सदरील जंगम मालमत्ता कराची थकबाकी न भरल्यामुळे मालमत्तांचे येणे आहे.
2016 सालापासून विमानतळाकडे थकबाकी
करपात्र जंगम मालमत्ता आरसीसी पद्धतीचे घर टर्मिनल बिल्डिंग पहिला मजला, आरसीसी पद्धतीचे घर टर्मिनल बिल्डिंग (पोर्च), आरसीसी पद्धतीचे घर पेव्हर ब्लॅक एरिया पहिला मजला, आरसीसी पद्धतीचे घर इंडियन आईल पंप पहिला मजला, आरसीसी पद्धतीचे घर सबस्टेशन बिल्डिंग पहिला मजला, आरसीसी पद्धतीचे घर पॉवर (जेनरेटर बिल्डिंग) पहिला मजला, मनोरा तळ घर एटीसी टाबर पहिला मजला, आरसीसी पद्धतीचे घर रनवे पहिला मजला, आरसीसी पद्धतीचे घर जीएसआर वॉटर टैंक पहिला मजला, आरसीसी पद्धतीचे घर वॉल कंपाउंड पहिला मजला, आरसीसी पद्धतीचे घर पार्किंग रस्ता नं. 1 पहिला मजला, आरसीसी पद्धतीचे घर पार्किंग रस्ता नं. 2 पहिला मजला, पडसर खुली जागा 823.50 एकर जागांवर ग्रामपंचायतीने 2016-17 पासून कर आकारणी केलेली आहे. 8 कोटी 30 लाख रुपये कराची रक्कम ग्रामपंचायत कार्यालयास जमा होत नसल्याने गावच्या सर्वांगीण विकासावर व दैनंदिन कामकाजावर परिणाम होत आहे. त्यामुळे थकबाकी वसुलीकरिता जंगम मालमत्ता जप्ती वॉरंट बजावण्यात येत वॉरंटमध्ये नमूद करण्यात आले आहे.
आणखी वाचा
महत्त्वाच्या बातम्या
