नाट्यरसिकांची 10 महिन्यांची प्रतीक्षा संपली, उद्या पहिला प्रयोग सादर होणार!

रसिकांची प्रतीक्षा संपली असून नाट्यगृहांची तिसरी घंटा वाजणार आहे. सुमारे दहा महिन्यांनंतर प्रबोधनकार केशव सीताराम ठाकरे नाट्य मंदिरात उद्या म्हणजेच 20 डिसेंबरला पहिला प्रयोग सादर होणार आहे. "इशारो इशारो में" हे पहिले नाटक संध्याकाळी साडेचार वाजता सुरु होईल.

मुंबई : नाट्यरसिकांची प्रतीक्षा अखेर संपली आहे. बोरिवली (पश्चिम) येथील प्रबोधनकार केशव सीताराम ठाकरे नाट्यमंदिर संकुलात सुमारे दहा महिन्यांच्या कालावधीनंतर पहिला नाट्यप्रयोग रविवार दिनांक 20 डिसेंबर 2020 रोजी दुपारच्या सत्रात सादर होणार आहे. "इशारो इशारो में" हे पहिले नाटक संध्याकाळी साडेचार वाजता सुरु होईल. प्रयोग सादरीकरणासाठी हे नाट्यगृह कोविड 19 प्रतिबंधात्मक उपाययोजनांसह सुसज्ज झाले आहे.

कोविड 19 या संसर्गजन्य महामारीच्या पार्श्वभूमीवर टाळेबंदीचा भाग म्हणून मार्च 2020 पासून बंद ठेवण्यात आलेली नाट्यगृहे आता खुली करण्यात आली आहेत. राज्याचे मुख्यमंत्री उद्धव ठाकरे यांच्या निर्देशानुसार, मिशन बिगीन अगेन अर्थात पुनश्च हरिओम अंतर्गत अटी आणि शर्तींसह ही नाट्यगृहे सुरु होत आहेत.

बोरिवली येथील प्रबोधनकार केशव सीताराम ठाकरे नाट्यमंदिर संकुलातील मुख्य व लघु नाट्यगृहांची सुविधा देखील या अटी व शर्तींसापेक्ष तसेच महानगरपालिका आयुक्तांच्या मंजुरीन्वये सुरु करण्यात येत आहे. या नाट्य संकुलाचे संपूर्ण निर्जंतुकीकरण करण्यात आले असून सर्व तांत्रिक उपकरणांची तपासणी करण्यात आली आहे. राज्य शासनाच्या निर्देशांनुसार आसनक्षमता 50 टक्के राखण्यात आली आहे. प्रयोग सादरीकरणासाठी नाट्यगृह सुसज्ज आहे. येणाऱया नाट्य रसिकांचे, अभ्यागतांचे शारीरिक तापमान मोजण्यासाठी नाट्य संकुलाच्या प्रवेशद्वारांवर थर्मल स्क्रीनिंग केले जाणार आहे.

मुंबई महानगरपालिकेची नाट्यगृहे सवलतीच्या दरात नाट्य प्रयोगांसाठी उपलब्ध करुन देण्यात येत असल्याचे मुंबईच्या महापौर किशोरी किशोर पेडणेकर यांनी नुकतेच जाहीर केले आहे. प्रबोधनकार केशव सीताराम ठाकरे नाट्यमंदिर संकुलातही सवलतीच्या दरात आरक्षण करुन दिनांक 20 डिसेंबर 2020 रोजी दुपार सत्रात पहिला प्रयोग सादर करण्यात येणार आहे. मार्च 2020 पासून बंद असलेली नाट्यगृहाची सुविधा जवळपास दहा महिन्यांनंतर सुरु होत आहे. नाट्यरसिकांसाठी ही पर्वणी असणार आहे.