येतेय आणखी एक गूढ मालिका ‘सांग तू आहेस का’

स्टार प्रवाह वाहिनी एक हटके आणि नव्या धाटणीची मालिका घेऊन प्रेक्षकांच्या भेटीला येणार आहे. यात सिद्धार्थ चांदेकर, शिवानी रांगोळे, सानिया चौधरी प्रमुख भूमिकेत आहेत.

मनोरंजनाच्या प्रवाहात नवनवे प्रयोग करणारी स्टार प्रवाह वाहिनी अशीच एक हटके आणि नव्या धाटणीची मालिका घेऊन प्रेक्षकांच्या भेटीला येणार आहे. या नव्या मालिकेचं नाव आहे ‘सांग तू आहेस का’. सध्या या मालिकेच्या प्रोमोजनी सर्वांचच लक्ष वेधून घेतलं आहे. खऱ्या प्रेमाचा शेवट कधीच होत नाही असं म्हणतात. ‘सांग तू आहेस का’ मालिकेच्या निमित्ताने अशीच एक अनोखी प्रेमकथा प्रेक्षकांना अनुभवता येणार आहे. खास बात म्हणजे लव्हस्टोरी आणि हॉरर या दोन्ही जॉनरचा अनोखा मिलाफ या मालिकेच्या निमित्ताने प्रेक्षकांना अनुभवायला मिळणार आहे. सिद्धार्थ चांदेकर, शिवानी रांगोळे आणि सानिया चौधरी या मालिकेत मुख्य भूमिकेत असून 7 डिसेंबरपासून रात्री 10 वाजता ही मालिका भेटीला येणार आहे.

या मालिकेचं वेगळेपण सांगताना स्टार प्रवाहचे कार्यक्रम प्रमुख सतीश राजवाडे म्हणाले, ‘एखादी गोष्ट रसिकांना खिळवून ठेवते त्यांची उत्कंठा वाढवते असं ऐकलं की ती गोष्ट सांगायला अजून हुरुप येतो. सांग तू आहेस का अशीच मालिका आहे. त्याचं कथानक अनेक प्रश्न पडत पुढे पुढे सरकणारं आहे. लव्हस्टोरी आणि त्यात गूढ असा या मालिकेचा बाज असल्यामुळे पुढे काय उलगडेल याची हुरहुर सतत मनाला लागून राहिल.’

गेल्या काही आठवड्यांपासून स्टार प्रवाह ही वाहिनी क्रमांक एकवर आली आहे. मालिकेचा टीआरपी वाढला आहे. गेल्या काही महिन्यांपासून रंग माझा वेगळा, आई कुठे काय करते आदी मालिकांनी रसिकांच्या मनाचा ठाव घेतला आहे. आता आणखी एक मालिका स्टार प्रवाहवर येत असून या मालिकेचा बाज गूढ असा आहे. ती मालिका नेहमी काय आहे, कशी ती रंगत जाणार आहे ते अद्याप कळायला मार्ग नाही. पण हळूहळू या मालिकेचे पदर उलगडत जातील. सिद्धार्थ चांदेकर हा युवा अभिनेता आता या निमित्ताने पुन्हा एकदा स्टार प्रवाहवर येतो आहे. याआधी स्वप्नील जोशी, अमृता खानविलकर आणि सिद्धार्थ चांदेकर यांची मालिका स्टार प्रवाहवर आली होती.