Supriya Pilgaonkar : अवघ्या 18 वर्षी लग्न, सबनीस ते पिळगांवकर होतानाचा 'तो' दिवस; सुप्रिया पिळगांवकर म्हणाल्या...
Supriya Pilgaonkar - Sachin Pilgaonkar : सचिन पिळगांवकरांसोबत लग्न करतानाचा तो दिवस कसा होता याविषयी सुप्रिया पिळगांवकर व्यक्त झाल्या आहेत.
Supriya Pilgaonkar - Sachin Pilgaonkar : सुप्रिया पिळगांवकर (Supriya Pilgaonkar) यांनी वयाच्या अवघ्या 18 व्या वर्षी सचिन पिळगांवकर (Sachin Pilgaonkar) यांच्यासोबत लग्नगाठ बांधली. त्यानंतर सचिन-सुप्रिया ही जोडी देखील महाराष्ट्राच्या पसंतीस उतरली. जवळपास या जोडीने आता 40 वर्षांचा संसार केलाय. अनेक चढ-उतार, आनंदाचे क्षण या जोडीने एकत्र साजरे केलेत. त्याचप्रमाणे महाराष्ट्राच्या प्रेक्षकांचं खळखळून मनोरंजनही केलंय.
सचिन पिळगांवकर आणि सुप्रिया पिळगांवकर यांनी नुकतीच लोकमत फिल्मीला मुलाखत दिली. त्यामध्ये या दोघांनीही त्यांच्या लग्नाच्या आठवणी शेअर केल्या आहेत. त्याचप्रमाणे जेव्हा लग्न होणार होतं, त्या दिवशी मी खूप रडले होते, तो दिवस माझ्यासाठी भयंकर होता, असा खुलासा देखील सुप्रिया पिळगांवकर यांनी केला आहे.
तो दिवस माझ्यासाठी भयंकर - सुप्रिया पिळगांवकर
सुप्रिया पिळगांवकर यांनी त्यांच्या लग्नाच्या आठवणी शेअर करताना म्हटलं की, 'सबनीसांची पिळगांवकर होतानाचा तो दिवस मला चांगलाच आठवतोय. कारण सगळं झाल्यानंतर मला जेव्हा जाणीव झाली की आता आईबाबांना सोडून जायचंय. तो दिवस खूप कठिण होता माझ्यासाठी, खूप रडले होते मी तेव्हा. तो दिवस खूपच भयंकर होता, कारण काय करतोय, कुठे जातोय असं सगळंच मला आठवत होतं. कारण माझं वय अगदीच हे 18 वर्ष वैगरे होतं. त्यावर सचिन पिळगांवकरांनी म्हटलं की, तिच्या आईवडिलांपेक्षा जास्त दिवस तिने माझ्यासोबत काढली आहेत.'
'मला मराठी मुलीशीच लग्न करायचं होतं...'
'ती मला पहिल्यांदाच आवडली होती. पण हिच्याशीच आपण लग्न करायला हवं, हे मी तिच्या आईवडिलांना भेटून ठरवलं. कारण त्या दोघांनी तिच्यावर केलेले संस्कार, ते दोघेही किती सुसंकृत आहेत, हे मला त्यांना भेटल्यानंतर कळलं. मला माझ्या आयुष्यातली जोडीदार ही अतिशय संस्कारी हवी होती. मी आधीपासूनच ठरवलं होतं की, मी मराठी मुलीशीच लग्न करणार. त्यामध्ये अरेंज मॅरेज करायचं नाही आणि मराठी मुलीशीच लग्न करायचं या दोन गोष्टींवर मी ठाम होतो', असं सचिन पिळगांवकर यांनी म्हटलं.
'या गोष्टीचा मला खूप अभिमान'
संसाराला 40 वर्ष झाली तरीही आज तुम्हाला सचिन पिळगांवकरची बायको म्हणून ओळखतात या सगळ्याकडे तुम्ही कसं पाहता. त्यावर सुप्रिया पिळगांवकर यांनी म्हटलं की, 'तुम्हाला विश्वास बसणार नाही, पण मला कधी सुप्रिया अशी हाक ऐकूच आली नाही. ती हाक नेहमीच सचिनची बायको अशीच हाक ऐकू आली आहे. मी मराठीत सुद्धा एवढं काम केलं आहे पण तरीही माझी ओळख ही सचिनची बायको अशीच आहे आणि याचा मला खूप अभिमान आहे. उलट मला खूप कौतुक आहे, या गोष्टीचं की ते मला सचिनची बायको म्हणूनच ओळखतात. इथे मला काही माझी वेगळी ओळख असं मला अजिबात वाटत नाही.'
ही बातमी वाचा :
महत्त्वाच्या बातम्या
