लाईट्स, कॅमेरा, अॅक्शन... मेट्रो झाली 'कमाईची मशीन'! लोकार्पणानंतर लाईन 2B वर शूटिंगमधून किती कमाई?
मुंबई मेट्रोच्या या नव्या प्रयोगामुळे भविष्यात मेट्रो नेटवर्क केवळ प्रवासाचं साधन न राहता ‘कमाई आणि क्रिएटिव्हिटीचं केंद्र’ बनण्याची चिन्हं दिसत आहेत.
Mumbai Metro Film Shooting:मुंबई मेट्रो आता केवळ प्रवासापुरती मर्यादित न राहता ‘कमाईचं नवं साधन’ बनू लागली आहे. MMRDAने मुंबई मेट्रो लाईन 2B वर पहिल्यांदाच व्यावसायिक जाहिरात चित्रीकरण यशस्वीरीत्या पूर्ण केलं आहे. या उपक्रमातून तब्बल ₹20.35 लाखांचा (GST सहित) महसूल मिळाल्याने मेट्रो व्यवस्थेच्या आर्थिक मॉडेलला नवी दिशा मिळाली आहे. मुंबईच्या मेट्रो व्यवस्थेच्या उत्क्रांतीतील हा एक महत्त्वाचा टप्पा मानला जात आहे.
स्टेशन ते ट्रेन… सर्वत्र ‘लाइट, कॅमेरा, अॅक्शन!’
हे चित्रीकरण मंडाले मेट्रो स्थानक आणि धावत्या मेट्रो रेल्वेमध्ये करण्यात आलं. मुंबई महानगर प्रदेश विकास प्राधिकरणाच्या ‘प्रिमायसेस हायरिंग पॉलिसी’ अंतर्गत हा उपक्रम राबवण्यात आला. त्यामुळे मेट्रोची पायाभूत सुविधा केवळ प्रवासी सेवेसाठीच नव्हे, तर व्यावसायिक वापरासाठीही खुली होत असल्याचं स्पष्ट झालं आहे.
नॉन-फेअर महसुलात वाढ
MMRDA चा फोकस आता ‘नॉन-फेअर बॉक्स रेव्हेन्यू’ (NFBR) वाढवण्यावर आहे. म्हणजेच तिकीटाशिवाय इतर स्रोतांमधून उत्पन्न वाढवणं. या दिशेने हा उपक्रम महत्त्वाचा टप्पा मानला जातो.
2024–25 : ₹20.41 लाख
2025–26 : ₹25.96 लाख
2026–27 (सुरू) : ₹20.35 लाख
याशिवाय जाहिराती, टेलिकॉम सेवा, EV चार्जिंग, किऑस्क्स, ब्रँडिंग हक्क आणि चित्रीकरण यांसारख्या माध्यमांतूनही महसूल वाढवला जात आहे. मागील वर्षात NFBR मधून सुमारे ₹81 कोटींची कमाई झाली आहे.
मेट्रो बनतेय ‘क्रिएटिव्ह हब’
महा मुंबई मेट्रोने निर्माते, चित्रपट दिग्दर्शक आणि कंटेंट निर्मात्यांना मेट्रोच्या जागतिक दर्जाच्या पायाभूत सुविधांचा वापर करण्यासाठी खुले आमंत्रण दिले आहे. सुस्पष्ट धोरणे आणि सुलभ मंजुरी प्रक्रिया यामुळे अशा उपक्रमांची अंमलबजावणी जलद आणि सुसंगतपणे होणार असून, प्रवासी सेवांवर कोणताही परिणाम होणार नाही, याची दक्षता घेतली जात आहे. हा उपक्रम एमएमआरडीएच्या भविष्याभिमुख, आर्थिकदृष्ट्या सक्षम आणि बहुउद्देशीय मेट्रो व्यवस्थेच्या दृष्टीकोनाला अधोरेखित करतो.जिथे पायाभूत सुविधा केवळ प्रवास सुलभ करत नाहीत, तर नवोन्मेषी महसूल स्रोतांद्वारे मूल्यनिर्मिती करत ‘अधिक सक्षम आणि एकात्मिक मुंबई महानगर प्रदेशा’च्या उभारणीला चालना देतात.
MMRDA चे महानगर आयुक्त डॉ. संजय मुखर्जी यांनी सांगितलं की, मेट्रो पायाभूत सुविधा बहुआयामी मालमत्ता म्हणून विकसित करण्यावर भर आहे. तिकीटाव्यतिरिक्त महसूल वाढवून आर्थिकदृष्ट्या सक्षम आणि परवडणारी सेवा देण्याचा उद्देश आहे.मुंबई मेट्रोच्या या नव्या प्रयोगामुळे भविष्यात मेट्रो नेटवर्क केवळ प्रवासाचं साधन न राहता ‘कमाई आणि क्रिएटिव्हिटीचं केंद्र’ बनण्याची चिन्हं दिसत आहेत.
महत्त्वाच्या बातम्या
