Mahesh Kothare on Inspector Jadhav: कोठारे आडनाव असताना इन्स्पेक्टर महेश जाधव नाव का वापरलं? महेश कोठारे यांनी सांगितला रंजक किस्सा, म्हणाले...
अभिनेते महेश कोठारे यांनी या नावामागचा रंजक किस्सा सांगितला. अलीकडेच नाफा फेस्टिवलच्या निमित्ताने एबीपी माझाच्या ' कॉफी विथ कौशिक' मध्ये ते बोलत होते.
Mahesh kothare on inspector Jadhav:मराठी चित्रपटसृष्टीतील दिग्गज अभिनेते महेश कोठारे ( Mahesh kothare) म्हटलं की त्यांचा 'डॅमिट' प्रत्येकालाच आठवतो. यांच्या अनेक चित्रपटांमध्ये त्यांनी इन्स्पेक्टरची भूमिका साकारली होती. त्यांच्या पात्राचं नाव कायम इन्स्पेक्टर महेश जाधव असं असायचं. कोठारेंच्या चित्रपटात कायम लक्ष्मीकांत बेर्डे यांच्या पात्राला त्यांचं खरं नाव असायचं. महेश कोठारेंच्याही अनेक भूमिकांमध्ये त्यांचं पहिलं नाव महेशच असायचं. पण, 'महेश कोठारे' हेच नाव का नाही वापरलं असा प्रश्न त्यांना विचारण्यात आला. त्यावर अभिनेते महेश कोठारे यांनी या नावामागचा रंजक किस्सा सांगितला. अलीकडेच नाफा फेस्टिवलच्या निमित्ताने एबीपी माझाच्या ' कॉफी विथ कौशिक' मध्ये ते बोलत होते.
इन्स्पेक्टर महेश जाधव नावामागचा रंजक किस्सा ..
अभिनेते महेश कोठारे यांनी अनेक चित्रपटांमध्ये इन्स्पेक्टर जाधव हे पात्र साकारला आहे. कोठारे एवढं चांगलं आडनाव असताना जाधव आडनावाची भुरळ कशी पडली? असं त्यांना विचारण्यात आलं. त्यावेळी 'इन्स्पेक्टर जाधव 'या नावाचा एक रंजक किस्सा त्यांनी सांगितला. ते म्हणाले, " का कुणास ठाऊक, पण इन्स्पेक्टर आणि जाधव हे एकत्र फार चांगले जातात, असं मला वाटतं. म्हणून इन्स्पेक्टर महेश जाधव. एकदा मी एका पोलीस स्टेशनमध्ये कामासाठी गेलो होतो. त्यावेळी माझ्यासमोर एक इन्स्पेक्टर आला, आणि त्याचंही नाव होतं महेश जाधव. त्यांचं नाव ऐकून मला धक्का बसलेला. मी त्यांना म्हणालो, आता तुम्हाला मला या भूमिकेसाठी मदत करावी लागेल.' त्यांचे उत्तरावर उपस्थित यामध्ये हशा पिकला होता.
समाजात घडणाऱ्या गोष्टींवर राजकीय गोष्टींवर कलाकार म्हणून व्यक्त व्हावं का? या प्रश्नावर महेश कोठारे म्हणाले,"मत व्यक्त करण्यासाठी त्या आधी असायला हवं. कायम माझं एकच मत आहे, लोकांचं मनोरंजन करणे. त्या पद्धतीने मी काम करत आलो. त्यामुळे मला मत व्यक्त करताना कधी विचारच करावा लागला नाही. मी कायम लोकांची करमणूक केली, हाच माझा हेतू होता. हेच ध्येय होतं. त्यामुळे कधीही कुठल्या कॉन्ट्रवर्सीमध्ये पडायचं भानगडीत मी पडलो नाही.' राजकीय गोष्टींवर व्यक्त व्हावं असं वाटतं का असं पुन्हा एकदा विचारल्यानंतर ते म्हणाले 'तुम्ही नक्की काय विचारता हे मला कळतंय. त्यामुळे मी तुमच्या ट्रेपमध्ये अडकणार नाही..' यावर नागराज मंजुळे म्हणाले 'त्यांनी आत्ता दिलेलं उत्तर हे विचार करूनच होतं.' यावर सगळेच खळखळून हसले.
महत्त्वाच्या बातम्या
