थलपती विजयच्या सिनेमाला बॉक्स ऑफिसवर ब्रेक, धमाल 4 अन् द ओडीसीचा धुमाकूळ; आत्तापर्यंत कुणी किती कमावले?
'जननायक'ने मंगळवारी तमिळ हिंदी आणि तेलगू अशा तीनही भाषांमध्ये केवळ आठ कोटी रुपयांची कमाई केली.
Box office collection: मंगळवारचा दिवस बॉक्स ऑफिसवर 'जननायक' साठी फारसा चांगला नव्हता.थलपती विजय मुख्यमंत्री झाल्यानंतर मनोरंजन सृष्टीतील त्यांचा हा शेवटचा चित्रपट मानला जातोय. त्यामुळे या चित्रपटाच्या कमाईला मंगळवारी ब्रेक लागला. याउलट 'धमाल 4','द ओडिसी'ला प्रेक्षकांनी पसंती दिली.त्यामुळे थलपती विजय यांचा शेवटच्या चित्रपटाची वाट आणखी कठीण झालीय. हिट होण्यासाठी या चित्रपटाला आपलं स्थान मजबूतपणे टिकवून ठेवावे लागणार आहे.
'जननायकन'च्या कमाईला ब्रेक ..
एच विनोद दिग्दर्शित 'जननायकन' पूर्णपणे थलपती विजय यांच्या चाहता वर्गासाठी बनवण्यात आलेला सिनेमा आहे. चाहते आणि समीक्षक दोघांकडूनही या चित्रपटाला चांगला प्रतिसाद मिळाला होता. आतापर्यंत या चित्रपटाने 150 कोटी रुपयांची कमाई केली आहे. 300 कोटी रुपयांच्या बजेटमध्ये झालेल्या या चित्रपटाला हिट होण्यासाठी अजून निम्मी कमाई करणं बाकी आहे.
सॅकनिल्कच्या आकडेवारीनुसार, 'जननायक'ने मंगळवारी तमिळ हिंदी आणि तेलगू अशा तीनही भाषांमध्ये केवळ आठ कोटी रुपयांची कमाई केली. तब्बल 10 हजार 413 शो देशभरात लागले होते. प्रदर्शनाच्या सहाव्या दिवशी तिकीट स्वस्थ असूनही प्रेक्षकांनी या चित्रपटाला पसंती दिली नाही. सोमवारी 21.7% पेक्षा कमी असणाऱ्या प्रेक्षक उपस्थितीपेक्षाही मंगळवारची प्रेक्षक संख्या कमी होती. सहा दिवसात या चित्रपटाने भारतात 167.57 कोटींची कमाई केली आहे. तर परदेशात 78.50 कोटी रुपयांची कमाई या चित्रपटाने केली. त्यामुळे देशांतर्गत आणि आंतरराष्ट्रीय अशी मिळून जगभरातील एकूण कमाई 446 कोटींवर गेली आहे.
या चित्रपटाने पहिल्या दिवशी 42.70 कोटी रुपयांची कमाई करत सुरुवात केली होती. गुरुवारी प्रदर्शित झालेल्या या चित्रपटाने शुक्रवारी ही 21.15 कोटींची कमाई केली. शनिवारी ही कमाई 28.90 कोटींवर गेली होती. रविवारी 32 कोटी कमावल्यानंतर सोमवार आणि मंगळवार या दोन्ही दिवशी 10.65 कोटी आणि आठ कोटी रुपयांची कमाई या चित्रपटाने केली. पण विकडे असल्यामुळे हा ब्रेक लागल्याचा अंदाजही व्यक्त करण्यात येतोय. वीकेंडला हा चित्रपट आणखी कमाई करू शकतो असा अंदाज आहे.
'धमाल 4 'ने बॉक्स ऑफिस गाजवलं..
अजय देवगन, अर्शद वारसी आणि रितेश देशमुख यांचा प्रमुख भूमिका असणाऱ्या धमाल 4 चित्रपटाने भारतात 182.32 कोटी रुपये कमावले आहेत. तर परदेशात या चित्रपटाची कमाई 29.45 कोटी रुपये झाली आहे. जगभरात या चित्रपटाने 211. 77 कोटी रुपये कमावलेत. इंद्रकुमार यांनी दिग्दर्शित केलेल्या या चित्रपटाचे बजेट 200 कोटी रुपये होतं.
द ओडिसीची बॉक्स ऑफिसवर दमदार कमाई
ख्रिस्तोफर नोलनचा भव्य ऐतिहासिक ॲक्शन ड्रामा द ओडिसी जगभरात धुमाकूळ घालत आहे. या चित्रपटाने जगभरात सहा हजार चारशे कोटी रुपयांची कमाई केली असून भारतात केवळ 12 दिवसांमध्ये 127.65 कोटींची कमाई केली. या चित्रपटाचं बजेट 21.5 अब्ज आहे.
महत्त्वाच्या बातम्या
