SSR Suicide Case | 'विनाकारण माझा छळ चाललाय'; सूरज पांचोलीची वर्सोवा पोलिसांत तक्रार

सुशांत सिंह राजपूत आत्महत्या प्रकरणी सातत्याने सूरज पांचोलीचं नाव घेतलं जात आहे. याप्रकरणी सूरज पांचोलीने आता थेट पोलिसांत तक्रार दाखल केली आहे. वर्सोवा पोलिसांत त्याने तक्रार दाखल केली असून, त्यात त्याने दिशा सॅलियन आणि सुशांतच्या मृत्यू प्रकरणात आपल्याला विनाकारण गोवलं जात असल्याचं म्हटलं आहे.

मुंबई : सुशांत सिंह राजपूतच्या मृत्यूनंतर त्याच्या या प्रकरणाने अनेक वेगवेगळी वळणं घेतली आहेत. त्याच्या केसमध्ये अनेक नवनवीन नावं समोर येऊ लागली आहेत. यात सातत्याने रिया चक्रवर्तीचं नाव आहेच. पण त्याही पलिकडे त्याच्या आणि दिशा सॅलियनच्या मृत्यूमध्ये सूरज पांचोलीचं नावही सातत्याने येऊ लागलं आहे. एका वाहिनीने तसा फोटो देऊन सूरज आणि दिशाची लिंक लावली होती. पण तो फोटो चुकीचा असल्याचं सूरजने आपल्या इन्स्टाग्रामवरून सांगितलं होतं. आता त्याने त्यापुढे पाऊल टाकलं आहे.

सूरज पांचोलीने आता थेट पोलिसांत तक्रार दाखल केली आहे. वर्सोवा पोलिसांत त्याने तक्रार दाखल केली असून, त्यात त्याने दिशा सॅलियन आणि सुशांतच्या मृत्यू प्रकरणात आपल्याला विनाकारण गोवलं जात असल्याचं म्हटलं आहे. त्याने यात छळवणुकीची तक्रार दाखल केली आहे. एका राष्ट्रीय वाहिनीने एका डिबेट शोमध्ये सूरज पांचोलीचा एक फोटो दाखवत त्याच्या सोबत असलेली मुलगी ही दिशा सॅलियन असल्याचं म्हटलं होतं. त्या फोटोत सुशांतसिंह राजपूतही होता. त्या फोटो सूरजला चिकटून असलेली मुलगी दिशा सॅलियन असल्याचा दावा या चॅनलवर केला होता. आपल्या इन्स्टा अकाऊंटवरून त्यावर उत्तर देताना हा फोटो खरा असला तरी त्यात दिशा सॅलियन नसून आपली मैत्रिण अनुश्री गौर असल्याचं म्हटलं आहे. ती आत्ता लंडनमध्ये असल्याचंही तो सांगतो. याच प्रकरणात त्याने आता पोलिसांत आपली तक्रार दाखल केली आहे.

केवळ एक वाहिनी नव्हे, तर एका मोठ्या राजकिय नेत्यानेही एका पत्रकार परिषदेत सूरजचं नाव घेतलं होतं. त्यात दिशाच्या मृत्यूला सूरज जबाबदार असल्याचं म्हटलं होतं. मिळालेल्या माहीतीनुसार, संबंधित चॅनल आणि तो राजकिय नेता या दोघांची नावं या तक्रारीत असल्याचं कळतं. सुशांंतसिंह राजपूतच्या प्रकरणात आता अनेक नव्या बाबी समोर येऊ लागल्या आहेत. काही दिवसांपूर्वीच सामनातून आलेल्या अग्रलेखावरून सुशांतचा भाऊ खासदार संजय राऊत यांच्यावर अब्रूनुकसानीचा दावा ठोकणार असल्याचं कळतं.

महत्त्वाच्या बातम्या :