एक्स्प्लोर

जाहिरात विश्वालाही रिंकू राजगुरुने 'याड लावलं'....

By : एबीपी माझा वेब टीम | Updated at : 05 Jun 2016 03:22 AM (IST)

मुंबई : सैराट चित्रपटातील आर्चीच्या भूमिकेमुळे घराघरात पोहचलेली अभिनेत्री रिंकू राजगुरुने जाहिरात विश्वालाही 'याड लावलं' आहे. रिंकूने नुकतंच 'गो' एडिबल ऑईल अर्थात खाद्यतेलाचं प्रॉडक्ट लाँच केलं. गजानन ग्रुपच्या 'गो' या तेलाच्या ब्रँडचं उद्घाटन रिंकू राजगुरुच्या हस्ते करण्यात आलं. या सोहळ्याला सुप्रसिद्ध संगीतकार जतिनही उपस्थित होते. त्यामुळे पुढे-मागे रिंकू जाहिरातीत दिसणार का असा सवालही विचारला जात आहे.

कपिलला सैराटची भुरळ, द कपिल शर्मा शोमध्ये हजेरी

कॉमेडियन कपिल शर्माचा लोकप्रिय कार्यक्रम ‘द कपिल शर्मा शो’मध्ये महाराष्ट्रासह देशाला ‘याड लावणाऱ्या’ सैराट चित्रपटाची टीम येणार आहे. दिग्दर्शक नागराज मंजुळेंसह रिंकू राजगुरु, आकाश ठोसर आणि इतर कलाकार उपस्थित राहणार असल्याची माहिती आहे. आतापर्यंत कपिल शर्माच्या शोमध्ये फक्त बॉलिवूडमधील चित्रपट कलाकारांना निमंत्रित केलं जात असे. मात्र बॉलिवूडला दखल घ्यायला लावणाऱ्या सैराटच्या यशानंतर आता पहिल्यांदाच एका मराठी चित्रपटाच्या टीमला कपिलच्या शोमध्ये पाचारण करण्यात येईल. बॉक्स ऑफिसवर धुमाकूळ घालणाऱ्या आणि मराठी सिनेसृष्टीत कमाईचे सर्व रेकॉर्ड मोडीत काढणाऱ्या ‘सैराट’ने नवा उच्चांक गाठला आहे. दिग्दर्शक नागराज मंजुळेच्या ‘सैराट’ने आतापर्यंत 80 कोटी रुपयांची कमाई केली आहे. मराठी सिनेमाने इतकी कमाई केलेला हा पहिलाच सिनेमा आहे.