Hrithik Roshan and Jr NTR War 2 Movie : हृतिक- ज्यू. एनटीआरच्या चित्रपटाला हॉलिवूडचा तडका; 'कॅप्टन अमेरिका'चा स्टंट डायरेक्टर 'यशराज'च्या चित्रपटात

Hrithik Roshan and Jr NTR : बॉलिवूडचा अॅक्शनपट हॉलिवूडच्या तोडीचा करण्यासाठी यशराज फिल्मसने कंबर कसली आहे. यशराज फिल्मसच्या युनिर्व्हसल स्पाय सीरिजमधील 'वॉर-2' साठी आता हॉलिवूडचे नावाजलेले अॅक्शन डायरेक्टर स्पिरो रजाटोस काम करणार आहेत.

Hrithik Roshan and Jr NTR War 2 Movie

Hrithik Roshan and Jr NTR War 2 Movie : मागील काही काळात बॉलिवूडमध्ये अॅक्शनपटाची रीघ लागली आहे. अनेक अॅक्शनपट रुपेरी पडद्यावर झळकले आहेत.  त्यातील काही चित्रपटांना  बॉक्स ऑफिसवर घवघवीत यश मिळाले तर काही चित्रपटांना अपयशाला सामोरे जावे लागले. बॉलिवूडचा अॅक्शनपट  हॉलिवूडच्या तोडीचा करण्यासाठी यशराज फिल्मसने (Yash Raj Flims) कंबर कसली आहे. यशराज फिल्मसच्या युनिर्व्हसल स्पाय सीरिजमधील 'वॉर-2' साठी (War 2) आता हॉलिवूडचे नावाजलेले अॅक्शन डायरेक्टर  स्पिरो रजाटोस काम करणार आहेत. या चित्रपटात हृतिक रोशन (Hrithik Roshan) आणि ज्युनिअर एनटीआर ( Jr NTR) एकत्रित झळकणार आहेत. काही दिवसांपूर्वी ज्युनिअर एनटीआर मुंबईत आला होता. 

वायएफआर स्पाय युनिर्व्हसचे एकामागून एक चित्रपट मोठ्या पडद्यावर धुमाकूळ घालत आहेत. 2023 मध्ये रिलीज झालेल्या 'पठाण' आणि 'टायगर 3'ने बॉक्स ऑफिसवर चांगलीच कमाई केली. आता  'वॉर' चित्रपटाच्या सिक्वेलने बॉक्स ऑफिसवर नवा विक्रम रचण्याच्या तयारीत आहे. चित्रपटात कोणतीही उणीव राहू नये यासाठी यशराज फिल्मसकडून जोरदार प्रयत्न सुरू आहेत. चित्रपटाचे चित्रीकरण देखील सुरू झाले आहे. 

स्टंट डायरेक्टर  स्पिरो रजाटोस हे कॅप्टन अमेरिका: सिव्हिल वॉर, कॅप्टन अमेरिका: द फर्स्ट सोल्जर, फास्ट एक्स, एफ-9 द फास्ट सागा सारख्या ब्लॉकबस्टर अॅक्शन चित्रपटातील स्टंटसाठी ओळखले जातात. आता,  स्पिरो रजाटोस हे वॉर-2 साठी काम करणार आहेत. 

'वॉर-2' या चित्रपटाचे दिग्दर्शन अयान मुखर्जी करणार आहे. वॉर-2 साठी स्पिरो रजाटोस यांनी काम सुरू केले आहे. या चित्रपटातून भारतीय सिनेप्रेक्षकांना अॅक्शनपटाचा नवा अनुभव देण्यासाठी चित्रपटाच्या टीमने कंबर कसली आहे. 

कधी रिलीज होणार चित्रपट?

वॉर-2 हा चित्रपट 2019 मध्ये प्रदर्शित झालेल्या वॉर या चित्रपटाचा सिक्वेल आहे. वॉर चित्रपटाचे दिग्दर्शन सिद्धार्थ आनंदने केले होते. आता वॉर-2 हा चित्रपट पुढील वर्षी 15 ऑगस्ट रोजी प्रदर्शित होणार आहे. 

YRF च्या  स्पाय युनिव्हर्स सीरिजमधील चित्रपटांची यादी 

YRF च्या स्पाय युनिव्हर्सची  सुरुवात सलमान खानच्या 'एक था टायगर' मधून झाली. त्यानंतर 'टायगर जिंदा है' आणि हृतिक रोशन आणि टायगर श्रॉफ स्टारर 'वॉर' हा चित्रपट प्रदर्शित झाला. यानंतर शाहरुख खान, दीपिका पदुकोण आणि जॉन अब्राहम यांच्या भूमिका असलेल्या 'पठाण'ची या स्पाय युनिव्हर्समध्ये एन्ट्री झाली. त्यानंतर सलमान खान आणि कतरिना कैफचा 'टायगर 3' प्रदर्शित झाला. आता या फ्रँचायझीचा पुढचा चित्रपट 'वॉर 2' आहे. अयान मुखर् याचे दिग्दर्शन करत आहे. यामध्ये हृतिक रोशन, जूनियर एनटीआर आणि कियारा अडवाणी मुख्य भूमिकेत आहेत.