Marathi Movie Punha Sade Made Teen : 'कुरळे ब्रदर्स' पुन्हा प्रेक्षकांच्या भेटीला, 'साडे माडे तीन'च्या सिक्वेलची घोषणा, अंकुश चौधरी करणार दिग्दर्शन
Marathi Movie Punha Sade Made Teen : 17 वर्षांपूर्वी रुपेरी पडद्यावर कमाल दाखवणारी ही त्रयी आता पु्न्हा एकदा प्रेक्षकांच्या भेटीला येणार आहे. 'साडे माडे तीन' या चित्रपटाचा सिक्वेल येणार आहे.
Marathi Movie Punha Sade Made Teen : सतरा वर्षांपूर्वी प्रदर्शित झालेल्या 'साडे माडे तीन' या चित्रपटाने बॉक्स ऑफिसवर अक्षरशः धुमाकूळ घातला होता. या चित्रपटाच्या निमित्ताने महाराष्ट्राचा सुपरस्टार अंकुश चौधरी याने दिग्दर्शनात पदार्पण केले होते. चित्रपटाची कथा, दिग्दर्शन, कलाकार या सगळ्याच जमेच्या बाजू होत्या. त्यामुळेच प्रेक्षकांनी या चित्रपटावर भरभरून प्रेम केले. चित्रपटातील अशोक सराफ (Ashok Saraf), भरत जाधव (Bharat Jadhav) आणि मकरंद अनासपुरे (Makarand Anaspure) ही कुरळे ब्रदर्सची तिकडी सगळ्यांनाच भावली होती. 17 वर्षांपूर्वी रुपेरी पडद्यावर कमाल दाखवणारी ही त्रयी आता पुन्हा एकदा प्रेक्षकांच्या भेटीला येणार आहे. 'साडे माडे तीन' या चित्रपटाचा सिक्वेल येणार आहे. या चित्रपटाचे दिग्दर्शन अंकुश चौधरी (Ankush Choudhary) करणार आहे.
'साडे माडे तीन' हा चित्रपट हिंदीत गाजलेल्या 'चलती का नाम गाडी' या चित्रपटाचा रिमेक होता. 'साडे माडे तीन' हा चित्रपट त्या वर्षात सर्वाधिक कमाई करणाऱ्या मराठी चित्रपटांपैकी एक होता. नुकतीच आता 'पुन्हा एकदा साडे माडे तीन' चित्रपटाची सोशल मीडियावरून घोषणा करण्यात आली आहे. 'पुन्हा एकदा साडे माडे तीन' मध्ये अशोक सराफ, भरत जाधव, मकरंद अनासपुरे, सिद्धार्थ जाधव हे 'साडे माडे तीन'मधील कलाकारच प्रमुख भूमिकेत दिसणार आहेत. त्याशिवाय, या चित्रपटात आणखी कोणते कलाकार झळकणार, हे मात्र अद्यापही गुपित आहे. अमेय विनोद खोपकर पिक्चर्सच्या स्वाती खोपकर, निनाद बत्तीन यांच्यासह 'उदाहरणार्थ'चे सुधीर कोलते यांची निर्मिती असणाऱ्या या चित्रपटाचे छायाचित्रण संजय जाधव करणार आहेत. पुढील महिन्यापासून अर्थात सप्टेंबरपासून 'पुन्हा एकदा साडे माडे तीन'च्या चित्रीकरणास सुरुवात होणार आहे.
चित्रपटाबद्दल दिग्दर्शक अंकुश चौधरी याने सांगितले की, '' पुन्हा एकदा साडे माडे तीनची घोषणा करताना अत्यंत आनंद होतोय. एखाद्या चित्रपटाचा दुसरा भाग येणे, हे खरंच खूपच जबाबदारीचे काम असते. प्रेक्षकांच्या अपेक्षा वाढतात. मला खात्री आहे, 'साडे माडे तीन'वर जसे प्रेक्षकांनी प्रेम केले, तसेच या चित्रपटावरही करतील. या भागात कुरळे ब्रदर्सची धमाल डबल झाली आहे. यात आता ते काय करणार हे प्रेक्षकांना लवकरच कळणार असल्याचे अंकुश चौधरीने सांगितले. या चित्रपटाच्या निमित्ताने मी प्रथमच एव्हीके पिक्चर्स आणि उदाहरणार्थसोबत काम करत असून या पूर्वी एव्हीके पिक्चर्सने अनेक सुपरहिट चित्रपट मराठी सिनेसृष्टीला दिले आहेत. त्यामुळे यांच्यासोबत काम करण्याचा अनुभव निश्चितच कमाल असेल. अमेय खोपकर, स्वाती खोपकर, निनाद बत्तीन, सुधीर कोलते यांची साथ लाभल्याने हा चित्रपट निश्चितच एका वेगळया उंचीवर जाईल, असा विश्वासही अंकुश चौधरी याने व्यक्त केला.
महत्त्वाच्या बातम्या
ट्रेंडिंग न्यूज
