अभिनेता प्रशांत दामलेंना मुंबई महापालिकेकडून मोठी जबाबदारी; महापौर रितू तावडेंकडून नियुक्तीपत्र प्रदान
महापालिकेच्या क्रीडा आणि ललितकला प्रतिष्ठानच्या विश्वस्त मंडळाने दामले यांच्या नियुक्तीला सर्वानुमते मंजुरी दिली.
मुंबई : ज्येष्ठ अभिनेते, गायक आणि नाट्यनिर्माते प्रशांत दामले (Prashant Damle) यांची बृहन्मुंबई क्रीडा आणि ललितकला प्रतिष्ठानच्या व्यवस्थापकीय विश्वस्तपदी नियुक्ती करण्यात आल्याने आता मुंबई महापालिकेच्या कला विषयक कारभारात त्यांचा थेट सहभाग असणार आहे. मुंबईच्या (Mumbai) महापौर रितू तावडे यांच्या हस्ते आज (10 जुलै) रोजी त्यांना विश्वस्तपदी नियुक्तीपत्र प्रदान करण्यात आले. त्यामुळे, प्रशांत दामले यांच्याकडे मुंबईच्या कला-क्रीडा प्रतिष्ठानची धुरा देण्यात आल्याचं दिसून येत आहे. दामले यांच्या कला क्षेत्रातील अनुभवाचा प्रतिष्ठानच्या कला व क्रीडा क्षेत्रातील उपक्रमांना मोठा फायदा होईल, असा विश्वास महापौरांसह पदाधिकाऱ्यांनी व्यक्त केला.
महापालिकेच्या क्रीडा आणि ललितकला प्रतिष्ठानच्या विश्वस्त मंडळाने दामले यांच्या नियुक्तीला सर्वानुमते मंजुरी दिली. 36 नाटकांमधील 13,538 हून अधिक प्रयोगांचा जागतिक विक्रम दामले यांच्या नावावर असून त्यांच्या कामगिरीची लिमका बुक ऑफ रेकॉर्ड्समध्ये 4 वेळा नोंद झाली आहे. केंद्र सरकारच्या संगीत नाटक अकादमी पुरस्काराने देखील प्रशांत दामले सन्मानित आहेत. सध्या ते अखिल भारतीय मराठी नाट्य परिषदेचे अध्यक्ष म्हणूनही कार्यरत आहेत.
प्रशांत दामले यांचा संक्षिप्त परिचय
शाळकरी वयातील गाण्यापासून जागतिक विक्रमांपर्यंतचा प्रवास मूळचे मुंबईकर असलेल्या प्रशांत दामले यांना शालेय जीवनापासूनच गाण्याची प्रचंड आवड होती. पुढे महाविद्यालयीन जीवनात त्यांच्यात अभिनयाची आणि नाटकांची आवड निर्माण झाली. त्यांनी 1978 ते 1983 या काळात समांतर रंगभूमीवर काम करून आपल्या अभिनयाचा पाया मजबूत केला. 1983 मध्ये आलेल्या ‘टूरटूर’ या पहिल्या व्यावसायिक नाटकाने त्यांच्या कारकीर्दीला खऱ्या अर्थाने कलाटणी दिली. त्यानंतर दामले यांनी कधीच मागे वळून पाहिले नाही. आजवरच्या प्रदीर्घ कारकीर्दीत त्यांनी तब्बल 36 विविध नाटकांमधून 13,538 पेक्षा अधिक प्रयोगांचा जागतिक विक्रम प्रस्थापित केला आहे. त्यांच्या या कामगिरीची नोंद घेत 4 लिमका बुक ऑफ रेकॉर्डसमध्ये त्यांचे नाव कोरले गेले आहे.
अष्टपैलू व्यक्तिमत्त्व आणि सन्मान
प्रशांत दामले यांनी केवळ अभिनेता म्हणूनच नाही, तर एक उत्तम गायक, सूत्रसंचालक आणि निर्माता म्हणूनही आपली छाप उमटवली आहे. त्यांच्या कलाक्षेत्रातील अमूल्य योगदानाबद्दल त्यांना केंद्र शासनाचा मानाचा ‘संगीत नाटक अकादमी पुरस्कार’ देऊन गौरवण्यात आले आहे. मागील तीन वर्षे अखिल भारतीय मराठी नाट्य परिषदेचे अध्यक्ष म्हणून ते धुरा सांभाळत आहेत. सामाजिक क्षेत्रातही ते अग्रेसर असतात.
नवी जबाबदारी आणि विश्वास
बृहन्मुंबई क्रीडा आणि ललितकला प्रतिष्ठानच्या व्यवस्थापकीय विश्वस्तपदाची धुरा आता श्री. प्रशांत दामले यांच्यासारख्या अनुभवी, अभ्यासू आणि लोकप्रिय कलावंताकडे सोपवण्यात आली आहे. दामले यांच्या या निवडीबद्दल आनंद व्यक्त करत, त्यांच्या अनुभवाचा फायदा प्रतिष्ठानच्या पुढील वाटचालीस निश्चित होईल, असा विश्वास प्रतिष्ठानच्या अध्यक्ष तथा महापौर रितू तावडे यांच्यासह उपमहापौर संजय घाडी, सभागृह नेते गणेश खणकर, स्थायी समिती अध्यक्ष प्रभाकर शिंदे, शिवसेना गटनेते अमेय घोले यांच्यासह प्रतिष्ठानचे पदाधिकारी, सदस्य यांनी व्यक्त केला आहे.
हेही वाचा
महत्त्वाच्या बातम्या
