महिला सक्षमीकरणाचं उत्तम उदाहरण, तीन शिक्षिकांनी मिळून संभाळली ‘प्रीत अधुरी’ चित्रपटाची धुरा!

Preet Adhuri  : या चित्रपटाचे दिग्दर्शन प्रियांकाने केले असून, ती पेशाने जिल्हा परिषद शाळेतील शिक्षिका आहे. याची निर्मिती स्वप्नाली हर्षल पवार यांनी केली असून, त्याही शिक्षिका आहेत.

Preet Adhuri

Preet Adhuri  : ‘मुलगी शिकली, प्रगती झाली’, असे महाराष्ट्र सरकारचे ब्रीदवाक्य सरकारच्या शिक्षणाबद्दलची आस्था दर्शवते. मुलगी शिकल्यामुळे प्रत्येक क्षेत्रात अनेक महिला आघाडीवर दिसताहेत आणि त्यात मनोरंजनसृष्टीही मागे नाही. ‘प्रीत अधुरी’ नावाचा एक मराठी चित्रपट येऊ घातला आहे. या चित्रपटाचे दिग्दर्शन प्रियांकाने केले असून, ती पेशाने जिल्हा परिषद शाळेतील शिक्षिका आहे. याची निर्मिती स्वप्नाली हर्षल पवार यांनी केली असून, त्याही शिक्षिका आहेत. इतकंच नव्हे, तर या दोन महिला शिक्षिकांच्या पंखांना आर्थिक बळ देण्यासाठी अजून एक शिक्षिकाच पुढे सरसावल्या, त्या म्हणजे जिल्हा परिषद शिक्षिका श्रीमती बेबीताई यशवंत वाडकर. या तिघी ‘महिला सक्षमीकरणा’चे उत्तम उदाहरण ठरल्या आहेत.

या चित्रपटाची कथा, पटकथा व संवाद शिव ओंकार, प्रकाशमणी तिवारी, संदीप मिश्रा आणि महादेव साळोखे यांनी लिहिली असून, नावावरूनच समजते की, ‘प्रीत अधुरी’ हा चित्रपट म्हणजे एक प्रेमकथा असणार आहे. अर्थातच या चित्रपटाच्या कथेत रोमान्ससोबतच मनोरंजनाचा इतर मसालाही बघायला मिळेल.

दिग्गजांच्या आवाजाची साथ!

या चित्रपटाचे संगीत म्हणजे याचा प्राण असून, शिव ओंकार - राजेश घायल या संगीतकारद्वयीने त्याचे संगीत दिग्दर्शन केले आहे. शिव ओंकार व शशिकांत पवार यांनी गीते लिहिली आहेत. तर, सुप्रसिद्ध गायक जावेद अली, कुणाल गांजावाला, साधना सरगम, शाहिद मल्ल्या, रितू पाठक, खुशबू जैन आणि सुदेश भोसले यांनी पार्श्वगायन केले आहे.

दमदार कलाकारांची फौज!

‘प्रीत अधुरी’ या चित्रपटात दोन नवीन चेहरे लाँच होणार आहेत. प्रवीण यशवंत आणि प्रीया दुबे हे कलाकार मराठी चित्रपटसृष्टीत पदार्पण करत असून, त्यांना अनेक दिग्गज कलाकारांची साथ लाभलीय. संजय खापरे, मिलिंद दास्ताने, शाम निनावे, कमलेश सावंत आणि अरुण नलावडे हे या चित्रपटात महत्वपूर्ण भूमिकेत दिसतील. ‘प्रीत अधुरी’चे चित्रीकरण निसर्गरम्य आशा कोल्हापूर, सांगली, रत्नागिरी आणि मुंबई येथे संपन्न झाले असून, हा चित्रपट आता पोस्ट प्रॉडक्शनमध्ये गेला आहे. कार्यकारी निर्माती म्हणून ज्योती प्रवीण वाडकर यांनी जबाबदारी सांभाळली आहे.

हेही वाचा :