West Bengal: निवडणूक जाहीर होताच पहिला ओपिनियन पोल आला; पश्चिम बंगालमध्ये कोणाची सत्ता? भाजप-तृणमूलमध्येच जोरदार टक्कर
West Bengal : पश्चिम बंगाल विधानसभा निवडणुकीचा कार्यक्रम जाहीर करण्यात आला आहे. पश्चिम बंगालमध्ये दोन टप्प्यात मतदान होणार आहे.
कोलकाता : केंद्रीय निवडणूक आयोगानं आज पाच राज्यांमधील विधानसभा निवडणूक कार्यक्रम जाहीर केले. पश्चिम बंगालमध्ये यावेळी दोन टप्प्यात मतदान होणार आहे. पहिल्या टप्प्यातील मतदान 23 एप्रिल आणि दुसऱ्या टप्प्यातील मतदान 29 एप्रिलला होईल. तर, मतमोजणी 4 मे रोजी होणार आहे. पश्चिम बंगालमधील तृणमूल काँग्रेसची सत्ता वाचवण्यासाठी मुख्यमंत्री ममता बॅनर्जींकडून जोरदार प्रयत्न केले जात आहेत. तर, भाजपनं देखील पश्चिम बंगालमध्ये विजय मिळवण्यासाठी प्रयत्न केले आहेत. पश्चिम बंगालची निवडणूक जाहीर होताच पहिला ओपिनियन पोल समोर आला आहे. या ओपिनियन पोलमध्ये भाजपला धक्का बसताना दिसत आहे. ममता बॅनर्जी यांच्या पक्षाला पुन्हा सत्ता मिळण्याची शक्यता आहे. तर, असदुद्दीन ओवेसी यांच्या आघाडीला देखील चांगल्या जागा मिळतील, असा अंदाज ओपिनियन पोलमध्ये वर्तवण्यात आला आहे.
पश्चिम बंगाल कोणाची सत्ता?
मॅटराईज आयएएनसच्या ओपिनियन पोलनुसार पश्चिम बंगालमध्ये ममता बॅनर्जींचं सरकार पुन्हा येऊ शकतं. मात्र, गेल्या विधानसभा निवडणुकीच जितक्या जागा जिंकल्या त्यातुलनेत यावेळी जागा कमी होऊ शकतात. ओपिनियन पोल नुसार तृणमूल काँग्रेसला 155-170 जागा मिळू शकतात. तर, भाजपला 100-115 जागा मिळण्याची शक्यता आहे. या ओपिनियन पोलनुसार असदुद्दीन ओवेसी यांच्या एमआयएम आघाडीची कामगिरी काँग्रेस पेक्षा चांगली राहू शकते. एमआयएमच्या आघाडीला पाच ते सहा जागा मिळू शकतात. मात्र, काँग्रेसला एकही जागा मिळणार नाही, असा अंदाज वर्तवण्यात आला आहे.
ओपिनियन पोलनुसार तृणमूल काँग्रेस आणि भाजप यांच्यातील मतदानाच्या टक्केवारीतील अंतर कमी राहण्याची शक्यता आहे. टीएमसीला 43-45 टक्के, भाजपला 41 ते 43 टक्के आणि इतरांना 13 ते 15 टक्के मतं मिळू शकतात.
पश्चिम बंगालमध्ये ओपिनियन पोलनुसार तृणमूल काँग्रेस आणि भाजपमध्ये जोरदार लढत होण्याची शक्यता आहे. पश्चिम बंगालमध्ये यावेळी 294 जागांसाठी दोन टप्प्यात मतदान होणार आहे. पहिल्या टप्प्यात 23 एप्रिलला 152 जागांवर मतदान होईल. तर, दुसऱ्या टप्प्यात 29 एप्रिलला 142 जागांवर मतदान होणार आहे. मतमोजणी 4 मे रोजी होणार आहे.
2021 चा निकाल
पश्चिम बंगालमध्ये 2021 मध्ये झालेल्या विधानसभा निवडणुकीत तृणमूल काँग्रेसला 48.5 टक्के मतं मिळाली होती. तर, भाजपला 38.5 टक्के मतं मिळालेली. तृणमूल काँग्रेसनं त्यावेळी 213 जागा जिंकलेल्या, तर भाजपनं 77 जागांवर विजय मिळवला होता.
महत्त्वाच्या बातम्या
