(Source: Poll of Polls)
Mahim Vidhan Sabha: माहीम मतदारसंघात मतदानाचा टक्का वाढला; धक्कादायक आकडेवारी आली समोर, ठाकरे, सरवणकर की सावंत?
Amit Thackeray vs Sada Sarvankar vs Mahesh Sawant: माहीम विधानसभा मतदारसंघात तिरंगी लढत होणार आहे.
Maharashtra Vidhan Sabha Election 2024 मुंबई: माहीम विधानसभा मतदारसंघात (Mahim Vidhan Sabha) तिरंगी लढत होणार आहे. मनसेकडून अमित ठाकरे, शिवसेना शिंदे गटाकडून सदा सरवणकर, शिवसेना ठाकरे गटाकडून महेश सावंत रिंगणात उतरले. या तिरंगी निवडणुकीत अटीतटीची लढाई असल्याने तिन्हीही प्रमुख उमेदवारांकडून मतदारांना केंद्रापर्यंत पोहोचविण्यासाठी प्रयत्न करण्यात आले होते. त्यामुळे येथे मतदान केंद्रावर सकाळपासूनच मतदारांचे प्रमाण समाधानकारक दिसून आले. तसेच माहीम विधानसभा मतदारसंघात मतदानाचा टक्का वाढल्याचे समोर आले आहे.
माहीममधील मतदानाचा टक्का वाढला-
2019 च्या विधानसभा निवडणुकीत माहीम विधानसभा मतदारसंघात 52.67 टक्के मतदान झाले होते. आता 2024 च्या विधानसभेच्या निवडणुकीत माहीममध्ये 58 टक्के मतदान झालं आहे. 2019 च्या तुलनेत 2024 मध्ये माहीममधील मतदानाचा टक्का 5.33 टक्क्यांनी वाढला आहे. त्यामुळे माहीममध्ये यंदा वाढलेला हा मतदानाचा टक्का कोणाच्या पारड्यात पडणार, याकडे आता सर्वांचे लक्ष लागले आहे.
अमित ठाकरेंचं डिपॉझिट वाचलं तरी मोठी गोष्ट-
माहीम विधानसभा मतदारसंघात अमित ठाकरे यांचे डिपॉझिट वाचले तरी खूप मोठी गोष्ट आहे, असं सदा सरवणकर म्हणाले आहेत. तर मी दाव्याने सांगतो, मनसेशिवाय राज्यात सत्ता स्थापन होणार नाही, असा दावाही अमित ठाकरेंनी केला आहे. मी लोकांपर्यंत पोहचलो आहे. मी डोअर टू डोअर प्रचार केला. मला जे करायचं आहे, ते मी लोकांपर्यंत पोहचवलं आहे, असं अमित ठाकरेंनी सांगितले.
मनसेला 2 ते 4 जागा मिळण्याची शक्यता-
दैनिक भास्करच्या एक्झिट पोलच्या अंदाजानूसार महायुतीला 125-140 जागा मिळण्याची शक्यता आहे. तर महाविकास आघाडीला 135-150 जागा मिळणार असल्याचा अंदाज व्यक्त करण्यात आला आहे. तर मनसेला 2 ते 4 जागा मिळणार असा अंदाज वर्तवण्यात आला आहे. विविध संस्थांनी जाहीर केलेल्या एक्झिट पोलच्या अंदाजानूसार राज्यात महायुती आणि महाविकास आघाडीमध्ये चुरस होताना पाहायला मिळत आहे. त्यामुळे एक-एक जागा महत्वाची असणार आहे. मनसेला 2 ते 4 जागा मिळाल्यास राज ठाकरे भाजपला पाठिंबा देत महायुतीला साथ देण्याची शक्यता आहे. मनसेने जिंकलेल्या दोन ते चार जागा निर्णायक ठरण्याची शक्यता आहे.
अखेरच्या टप्प्यात जोर
दुपारच्या सत्रानंतर मतदान काहीसं वाढलेलं दिसलं. संध्याकाळी 5 ते 6 दरम्यान सर्वाधिक मतदान झालं. अंतिम आकडेवारीनुसार, मुंबईत 56 टक्के मतदान झालं. यात सर्वाधिक 62 टक्के मतदान भांडूप पश्चिम मतदारसंघात झाले असून बोरीवली आणि मुलुंडमध्येही 61 टक्के मतदान झाल्याचा प्राथमिक अंदाज आहे. चांदिवलीमध्ये सर्वात कमी 48 टक्के मतदान झालं आहे. वडाळा मतदारसंघात सर्वाधिक 58 टक्के, तर कुलाब्यात सर्वांत कमी 45 टक्के मतदान झालं.
संबंधित बातमी:
महत्त्वाच्या बातम्या
ट्रेंडिंग न्यूज
