Sunetra Pawar: सुनेत्रा पवार यांची राष्ट्रवादीच्या विधिमंडळ नेतेपदी निवड, पुढील प्रक्रिया कशी असणार? छगन भुजबळ यांनी माहिती दिली
Sunetra Pawar : राष्ट्रवादी काँग्रेस पक्षाच्या विधिमंडळ नेतेपदी सुनेत्रा पवार यांची निवड करण्यात आली आहे. आज त्यांचा सायंकाळी 5 वाजता शपथविधी होणार आहे.
मुंबई : राष्ट्रवादी काँग्रेस पार्टीचे राष्ट्रीय अध्यक्ष आणि उपमुख्यमंत्री अजित पवार यांच्या अपघाती निधनानंतर सुनेत्रा पवार (Sunetra Pawar) यांची राष्ट्रवादीच्या आमदारांनी सर्वानुमते विधिमंडळ पक्षाच्या नेतेपदी निवड केली आहे. आता यासंदर्भातील पत्र मुख्यमंत्री देवेंद्र फडणवीस यांच्याकडे पत्र देण्यात येणार आहे. उपमुख्यमंत्री म्हणून सुनेत्रा पवार यांचा शपथविधी व्हावा, असं पत्र देणार असल्याचं छगन भुजबळ यांनी सांगितलं.
छगन भुजबळ यांनी राष्ट्रवादी काँग्रेस पक्षाच्या बैठकीत दोन निर्णय घेण्यात आल्याची माहिती दिली. सुनेत्रा पवार यांना विधिमंडळ पक्षाच्या नेतेपदी निवड करण्याचा आणि विधानमंडळासंदर्भातील सर्व अधिकार सुनेत्रा पवार यांना देण्यात यावेत, असा ठराव मांडल्याची माहिती छगन भुजबळ यांनी दिली. राष्ट्रवादीच्या आमदारांच्या बैठकीत जे निर्णय घेण्यात आले, त्यासंदर्भातील पत्र मुख्यमंत्री देवेंद्र फडणवीस यांच्याकडे देणार आहोत.
विधीमंडळ गटनेता म्हणुन सुनेत्रा पवार यांची निवड करण्याचा प्रस्ताव छगन भुजबळ यांनी मांडला या प्रस्तावाला सुरुवातीला हसन मुश्रीफ यांनी अनुमोदन दिलं त्यानंतर छगन भुजबळ, संजय बनसोडे, धनंजय मुंडे आणि नरहरी झिरवाळ यांनी अनुमोदन दिलं.विधीमंडळ नेता निवडल्यानंतर सर्व अधिकार सुनेत्रा पवार यांना देण्यात आले आहेत.
राष्ट्रवादीचं पत्र मिळाल्यानंतर मुख्यमंत्री निवासस्थानाहून एक पत्र राज्यपालांना पाठविण्यात येईल. त्यानंतर संध्याकाळी ५ वाजता सुनेत्रा पवार उपमुख्यमंत्री म्हणून शपथ घेतील. ही प्रक्रिया पुढील दोन तासात पार पडेल. त्यानंतर सायंकाळी सुनित्रा पवार यांना कोणते खाते द्यायचे यासंदर्भात आज शासन निर्णय जारी केला जाऊ शकतो.
सुनेत्रा पवार यांचा उपमुख्यमंत्री म्हणून शपथविधी
अजित पवार यांच्या निधनामुळं रिक्त झालेल्या उपमुख्यमंत्री पदाची शपथ सुनेत्रा पवार यांना देण्यात यावी अशी भूमिका राष्ट्रवादी काँग्रेसनं घेतली होती. त्याप्रमाणं राष्ट्रवादी काँग्रेसच्या आमदारांनी एकत्रित येत सुनेत्रा पवार यांची विधिमंडळ पक्षाच्या प्रमुख निवड केली आहे. आता महाराष्ट्राचे राज्यपाल आचार्य देवव्रत यांच्याकडून सुनेत्रा पवार यांना उपमुख्यमंत्रिपदासाठी पद आणि गोपनीयतेची शपथ दिली जाणार आहे.
सुनेत्रा पवार यांचा राज्यसभेच्या खासदारकीचा राजीनामा
महाराष्ट्राच्या उपमुख्यमंत्री म्हणून शपथ घेणार असल्यानं सुनेत्रा पवार यांनी त्यांच्या राज्यसभेच्या खासदारकीचा राजीनामा दिला आहे. हा राजीनामा उपराष्ट्रपती सी.पी. राधाकृष्णन यांच्याकडे सोपवण्यात आला आहेत.
महत्त्वाच्या बातम्या
