Satara ZP Election Result 2026 : सातारा जिल्हा परिषदेचं अध्यक्षपद ओबीसी महिला प्रवर्गासाठी राखीव, 'या' 9 सदस्यांपैकी कोणाची वर्णी लागणार?
Satara ZP Election Result 2026 : सातारा जिल्हा परिषदेत कोण सत्ता स्थापन करणार? जिल्हा परिषदेचा अध्यक्ष कोण होणार याकडे सर्वांचं लक्ष लागलं आहे.
सातारा : सातारा जिल्हा परिषदेच्या 65 जागांचे निकाल जाहीर झाले आहेत. सातारा जिल्हा परिषदेवर स्वबळावर सत्ता आणायची या इराद्यानं निवडणूक लढलेल्या भाजपच्या इराद्यांना मतदारांनी ब्रेक लावल्याचं निकालातून पाहायला मिळालं आहे. सातारा जिल्हा परिषदेत भाजपला 27 जागा मिळाल्या असून त्यांच्या विरोधात लढलेली राष्ट्रवादी काँग्रेस आणि शिवसेना एकत्र आल्यास त्यांना सत्ता स्थापनेची संधी आहे. राष्ट्रवादी काँग्रेसनं 20 आणि शिवसेनेनं 15 अशा एकूण 35 जागा जिंकल्या असून सातारा जिल्हा परिषदेत बहुमताचा आकडा 33 इतका आहे. याशिवाय राष्ट्रवादी काँग्रेसनं पाठिंबा दिलेले स्वाभिमानी शेतकरी संघटनेचे राजेंद्र शेळके वर्णे जिल्हा परिषद गटातून विजयी झाले आहेत. त्यामुळं राष्ट्रवादीला त्यांचा पाठिंबा मिळेल, असं चित्र आहे. सातारा जिल्हा परिषदेचं अध्यक्षपद ओबीसी महिला या प्रवर्गासाठी राखीव आहे. साताऱ्याच्या 65 पैकी 9 जिल्हा परिषद गट ओबीसी महिलांसाठी राखीव होते. या नऊ गटातील एका जिल्हा परिषद सदस्याला अध्यक्षपदी संधी मिळेल.
सातारा जिल्हा परिषदेचं अध्यपद कोणाला?
सातारा जिल्हा परिषदेच्या गट रचनेनंतर गटनिहाय आरक्षण जाहीर करण्यात आलं होतं. त्यानुसार सातारा जिल्हा परिषदेचे 9 गट ओबीसी महिलांसाठी राखीव ठेवण्यात आले होते. यात कराड, पाटण, खटाव मधील प्रत्येकी दोन जिल्हा परिषद गटांचा समावेश होता. तर, कोरेगाव, सातारा आणि जावळी तालुक्यातील एका जिल्हा परिषद गटाचा समावेश होता. कराडमध्ये काले आणि विंग, पाटणमध्ये मारुल हवेली आणि मल्हारपेठ, खटाव तालुक्यात औंध आणि बुध तर साताऱ्यात कोडोली, जावळीत कुडाळ आणि कोरेगावमध्ये वाठार स्टेशन जिल्हा परिषद गटात ओबीसी आरक्षण लागू होतं.
सातारा जिल्हा परिषद निवडणुकीत ओबीसी प्रवर्गासाठी राखीव असलेल्या 9 गटांपैकी चार जिल्हा परिषद गटात भाजपनं विजय मिळवला. यामध्ये कुडाळ, कोडोली, काले आणि विंग जिल्हा परिषद गटांचा समावेश आहे. तर, दोन जिल्हा परिषद गटांमध्ये शिवसेनेनं विजय मिळवला. ते गट म्हणजे मारुल हवेली आणि मल्हार पेठ होय. राष्ट्रवादी काँग्रेसनं वाठार स्टेशन, बुध आणि औंध जिल्हा परिषद गटात विजय मिळवला आहे.
सातारा जिल्हा परिषद ओबीसी महिला प्रवर्ग गट, विजयी उमेदवार यादी
जावळी तालुका: कुडाळ जिल्हा परिषद गट
जयश्री गिरी, भाजप, 11917 मते (विजयी)
पूनम नायकुडे, राष्ट्रवादी काँग्रेस, 5201
जयश्री शेवते, अपक्ष, 2367
सातारा तालुका: कोडोली जिल्हा परिषद गट
नीता खरात, भाजप, 7430 मते (विजयी)
कांचन साळुंखे राष्ट्रवादी काँग्रेस 4973
संगीता माने अपक्ष 4146
कोरेगाव तालुका : वाठार स्टेशन जिल्हा परिषद गट
जयश्री भोसले, राष्ट्रवादी काँग्रेस, 12543 मते (विजयी)
सुनिता मोहिते, शिवसेना, 9078
खटाव तालुका : बुध जिल्हा परिषद गट
लता कर्णे , राष्ट्रवादी काँग्रेस, 13661 मते (विजयी)
प्रिती त्रिपुटे भाजप 11934
खटाव तालुका : औंध जिल्हा परिषद गट
मनीषा फडतरे, राष्ट्रवादी काँग्रेस, 11394 मते (विजयी)
भारती अंकुश गोरे, भाजप, 11342
पाटण तालुका : मल्हार पेठ जिल्हा परिषद गट
विजया कुंभार, शिवसेना, 16275 मते विजयी
सुजाता कुंभार भाजप 8947
पाटण तालुका : मारुल हवेली जिल्हा परिषद गट
योगिता गिरी, शिवसेना,16203 मते विजयी
वैशाली गुरव, भाजप, 7164
कराड तालुका: विंग जिल्हा परिषद गट
शैलजा शिंदे, भाजप
कराड तालुका: काले जिल्हा परिषद गट
मनीषा पाटील, भाजप
महत्त्वाच्या बातम्या
