Nashik MNS: नाशिकमध्ये मनसेची मोठी खेळी, एकमेव नगरसेविकेचा शिंदे गटाला पाठिंबा; ठाकरेंची साथ सोडली!
Nashik MNS: नाशिक महापालिकेत महाराष्ट्र नवनिर्माण सेनेने चक्क उद्धव ठाकरेंच्या शिवसेनेची साथ सोडत एकनाथ शिंदे यांच्या शिवसेनेला पाठिंबा दिला आहे.
Nashik MNS: नाशिक महापालिकेत (NMC) महाराष्ट्र नवनिर्माण सेनेने (MNS) चक्क उद्धव ठाकरेंच्या शिवसेनेची (Shiv Sena UBT) साथ सोडत एकनाथ शिंदे यांच्या शिवसेनेला पाठिंबा दिला आहे. नाशिकमध्ये मनसेच्या मयुरी पवार (Mayuri Pawar) या एकमेव नगरसेविका आहेत. तर शिवसेना शिंदे गटाचे 26 उमेदवार विजयी झाले आहेत. मनसेला एकत्र घेतल्याने शिवसेना आणि मनसे यांचा मिळून एक सदस्य स्थायी समितीत वाढणार आहे. मात्र, उद्धव ठाकरे यांच्या शिवसेनेसोबत निवडणूक लढलेल्या मनसेच्या एकमेव नगरसेविकेने एकनाथ शिंदे यांच्या शिवसेनेला पाठिंबा दिल्याने राजकीय वर्तुळात चर्चांना उधाण आले आहे. तर स्थायी समिती, प्रभाग समिती, स्वीकृत नगरसेवक आणि पालिकेतील विविध समित्यांवरील राजकीय समीकरणे आता बदलणार आहेत.
याबाबत मयुरी पवार यांचे पती मनसेचे नेते अंकुश पवार म्हणाले की, नाशिक महापालिकेत मनसेचा एक निवडणूक नगरसेवक निवडून आलेला आहे. त्या अनुषंगाने आम्ही आमचा स्वतंत्र गट स्थापन केला होता. परंतु नाशिकमध्ये आगामी काळात कुंभमेळा भरणार आहे. त्यात विकासकामं होणं गरजेचं आहे. कुंभमेळा आमच्याच प्रभागात भरतो, त्यामुळे विकासकामं झाली पाहिजे, या दृष्टीने आम्ही एकनाथ शिंदे यांच्या शिवसेनेसोबत जाण्याचा निर्णय घेतल्याची माहिती त्यांनी दिली आहे.
Nashik Mayor Election 2026: नाशिकमध्ये हिमगौरी आडके महापौर, विलास शिंदे उपमहापौर
दरम्यान, नाशिक महानगरपालिकेत (NMC) अखेर भारतीय जनता पार्टी (BJP) आणि शिवसेना शिंदे गटाने (Shiv Sena) सत्ता स्थापन केली आहे. निवडणुकीत परस्परांविरोधात लढलेले हे दोन पक्ष आता सत्तेत एकत्र आले असून, भाजपच्या हिमगौरी आडके (Himgauri Adke) यांची महापौरपदी तर शिवसेना शिंदे गटाचे विलास शिंदे (Vilas Shinde) यांची उपमहापौरपदी निवड झाली आहे. महापालिका निवडणुकीत भाजपला स्पष्ट बहुमत मिळाले असताना, “आम्हाला कुणाच्याही कुबड्यांची गरज नाही,” अशी भूमिका कुंभमेळा मंत्री गिरीश महाजन यांनी घेतली होती. मात्र, वरिष्ठ पातळीवर झालेल्या चर्चेनंतर भाजप–शिवसेना शिंदे गट युतीचा निर्णय घेण्यात आला. त्यानुसार भाजपकडे महापौरपद, तर शिवसेना शिंदे गटाकडे उपमहापौरपद देण्यावर शिक्कामोर्तब करण्यात आले. हिमगौरी आडके यांची महापौरपदी आणि विलास शिंदे यांची उपमहापौरपदी बिनविरोध निवड झाली.
इतर महत्त्वाच्या बातम्या
महत्त्वाच्या बातम्या
