Malegaon Mayor Election 2026: ...तर मालेगावात शिवसेनेचा महापौर बसणार; दादा भुसे, मौलाना मुफ्तींच्या भेटीने राजकारण ढवळलं, नेमकं काय घडलं?
Malegaon Mayor Election 2026: मालेगाव महापालिका महापौर व उपमहापौर पद निवडीसाठी उद्या महापालिका सभागृहात विशेष सभा पार पडणार आहे. मात्र, या सभेपूर्वीच राजकीय घडामोडींना वेग आला आहे.
Malegaon Mayor Election 2026: मालेगाव महानगरपालिकेच्या महापौर आणि उपमहापौर पदाच्या निवडीसाठी उद्या महापालिका सभागृहात विशेष सभा पार पडणार असून, त्याआधीच शहरातील राजकीय घडामोडींना वेग आला आहे. शिवसेना (शिंदे गट) नेते व मंत्री दादा भुसे (Dada Bhuse) आणि एमआयएमचे आमदार मौलाना मुफ्ती मोहम्मद इस्माईल (Maulana Mufti Mohammad Ismail) यांच्यात झालेल्या भेटीमुळे मालेगावच्या राजकारणात खळबळ उडाली आहे.
या भेटीनंतर महापौरपदासाठीची समीकरणे बदलण्याची शक्यता वर्तवली जात असून, महापालिका सभागृहातील उपस्थित नगरसेवकांचा आकडाच अखेर महापौरपदाचा फैसला करणार आहे. सध्या शिवसेना (शिंदे गट) कडे 18, तर एमआयएमकडे 21 नगरसेवक आहेत. महापौरपदासाठी आवश्यक असलेल्या जादुई आकड्यापर्यंत पोहोचण्यासाठी दोन्ही पक्षांना आणखी पाच नगरसेवकांची गरज आहे.
Malegaon Mayor Election 2026: ...तर शिवसेनेचा महापौर बसणार
दरम्यान, इस्लाम पार्टीकडे असलेल्या नगरसेवकांपैकी दोन नगरसेवक पूर्वाश्रमीचे शिवसेनेचे असल्याने, त्यांची भूमिका निर्णायक ठरणार आहे. तसेच भाजपकडील दोन नगरसेवक कोणाची साथ देतात, याकडेही सर्वांचे लक्ष लागले आहे. जर हे चार नगरसेवक शिवसेना–एमआयएम आघाडीच्या पारड्यात पडले, तर शिवसेना (18), एमआयएम (21), भाजप (2) आणि इस्लाम पार्टीतील पूर्वाश्रमीचे शिवसेनेचे दोन असे एकूण 43 संख्याबळ तयार होऊ शकते. अशा परिस्थितीत शिवसेनेचा महापौर आणि एमआयएमचा उपमहापौर होण्याची शक्यता व्यक्त केली जात आहे.
Malegaon Mayor Election 2026: भाजपचा एमआयएमसोबत जाण्यास स्पष्ट नकार
मात्र, या समीकरणात अडथळा ठरण्याची चिन्हेही आहेत. शिवसेनेकडून भाजपला सत्तेत सहभागी होण्याचा प्रस्ताव देण्यात आला असला, तरी भाजपने एमआयएमसोबत जाण्यास स्पष्ट नकार दिल्याची माहिती सूत्रांकडून मिळत आहे. एमआयएमसोबत कोणत्याही परिस्थितीत युती करणार नाही, असा पवित्रा भाजपने यापूर्वीही घेतलेला आहे.
Malegaon Mayor Election 2026: महापौर इस्लाम पार्टीचाच राहील: आसिफ शेख
दुसरीकडे, इस्लाम पार्टी, समाजवादी पार्टी आणि काँग्रेस या पक्षांचे एकत्रित संख्याबळ 43 इतके असल्याचा दावा करण्यात येत आहे. त्यामुळे महापौरपद इस्लाम पार्टीचेच राहील, असा ठाम विश्वास इस्लाम पार्टीचे माजी आमदार आसिफ शेख यांनी व्यक्त केला आहे. एकूणच, मालेगाव महापालिकेच्या महापौरपदासाठीची लढत अत्यंत अटीतटीची ठरणार असून, उद्याच्या विशेष सभेत नेमके कोणते राजकीय गणित जुळते, याकडे संपूर्ण शहराचे लक्ष लागले आहे.
Malegaon Election Result 2026: मालेगावातील पक्षीय बलाबल
इस्लाम पार्टी : 35
एमआयएम : 21
शिवसेना : 18
समाजवादी पार्टी :5
काँग्रेस : 3
भाजप : 2
आणखी वाचा
महत्त्वाच्या बातम्या
