नरेंद्र मोदींना 'ठाकरे'प्रेमाचा उमाळा तर उद्धव ठाकरेंकडूनही मोदींचे गोडवे

पंतप्रधान मोदींनाही ठाकरेप्रेमाचे उमाळे आल्याचे चित्र आज लातूर जिल्ह्यातील औसा येथे आयोजित महायुतीच्या सभेत पाहायला मिळाले. विशेष म्हणजे आजच 'सामना'च्या अग्रलेखातून उद्धव ठाकरे यांनी भाजप आणि मोदींच्या धोरणावर टीका केली आहे.

मुंबई : सत्तेत असताना देखील पंतप्रधान नरेंद्र मोदींवर जाहीर टीका करणारे शिवसेना पक्षप्रमुख उद्धव ठाकरे यांनी आज सारे 'गिले-शिकवे' विसरून मोदींचे गोडवे गायले तर दुसरीकडे पंतप्रधान मोदींनाही ठाकरेप्रेमाचे उमाळे आल्याचे चित्र आज लातूर जिल्ह्यातील औसा येथे आयोजित महायुतीच्या सभेत पाहायला मिळाले. विशेष म्हणजे आजच 'सामना'च्या अग्रलेखातून उद्धव ठाकरे यांनी भाजप आणि मोदींच्या धोरणावर टीका केली आहे. भाषणाच्या सुरुवातीला उद्धव ठाकरे यांचा उल्लेख 'माझे लहान भाऊ' असा करून मोदींनी आपले ठाकरेप्रेम दाखवून दिले. तर काँग्रेसने शिवसेनाप्रमुख बाळासाहेब ठाकरे यांचं नागरिकत्त्व हिसकावून घेतलं होतं तसेच त्यांचा मतदानाचा अधिकारही काढून घेतला होता, असा आरोप करत पंतप्रधान नरेंद्र मोदींनी काँग्रेसवर चांगलाच हल्लाबोल केला. सोबतच घराणेशाहीवर टीका करताना देखील देखील त्यांनी बाळासाहेब ठाकरे यांचा दाखला देत घराणेशाही करणाऱ्यांनी बाळासाहेब ठाकरेंकडून शिकावं, असा सल्लाही दिला. UNCUT | वल्लभभाईंप्रमाणेच तुम्हीही मराठवाड्याच्या पाठीशी राहा, उद्धव ठाकरे यांचं भाषण | लातूर | एबीपी माझा तर दुसरीकडे उद्धव ठाकरे यांनी देखील मोदींची स्तुती करायला कुठेही कमी पडू दिलं नाही. सुरुवातीलाच भाजपने जाहीर केलेल्या जाहीरनाम्याबद्दल मोदीजींचं आभार मानतो, अशा शब्दात त्यांनी कौतुक केलं. रझाकारांच्या वेळेस जसे वल्लभभाई मराठवाड्याच्या पाठीशी उभे राहिले तसेच मोदीजी तुम्ही उभे राहा, अशी मागणीही ठाकरे यांनी केली. सोबतच आम्ही आमचा उमेदवार मोदीजींच्या रूपात आम्ही आमचा उमेदवार घोषित केला आहे. आता विरोधकांनी आपला पंतप्रधान उमेदवार घोषित करावा, असे आव्हान त्यांनी विरोधकांना दिले. शिवसेना-भाजप सत्तेत आल्यानंतर दोन्ही पक्षांमध्ये मतभेद निर्माण झाले होते. त्यानंतर उद्धव ठाकरेंनी पंतप्रधान नरेंद्र मोदींच्या कारभारावर अनेकदा टीकास्त्र सोडलं होतं. राम मंदिर, नोटबंदी, शेतकरी आत्महत्या, राफेल, शेतकरी कर्जमाफी इत्यादी मुद्द्यांवरुन उद्धव ठाकरेंनी नरेंद्र मोदी आणि भाजपला कोडींत पकडण्याचे प्रयत्न केले होते.  अनेकदा उद्धव ठाकरे यांनी पंतप्रधान नरेंद्र मोदींवर थेट टीका केली होती. काही वेळा भाजपकडूनही मोदींवरील टीकेनंतर उद्धव ठाकरेंना प्रत्युत्तर देण्याचे प्रयत्न झाले होते. VIDEO | लातूरच्या औसा येथे महायुतीची जाहीर सभा, मुख्यमंत्री देवेंद्र फडणवीस यांचे भाषण | लातूर | एबीपी माझा एकूणच सत्तेत एकत्र असले तरी उद्धव ठाकरे आणि पंतप्रधान नरेंद्र मोदी या दोन्ही प्रमुख नेत्यांमध्ये दुरावा निर्माण झाला होता. मुख्यमंत्री देवेंद्र फडणवीस यांनी दोन्ही नेत्यांना एकत्र आणण्याचे अनेक प्रयत्न केले, मात्र योग जुळून येत नव्हता. अखेर आजच्या सभेत दोन्ही नेते एकत्र आले आणि एकमेकांविषयी भरभरुन प्रेम देखील व्यक्त केले.

शरदराव तुम्ही तिकडं शोभत नाहीत, पंतप्रधान मोदींची शरद पवारांवर टीका 

यावेळी पंतप्रधान नरेंद्र मोदी यांनी काँग्रेस आणि विरोधकांसह शरद पवारांवर जोरदार टीकास्त्र सोडले. आज फुटीरतावादी लोकांसोबत शरद पवार उभे आहेत. शरदराव तुम्ही अशा लोकांसोबत उभे आहात, तुम्हाला हे शोभत का? राजकारण वेगळी गोष्ट मात्र शरद पवार तिकडं शोभत नाहीत, अशा शब्दात त्यांनी पवारांवर निशाणा साधला.

फुटीरतावाद्यांवर टीका करताना ओमर अब्दुलांच्या वक्तव्याचा धागा पकडून मोदींनी शरद पवारांवर टीका केली. ज्यांना वेगळा पंतप्रधान पाहिजे त्यांच्यासोबत शरद पवार आहेत, हे शोभणार नाही असे मोदी म्हणाले.

यावेळी मोदींनी आपल्या भाषणाची सुरुवात मराठीत केली. आई तुळजाभवानी आणि सिद्धेश्वर महाराज, शिवाचार्य महाराजांच्या पुण्यभूमीला माझा साष्टांग नमस्कार, अशा शब्दात त्यांनी आपल्या भाषणाला सुरुवात केली.

यावेळी त्यांनी काँग्रेस आणि विरोधकांवर जोरदार टीका केली. देशातून दहशतवाद नष्ट करण्यासाठी सरकारने अनेक प्रयत्न केले आहेत. दहशतवाद्यांच्या अड्ड्यांमध्ये घुसून आम्ही मारणार, ही नव्या भारताची नीती आहे, असे मोदी म्हणाले. दहशतवाद संपवूनच आम्ही थांबणार असल्याचेही ते म्हणाले. जम्मू काश्मीरमध्ये आम्ही राष्ट्रवाद्यांच्या मनात सकारात्मकता जागविली आहे. आता तिथं दहशतवादी कारवाया कमी झाल्या आहेत, असे ते म्हणाले.

काँग्रेस आणि पाकिस्तानचे विचार एकसारखेच असल्याचा आरोप त्यांनी केला. काँग्रेसला अक्कल असती तर देशाची वाटणीच होऊ दिली नसती, असेही ते म्हणाले. जे पाकिस्तान म्हणतोय तेच काँग्रेसच्या जाहीरनाम्यात दिसतेय. ज्या लोकांना आपल्याच सैनिकांवर विश्वास नाही, त्यांना शिक्षा द्यायला हवी, त्यांचं डिपॉझिट जप्त करण्याची शिक्षा द्या, असे मोदी यावेळी म्हणाले.

महायुतीच्या या सभेला यंदाच्या निवडणुकीत पहिल्यांदाच शिवसेना पक्ष प्रमुख उद्धव ठाकरे आणि पंतप्रधान नरेंद्र मोदी एकाच मंचावर आले. यावेळी मुख्यमंत्री देवेंद्र फडणवीस, केंद्रीय मंत्री रामदास आठवले यांच्यासह महायुतीचे उमेदवार ओम राजे निंबाळकर, सुधाकर शृंगारे उपस्थित होते.