महाराष्ट्राच्या विधानसभा निवडणुकीसाठी प्रशासन सज्ज, मतदान किती वाजता सुरु होणार अन् कधी संपणार? मतदान केंद्रात मोबाईल नेण्यावर बंदी
Maharashtra Assembly Election 2024 : महाराष्ट्राच्या विधानसभा निवडणुकीसाठी आणि नांदेड लोकसभा मतदारसंघाच्या पोटनिवडणुकीसाठी उद्या मतदान होणार आहे.
मुंबई: महाराष्ट्राच्या विधानसभा निवडणुकीसाठी प्रशासन सज्ज झालं आहे. महाराष्ट्राच्या विधानसभेच्या 288 जागांसाठी आणि नांदेड लोकसभा मतदारसंघाच्या पोटनिवडणुकीसाठी उद्या मतदान होणार आहे. यासाठी निवडणूक आयोगासह प्रशासन सज्ज झालं आहे. निवडणूक आयोगानं मतदानाची वेळ सकाळी 7 ते सायंकाळी 6 पर्यंत निश्चित केली आहे. मतदारांनी या वेळेत मतदान करावं, असं आवाहन करण्यात आलं आहे. मतदान केंद्रात मोबाईल नेण्यावर बंदी घालण्यात आली आहे.
मतदान कधी सुरु होणार?
महाराष्ट्रातील विधानसभा निवडणुकीसाठी 288 मतदारसंघात आणि नांदेड लोकसभा मतदारसंघात पोटनिवडणुकीनिमित्त सकाळी 6 मतदान सुरु होईल. मतदान सायंकाळी 6 वाजेपर्यंत सुरु राहणार आहे. या वेळेत मतदारांनी मतदान करावं, असं आवाहन करण्यात आलं आहे.
मतदानाच्या दिवशी मतदान केंद्रात मोबाईल नेण्यास मनाई
विधानसभा निवडणुकीसाठी मतदारांना मतदान केंद्रात मोबाईल नेण्यास मनाई असणार आहे. मतदान केंद्रांवर मोबाईल घेऊन जाण्यास मनाई असल्याचे स्पष्ट निर्देश भारत निवडणूक आयोगाने दिले आहेत.मतदान प्रक्रियेत बाधा निर्माण करण्यासाठी, मतदान केंद्रांवरील शांतता भंग करण्यासाठी तसेच कायदा आणि सुव्यवस्थेचा प्रश्न निर्माण करण्यासाठी मोबाईलचा गैरवापर होण्याची शक्यता नाकारता येत नाही. त्यामुळे मतदानाच्या दिवशी मतदान केंद्रांवर मोबाईल घेऊन जाण्यास मज्जाव असणार आहे.
मतदार यादीत नाव कसं तपासणार?
मतदारांना त्यांचं नाव मतदार यादीत आहे की नाही हे पाहण्यासाठी https://voters.eci.gov.in/ या संकेतस्थळाला भेट द्यावी लागेल.
मतदान ओळखपत्राशिवाय कोणती कागदपत्रं वैध ठरणार?
1) आधार कार्ड,
2) मनरेगा अंतर्गत निर्गमित करण्यात आलेले रोजगार ओळखपत्र,
3) बँक किंवा टपाल विभागातर्फे छायाचित्रासह वितरित करण्यात आलेले पासबुक,
4) कामगार मंत्रालयाद्वारा वितरित आरोग्य विमा स्मार्ट कार्ड,
5) वाहन चालक परवाना (ड्रायव्हिंग लायसन्स),
6) पॅन कार्ड,
7) राष्ट्रीय लोकसंख्या नोंदवही अंतर्गत भारतीय महानिबंधक आणि जनगणना आयुक्तांनी जारी केलेले स्मार्ट कार्ड
8) भारतीय पारपत्र (पासपोर्ट)
9) निवृत्तीवेतनाची दस्तावेज
10) केंद्र अथवा राज्य शासन, तसेच सार्वजनिक क्षेत्रातील उपक्रम, पब्लिक लिमिटेड कंपन्यांनी आपल्या कर्मचाऱ्यांना वितरित केलेले छायाचित्र ओळखपत्र
11) संसद, विधानसभा, विधानपरिषदेच्या सदस्यांना वितरित केलेले अधिकृत ओळखपत्र
12) भारत सरकारच्या सामाजिक न्याय व सशक्तिकरण मंत्रालयाच्यावतीने दिव्यांग व्यक्तींना वितरित केलेले विशेष ओळखपत्र असे 12 पुरावे मतदानासाठी ग्राह्य धरले जाणार आहेत. प्रवासी भारतीयांना त्यांची ओळख पटविण्यासाठी त्यांचा मूळ पासपोर्ट आवश्यक असणार आहे.
इतर बातम्या :
महत्त्वाच्या बातम्या
