शांतीत क्रांती ही एकनाथ शिंदेंची खासियत; तेच मुख्यमंत्रि‍पदाच्या रेसमध्ये, शिंदे गटाच्या दाव्यानं राजकीय वर्तुळात खळबळ
Sanjay Shirsat On Eknath Shinde: देवेंद्र फडणवीस यांना मुख्यमंत्रिपद मिळत असल्यामुळे एकनाथ शिंदे नाराज असल्याची चर्चा रंगली आहे.
Sanjay Shirsat On Eknath Shinde: विधानसभेचा निकाल लागल्यानंतर एकनाथ शिंदे (Eknath Shinde) यांच्या शिवसेनेला घवघवीत यश मिळाले, त्यानंतर गेल्या अडीच वर्षांच्या प्रचंड कामाच्या बळावर पुन्हा एकनाथ शिंदे हेच मुख्यमंत्री होणार असे दिसत असताना आता मात्र भाजपकडून देवेंद्र फडणवीस (Devendra Fadnavis) यांच्या गळ्यात मुख्यमंत्री पदाची माळ पडणार हे जवळपास निश्चित झाले आहे. देवेंद्र फडणवीस यांना मुख्यमंत्रिपद मिळत असल्यामुळे एकनाथ शिंदे नाराज असल्याची चर्चा रंगली आहे. याचदरम्यान शिंदे गटाचे आमदार संजय शिरसाट (Sanjay Shirsat) यांनी एबीपी माझाशी बोलताना मोठं विधान केलं आहे.
एकनाथ शिंदे (Eknath Shinde) यांची आज पत्रकार परिषद आहे. त्यांच्या मनात काही असेल ते मांडतील. एकनाथ शिंदेंच्या मनात काय आहे, हे आम्हालाही कळत नाही. न बोलता करेक्ट कार्यक्रम करणाऱ्यांमध्ये एकनाथ शिंदे एक नंबरवर आहेत, असं संजय शिरसाट म्हणाले. शांतीत क्रांती ही एकनाथ शिंदेंची खासियत आहे. तसेच मुख्यमंत्रि‍पदाच्या रेसमध्ये एकनाथ शिंदे होते, आहेत आणि राहणार...असं संजय शिरसाट यांनी स्पष्ट केलं आहे. '
राजकारणात काही फिक्स नसतं- संजय शिरसाट
जो पर्यंत नाव जाहीर होत नाही, तोपर्यंत काहीच सांगू शकत नाही. 15 वर्षापासून मंत्री मंत्री म्हणून आमचं नाव आहे. मात्र मंत्री झालो नाही. राजकारणात काही फिक्स नसतं, असंही संजय शिरसाट यावेळी म्हणाले. भाजपने एकनाथ शिंदेंना मुख्यमंत्रिपदाबाबत शब्द दिला होता, अशीही चर्चा सुरु आहे, असे संजय शिरसाट यांना विचारले असता, याबाबत मला काहीच कल्पना नाहीय, असं त्यांनी सांगितले.
एकनाथ शिंदे उपमुख्यमंत्रिपदाची ऑफर स्वीकारणार?
मुख्यमंत्री पदी देवेंद्र फडणवीस यांच्या नावाची नियुक्ती करण्यात येणार असल्याचा निरोप केंद्रातून एकनाथ शिंदे यांना देण्यात आला आहे, असंही सांगण्यात येत आहे. सोबत केंद्रीय मंत्रिपदाची नाहीतर, राज्यात उपमुख्यमंत्री पदाची ऑफर देण्यात आली आहे. राष्ट्रवादीने देवेंद्र फडणवीस यांच्या समर्थनाचे पत्र दिल्यानंतर केंद्रातून घडामोडींना वेग आला आहे. एकनाथ शिंदे यामुळे काहीसे नाराज झाल्याची सूत्रांची माहिती आहे. तसेच उपमुख्यमंत्री पदाची ऑफर एकनाथ शिंदे स्वीकारणार का?, याकडे सर्वांचं लक्ष लागलं आहे.
संबंधित बातमी:
महत्त्वाच्या बातम्या
