Andheri By Election : भाजप उमेदवार मुरजी पटेल यांची उमेदवारी धोक्यात? ठाकरे गटाचा आक्षेप
Andheri By Election : अंधेरी पूर्व पोट निवडणुकीतील भाजप (BJP) उमेदवार मुरजी पटेल (Murji Patel) यांच्या उमेदवारीवर शिवसेना उद्धव बाळासाहेब ठाकरे गटाने अक्षेप घेतला आहे.
Andheri By Election : अंधेरी पूर्व पोट निवडणुकीतील भाजप (BJP) उमेदवार मुरजी पटेल (Murji Patel) यांच्या अडचणी वाढण्याची शक्यता आहे. कारण पटेल यांच्या उमेदवारीवर शिवसेना उद्धव बाळासाहेब ठाकरे गटाने अक्षेप घेतला आहे. 2017 पासून सहा वर्षे निवडणूक लढण्यास बंदी असताना त्यांनी उमेदवारी अर्ज कसा दाखल केला? असा आक्षेप शिवसेनेचे माजी नगरसेवक संदीप नाईक यांची घेतला आहे. नाईक यांनी आज पत्रकार परिषद घेऊन पटेल यांच्या उमेदवारीवर आक्षेप घेतला आहे. केंद्रीय निवडणूक आयोगाकडे ठाकरे गटाकडून याबाबतचे पुरावे देखील देण्यात येणार असल्याचे संदीप नाईक यांनी म्हटले आहे.
भाजपचे उमेदवार मुरजी पटेल यांना मुंबई महापालिकेच्या निवडणुकीत खोटी कागदपत्र सादर केल्यामुळे त्यांना सहा वर्षासाठी निवडणूक लढण्यास अपात्र ठरविले आहे. महाराष्ट्र शासनाच्या आदेशानुसार महानगरपालिकेने पटले यांच्यावर ही कारवाई केली आहे. परंतु, असे असताना देखील त्यांचा निवडणुकीचा अर्ज कोणत्या नियमानुसार स्वीकारला? असा प्रश्न नाईक यांनी उपस्थित केलाय.
2017 पासून सहा वर्षांची निवडणूक लढण्यास बंदी असताना मुरजी पटेल यांनी उमेदवारी अर्ज कसा दाखल केला? असा प्रश्न संदीप नाईक यांनी उपस्थित केलाय. निवडणूक लढण्याच्या परवानगीबाबत उच्च न्यायालयाने याचिका फेटाळली असताना त्यांनी उमेदवारी अर्ज का दाखल केला? या दोन्ही प्रकाराची माहिती प्रतिज्ञापत्रात देणे बंधनकारक असताना ही माहिती पटेल यांच्याकडून लपवण्यात आली आहे. निवडणूक लढण्यास बंदी असल्याने त्यांचा मतदान करण्याचा अधिकार देखील काढून घ्यावा अशी मागणी संदीप नाईक यांनी केलीय. याबरोबरच पटेल यांच्यावर दाखल असणाऱ्या गुन्ह्याची माहिती त्यांनी प्रतिज्ञापत्रात लपवली आहे, असा आक्षेप नाईक यांनी घेतला आहे. बोगस चेक देण्याबाबत पटेल यांच्यावर गुन्हे दाखल आहेत अशी माहिती देखील नाईक यांनी दिली आहे.
संदीप नाईक यांनी मुरजी पटेल यांच्या उमेदवारीवर आक्षेप घेतले आहेत. मात्र, निवडणूक आयोगाने हे सर्व आक्षेप फेटाळले आहेत. यावेळी संपीद नाईक यांनी भाजप आणि शिंदे गटावर टीका केलीय. भ्रष्टाचार करणाऱ्या लोकांना भाजपने उमेदवारी का दिली? असा प्रश्न उपस्थित करत आपल्या दिवंगत आमदाराच्या पत्नी विरोधात अशा उमेदवाराला पाठिंबा कसा देताय? असा प्रश्न नाईक यांनी मुख्यमंत्री एकनाथ शिंदे यांना विचारला आहे.
आक्षेप असताना देखील मुरजी पटेल यांना उमेदवारी दिली जाते. शिवाय आक्षेप असूनही कारवाई होत नाही, त्यामुळे या विरोधात आम्ही कोर्टात जाणार आहोत, असा इशारा संदीप नाईक यांनी दिला आहे.
ऋतुजा लटके यांच्या उमेदवारीवरही आक्षेप
दरम्यान, शिवसेना उद्धव बाळासाहेब ठाकरे गटाच्या उमेदवार ऋतुजा लटके यांच्या उमेदवारीवर देखील आक्षेप घेण्यात आलाय. अपक्ष उमेदवार मिलिंद कांबळे यांच्याकडून लटके यांच्या उमेदवारीवर आक्षेप घेतलाय. ऋतुजा लटके यांनी त्यांच्या प्रतिज्ञापत्रात ईपीएफओ बॅलन्स अकाउंट नंबर आणि त्यामधील शिल्लक दाखवली नाही. त्यामुळे त्यांनी सादर केलेले प्रतिज्ञापत्र अपूर्ण आहे. ते रद्द करण्यात यावे अशी मागणी निवडणूक आयोगाकडे करण्यात आली आहे. परंतु, निवडणूक आयोगाने मिलिंद काबळे यांनी ही मागणी फेटाळली आहे.
महत्त्वाच्या बातम्या
