Sindhudurg Crime : देवगडमध्ये 22 कोटींच्या देवमाशाच्या उलटीसह सहा जण ताब्यात
Sindhudurg Crime : सिंधुदुर्ग जिल्ह्यातील देवगडमध्ये देवमाशाची उलटी जप्त करण्यात आली. 12 किलो 370 ग्रॅम वजनाची ही उलटी असून तिची किंमत तब्बल 22 कोटी 37 लाख रुपये इतकी आहे.
Sindhudurg Crime : सिंधुदुर्ग (Sindhudurg) जिल्ह्यातील देवगडमध्ये देवमाशाची उलटी (Whale Vomit) जप्त करण्यात आली. 12 किलो 370 ग्रॅम वजनाची ही उलटी असून आंतरराष्ट्रीय बाजारात तिची किंमत तब्बल 22 कोटी 37 लाख रुपये इतकी आहे. देवमाशाच्या उलटीची तस्करी केल्याप्रकरणी देवगडात सहा जणांना अटक करण्यात आली आहे. सिंधुदुर्ग स्थानिक गुन्हे अन्वेषणने ही कारवाई केली आहे. पलिसांनी आरोपींकडून 22 कोटी रुपयांच्या मुद्देमालासह दोन गाड्या जप्त केल्या आहेत. देवमासा अर्थात व्हेल माशाच्या तस्करी प्रकरणी ताब्यात घेतलेल्या सह जणांमध्ये चार पुरुष आणि दोन महिलांचा समावेश आहे.
अटक केलेल्या आरोपींविरोधात कलम 39, 42, 43, 44, 48, 51 नुसार गुन्हा नोंद करण्यात आला आहे. व्हेल माशाच्या उलटीसदृश पदार्थाच्या सर्व संशयितांविरुद्ध वन्यजीव संरक्षण अधिनियम 1972 च्या तस्करी प्रकरणी सिंधुदुर्गात प्रथमच मोठी कारवाई करण्यात आली आहे.
व्हेल माशाची उलटी अतिशय मौल्यवान
व्हेल माशाची उलटी केवळ बाजारात विकली जात नाही तर ती कोणत्याही हिऱ्यापेक्षाही अधिक मौल्यवान आहे. व्हेल मासा हा पृथ्वीवरील असा जीव आहे, ज्याच्या उलटीला तरंगणारे सोने म्हणतात. व्हेल माशाच्या उलटी अॅम्बरग्रीस (Ambergris) या नावानेही ओळखली जाते. तज्ञांच्या मते, त्याला विष्ठा म्हणतात. म्हणजेच व्हेलच्या शरीरातून बाहेर पडणारा टाकाऊ पदार्थ. वास्तविक ते व्हेलच्या आतड्यातून बाहेर पडते. व्हेल मासे समुद्रातील अनेक गोष्टी खातात. यामुळे, जेव्हा त्यांना त्या गोष्टी पचवता येत नाहीत तेव्हा ती बाहेर टाकते. अॅम्बरग्रीस हे राखाडी किंवा काळ्या रंगाचे घन असते. एकप्रकारे तो मेणापासून बनलेला दगडासारखा पदार्थ आहे.
व्हेलची उलटी महाग का?
अॅम्बरग्रीस हा सुगंधी पदार्थ असतो. तो फार दुर्मिळ असतो, सहज सापडत नाही. याचा वापर नैसर्गिक परफ्युम बनवण्यात केला जातो, हे परफ्युम किंवा अत्तरे फार महागडी असतात. व्हेल माशाची उलटी किंवा अंबरग्रीस जमवणे आणि विकणे हे बेकायदेशीर आहे. तो गुन्हा आहे आणि त्यासाठी शिक्षा सुद्धा होऊ शकते. लोक जर या पदार्थाच्या मागे लागले तर व्हेल माशांना त्रास देऊन पकडतील, पर्यायाने व्हेलची संख्या कमी होईल.
संबंधित बातम्या
महत्त्वाच्या बातम्या
