वाढदिवस सेलिब्रेट करताना रिव्हॉल्व्हरमधून गोळी सुटली, बर्थडे बॉय महाडिकांच्या छातीत घुसली अन्... इंदापूरातील धक्कादायक घटना
Pune Crime: सध्या त्यांच्यावर पुण्यातील एका खासगी रुग्णालयात उपचार सुरू आहेत. वाढदिवसासाठी एकत्र जमले असताना पिस्तूलातून सुटलेल्या गोळीने एक जण जखमी झाल्याची घटना समोर आली आहे.
Pune Crime: इंदापूर तालुक्यातील सराटी येथील जगदाळे फार्म हाऊसवर परवानाधारक पिस्टल हाताळताना निष्काळजीपणामुळे गोळी सुटल्याने एक जण गंभीर जखमी झाला आहे. ही घटना रविवारी (24 मे) सायंकाळी चारच्या सुमारास घडली. या प्रकरणी पोलिसांनी चौघांविरुद्ध गुन्हा दाखल केला आहे. जखमी झालेल्या व्यक्तीचे नाव सुधीर रावसाहेब महाडिक देशमुख ( टेंभुर्णी, माढा) असे आहे. सध्या त्यांच्यावर पुण्यातील एका खासगी रुग्णालयात उपचार सुरू आहेत. वाढदिवसासाठी एकत्र जमले असताना पिस्तूलातून सुटलेल्या गोळीने एक जण जखमी झाल्याची घटना समोर आली आहे.
नक्की घडले काय?
पुण्यात इंदापूरमधील जगदाळे फार्मवरती वाढदिवसासाठी परवाना असलेलं पिस्टल हलगर्जीपणाने हाताळल्याने त्यातून सुटलेल्या गोळीतून एक जण जखमी झालाय. काल सायंकाळी चार वाजताच्या सुमारास इंदापूर तालुक्यातील जगदाळे फार्महाऊस वरती ही घटना घडलेली आहे. सुधीर रावसाहेब महाडिक देशमुख असं जखमी झालेल्या व्यक्तीचे नाव आहे. ते माढा तालुक्यातील टेंभुर्णी येथील रहिवासी आहेत.यानंतर इंदापूर पोलिसांनी आता चौघांविरोधात विरोधात गुन्हा दाखल केलाय. प्रदीप जगदाळे, सुधीर महाडिक, विजय पवार आणि राजकुमार पाटील अशी गुन्हा दाखल झालेली यांची नावे आहेत.
पोलिसांकडून मिळालेल्या माहितीनुसार, काल दुपारी चार वाजण्याच्या सुमारास इंदापूर तालुक्यातील सराटी येथील जगदाळे फार्महाउस वर सुधीर महाडिक देशमुख यांचा वाढदिवस साजरा करण्याच्या निमित्ताने हे सर्वजण एकत्र आले होते. याच वेळी राजकुमार दिलीपराव पाटील यांच्याकडील परवानाधारक पिस्टल सुधीर महाडिक देशमुख हातळत होते. आणि याच वेळी या पिस्टलमधून गोळी सुटली ती थेट सुधीर महाडिक यांच्या छातीच्या उजव्या बाजूला लागली यामध्ये ते जखमी झाले. त्यांच्यावर सध्या पुण्यात खाजगी रुग्णालयात उपचार सुरू आहेत. पोलिसांनी घटनास्थळावरून बंदुकीची रिकामी पितळी पुंगळी,एक हुक्का कप पाईप, एक पत्यांचा सेट मिळाला असून पोलिसांनी फरशी वरती पडलेले रक्ताचे नमुने देखील घेतलेले आहेत. इंदापूर पोलीस अधिक तपास करीत आहेत.
हेही वाचा:
महत्त्वाच्या बातम्या
