धक्कादायक! घरातील खुंटीला स्वेटरची दोरी अडकून 9 वर्षीय मुलाचा दुर्दैवी मृत्यू

सांगोला तालुक्यातील अचकदाणी येथे स्वेटरची दोरी खुंटीत अडकून फास बसल्यानं नऊ वर्षांच्या मुलाचा मृत्यू झाला. या घटनेमुळे परिसरात हळहळ व्यक्त होत आहे.

पंढरपूर : घरात खेळत असताना अचानक अंगातील स्वेटरची दोरी खुंटीत अडकून फास बसल्यानं नऊ वर्षांच्या मुलाचा मृत्यू झाला आहे. सांगोला तालुक्यातील अचकदाणीजवळ असलेल्या माळीवस्ती येथील नऊ वर्षीय बालकाचा मृत्यू झाला आहे. ही घटना आज शनिवारी सकाळी साडेदहाच्या सुमारास घडली आहे.

सांगोला तालुक्यातील अचकदाणी जवळील माळीवस्ती येथे नागन्नाथ सिताराम शेंडे हे पत्नी, आई, एक मुलगा आणि एक मुलगी यांच्यासमवेत राहतात. आर्थिक स्थिती हलाखीची असल्यानं नागन्नाथ शेंडे आणि त्यांची पत्नी मोलमजुरी करून उपजीविका करतात. सांगली जिल्ह्यातील आटपाडी येथे सिमेंटच्या चौकटी बनवणाऱ्या कारखान्यात ते अनेक वर्ष काम करत होते. लॉकडाऊन नंतर नोकरी गेल्यानं त्यांनी परिसरातच मोलमजूरी सुरु केली होती. आज नेहमीप्रमाणे दोघेही पती-पत्नी सकाळी लवकर कामासाठी घराबाहेर पडले होते. त्यांचा नऊ वर्षाचा सोहम नागन्नाथ शेंडे हा मुलगा आणि त्याची वयस्कर आजी असे दोघेच घरी होते.

थंडीचे दिवस असल्यानं सोहम यानं अंगामध्ये स्वेटर घातलेला होता. घरातील पलंगाच्या वरील बाजूस असलेल्या मोठ्या खुंटीशी तो खेळत होता. खेळताना अचानक स्वेटर मधील दोरी खुंटीमध्ये अडकली आणि त्याला फास लागला. जोरात फास लागल्यानं त्याचा जागीच मृत्यू झाला. शेजारील मित्र त्यास खेळायला बोलवण्यासाठी आले, तेव्हा हा प्रकार उघडकीला आला. शेजारील शेतात काम करणारी आई धावत त्या ठिकाणी आली. तिने पोटच्या गोळ्याला त्या अवस्थेत पाहून हंबरडा फोडला. आईच्या आक्रोशाने जमलेल्या लोकांच्याही डोळ्यात अश्रू आले. सोहम शेंडे हा जिल्हा परिषद प्राथमिक शाळा खरातवस्ती चिकमहूद या शाळेत इयत्ता तिसरीच्या वर्गात शिकत होता. सोहम हा अतिशय हुशार विद्यार्थी होता. या घटनेमुळे परिसरात हळहळ व्यक्त होत आहे.

महत्त्वाच्या बातम्या :